ރާއްޖޭގައި ހޭދަކުރި މުއްދަތުގައި ފެނުނީ ފުޓްސަލްއަށް މުޅި ގައުމު އޮތް ލޯބި ކަމަށާއި އެގޮތުގައި ދެމިތިބުމަށް ގައުމީ ކޯޗު އުޒްބެކިސްތާނުގެ ފާރޫކް ޒަކިރޯވް އެދިއްޖެއެވެ. އިއްޔެ ފުރުމުގެ ކުރިން "ސަން" އާއި ވާހަކަދައްކަމުން ގައުމީ ކޯޗު ބުނީ ދިވެހި ހުރިހާ ރައްޔިތުންގެ ފަރާތުންވެސް ފުޓްސަލްއަށް އޮތް ލޯތްބަކީ މި ކުޅިވަރު ރާއްޖޭގައި ފުޅާކުރެވިދާނެ ކަމެއްކަން އެނގިގެންދިޔަ ކަމަށެވެ. ފުރުމުގެ ކުރިން އެއާޕޯޓުގައި ޓީމުގެ ކުޅުންތެރިންނާއެކު ކޯޗު ފާރޫކް-- ފޮޓޯ: އެފްއޭއެމް އެހެންކަމުން ދެން އަމާޒު ހިފަންވީ އޭޝިއާ ބައްރުގެ ފުޓްސަލް މުބާރާތްތަކުގައި ނުވަތަ ކޮލިފައިން ބުރުގައި ރަނގަޅު ނަތީޖާތަކެއް ހޯދަންކަން ފާހަގަކޮށް ފާރޫކް ބުނީ ދިވެހިންގެ ހިތްހެޔޮކަމާއި ޓީމަށް ދިން ލޯބި ދުވަހަކުވެސް ހަނދާނުން ނުފިލާނެ ކަމަށެވެ. އަދި އެއީ އޭނާއަށްވެސް މިކަން ކުރުމަށް ލިބުނު ބޮޑު ހިތްވަރެއްގެ ގޮތުގައި ފާހަގަކުރިއެވެ. ރާއްޖޭގެ ގައުމީ ފުޓްސަލް ޓީމުގެ ކޯޗުކަމާ ފާރޫގް ހަވާލުވީ މިދިޔަ އަހަރުގެ ޑިސެމްބަރު މަހުގެ އެއްވަނަ ދުވަހުގައެވެ. ފުރުމުގެ ކުރިން ގައުމީ ކޯޗާއެކު ފުޓްސަލް ޓީމުގެ ކުޅުންތެރިންނާއި އޮފިޝަލުން، އަދި އެފްއޭއެމުގެ ބައެއް އިސްވެރިން-- ފޮޓޯ: އެފްއޭއެމް މަގާމާ ހަވާލުވެ ކުރު މުއްދަތެއްގެ ތެރޭގައި އޭނާ ވަނީ ރާއްޖޭގެ ގައުމީ ފުޓްސަލް ޓީމުގެ ކުޅުމުގެ ވައްޓަފާޅިއަށް ބަދަލުތަކެއް ގެނެސްފައެވެ. އެކަން ކުޅުންތެރިންވެސް ވަނީ ވަރަށް ބޮޑަށް ފާހަގަކޮށްފައެވެ. އެގޮތުން ފުޓްސަލްގެ ގަވާއިދުތަކާއި ޓެކްޓިކްސްއަށް ވަރަށް ބޮޑަށް ކޯޗު ވަނީ ބަލާފައެވެ. އެނބުރި ރާއްޖެ އަންނާނެތޯ "ސަން" އިން ސުވާލުކުރުމުގެ ކޯޗު އެކަމަށް ވަކި ޖަވާބެއް ނުދެއެވެ. އެހެންނަމަވެސް އެއީ ވިސްނާނެ ކަމެއްގެ ގޮތުގައި ކޯޗު ބުންޏެވެ. ރާއްޖެއިން ސަރަހައްދީ ރަން މެޑަލް ހޯދީ ކުޅުނު ހުރިހާ މެޗަކުންވެސް މޮޅުވެގެންނެވެ.