މޫސުމަށް އަންނަ ބަދަލުތައް ދުނިޔޭގެ ސަމާލުކަމަށް ގެންނެވުމަށް ރައީސުލްޖުމްހޫރިއްޔާ މުހައްމަދު ނަޝީދުގެ ކުރައްވާފައިވާ މަސައްކަތްފުޅުތައް ދައްކުވައިދޭ ގޮތަށް ތައްޔާރުކޮށްފައިވާ ޑޮކިއުމަންޓްރީ ފިލްމް "ދި އައިލެންޑް ޕްރެޒިޑެންޓް" ރޭ ކެނެޑާގެ "ޓޮރޮންޓޯ އިންޓަނޭޝަނަލް ފިލްމް ފެސްޓިވަލް"ގައި އަޅުވައިފި އެވެ. އެފެސްޓިވަލް އިފްތިތާހު ކުރުމުގެ ރަސްމިއްޔާތުގައި ރައީސުލްޖުމްހޫރިއްޔާ އާއި އެމަނިކުފާނުގެ އަނބިކަނބަލުން ލައިލާ އަލީ ބައިވެރިވެވަޑައިގެންފި އެވެ.
މިފިލްމަކީ ސެން ފްރެންސިސްކޯގެ މަޝްހޫރު ޑޮކިއުމެންޓްރީ ފިލްމު އުފައްދާ ކުންފުނި "އެކްޗުއަލް ފިލްމްސް" އިން ރާއްޖެއާ ބެހޭ ގޮތުން އުފައްދާފައިވާ ޑޮކިއުމެންޓަރީ ފިލްމެކެވެ.
މި ޑޮކިއުމެންޓްރީ ފިލްމުގައި ދައްކައިދެނީ މޫސުމަށް އަންނަ ބަދަލުތަކުގެ ސަބަބުން ކުރިމަތިވާ ނޭދެވޭ ކަންކަމުން ދިފާއުވުމަށް ރާއްޖެ އިން ކުރަމުންދާ މަސައްކަތްތަކެވެ. ސަތޭކަ މިނިޓުގެ މި ފިލްމުގައި ރައީސުލްޖުމްހޫރިއްޔާ އާއި ސަރުކާރުގެ އިސްވެރިން 2009 ވަނަ އަހަރު ކޯޕަންހޭގަންގައި ބޭއްވުނު ތިމާވެއްޓާ ބެހޭ ޖަލްސާއަށް ވެވަޑައިގެންނެވި ތައްޔާރީތައް ވެސް ދައްކައިދެ އެވެ.
"ދަ އައިލެންޑް ޕްރެޒިޑެންޓް"ގެ ފުރަތަމަ ޝޯ ރައީސުލްޖުމްހޫރިއްޔާ ބައްލަވާލެއްވުމަށް ފަހު، އެމަނިކުފާނާއި ފިލްމުގެ ޑިރެކްޓާ ޖޯން ޝެންކްއާ ދެބޭފުޅުން، ސްޓޭޖަށް ވަޑައިގެން މި ފިލްމާ ބެހޭ ގޮތުން ވާހަކަފުޅު ދެއްކެވި އެވެ.
ރައީސުލްޖުމްހޫރިއްޔާގެ ވާހަކަފުޅުގައި، އެކްޗްއަލް ފިލްމްސްގެ އިސް ވެރިންނަށް ތައުރީފް ކުރައްވައި ޝުކުރުއަދާކުރެއްވި އެވެ. އަދި އެފިލްމުގައި ރައީސުލްޖުމްހޫރިއްޔާގެ ބައެއް މަސައްކަތްޕުޅުތަކާއި، ރާއްޖޭގެ ނާޒުކު ތިމާވެށްޓާ ބެހޭ ގޮތުން އަލިއަޅުވާލާފައިވާތީ އެކަން ރައީސުލްޖުމްހޫރިއްޔާ ހާއްސަ ގޮތެއްގައި ފާހަގަކުރެއްވި އެވެ.
މި ފިލްމް އުފެއްދުމަށް އެކްޗުއަލް ފިލްމްސުން ދެ މިލިއަނެއްހާ ޑޮލަރުވަނީ ހަރަދުކޮށްފައިވާ ކަމަށާއި ފިލްމަށް ދިވެހި ސަރުކާރުން އެއްވެސް ހަރަދެއް ކޮށްފައިނުވާ ކަމަށް ރައީސް އޮފީހުން ބުންޏެވެ.
މިފިލްމު ރާއްޖޭގައި އެޅުވުމަށް ހަމަޖެހިފައި ވަނީ މި އަހަރުގެ ފަހުކޮޅުގައި ކަމަށް ރައީސް އޮފީހުން ބުންޏެވެ. އަދި އެމެރިކާގެ ޓީވީ ޗެނަލްތަކުން މި ފިލްމު 2012 ވަނަ އަހަރު ދެއްކުމަށް ވަނީ ހަމަޖެހިފަ އެވެ.
ކެނެޑާގެ "ޓޮރޮންޓޯ އިންޓަނޭޝަނަލް ފިލްމް ފެސްޓިވަލް"ގައި އިފްތިތާހު ކުރުމަށް ރޭ ބޭއްވި ރަސްމިއްޔާތުގައި ރައީސުލް ޖުމްހޫރިއްޔާގެ ދެކަނބަލުންގެ އިތުރުން މިނިސްޓާ އޮފް ފޮރިން އެފެއާޒް އަހުމަދު ނަސީމާއި ރައީސުލް ޖުމްހޫރިއްޔާގެ އޮފީހުގެ ޗީފް އޮފް ސްޓާފް އަހުމަދު މައުސޫމާއި ޕްރެސް ސެކްރެޓެރީ މުހައްމަދު ޒުހައިރު ވެސް ބައިވެރިވެވަޑައިގެންނެވި އެވެ.
ރައީސުލްޖުމްހޫރިއްޔާގެ ދެކަނބަލުން، ޓޮރޮންޓޯއަށް މި ކުރެއްވި ދަތުރުފުޅު ނިންމަވާލެއްވުމަށްފަހު، ޕެރިހަށާއި ޖެނީވާއަށް ކުރައްވާ ދަތުރުފުޅު މިއަދު ފަށްޓަވާނެ ކަމަށް ރައީސް އޮފީހުން ބުންޏެވެ.