މިސްކިތްތަކުގެ ކަރަންޓު ބިލް ކުރާ ބޭންޑު ޑޮމެސްޓިކް ރޭޓަށް ބަދަލުކުރުމާ ގުޅިގެން ކައުންސިލްތަކުން ކުރާ ޚަރަދު މިހާރު ކުޑަވާނެ ކަމަށް މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ޠާރިޤް އިބްރާހިމް ވިދާޅުވެއްޖެއެވެ.
ވަޒީރު ޠާރިޤު މިހެން ވިދާޅުވީ ރައްޔިތުންގެ މަޖިލީހުގެ އެންވަޔަރަންމަންޓް އެންޑް ކްލައިމެޓް ޗޭންޖް ކޮމިޓީގައި ވާހަކަދައްކަވަމުންނެވެ.
ވަޒީރު ޠާރިޤު ވިދާޅުވި ގޮތުގައި، ކުރިން މިސްކިތްތަކަށް ބިލްކުރަމުން އައީ ސަރުކާރު އޮފީސްތަކަށް ޚާއްސަކޮށްފައި އޮންނަ އެންމެ މަތީ ބޭންޑުންނެވެ. މިހެންވުމުން ބިލްތައް ދެއްކުމަށް ކައުންސިލްތަކަށް ދަތިވި ކަމަށް އެމަނިކުފާނު ފާހަގަކުރެއްވިއެވެ. ނަމަވެސް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިސްނެންގެވުމުގެ މަތިން މިސްކިތްތަކަށް ކަރަންޓު ބިލް ކުރާ ބޭންޑް މިހާރު ކުޑަކޮށްފައިވާ ކަމަށާއި، މިއާއެކު ކައުންސިލްތަކުން މިސްކިތްތަކުގެ ކަރަންޓު ބިލަށް ކުރާ ޚަރަދު ކުޑަވެގެންދާނެ ކަމަށް ވަޒީރު ވިދާޅުވިއެވެ.
ކުޑަކުރެވުނު މި ފައިސާއިން ޔުޓިލިޓީ ކުންފުނިތަކަށް ސަރުކާރުން އަހަރެއްގެ މައްޗަށް 25.67 މިލިއަން ރުފިޔާ ސަބްސިޑައިޒް ކުރަމުންދާ ކަމަށް ވަޒީރު ޠާރިޤު ހާމަކުރެއްވިއެވެ. މީގެ އިތުރުން، މިސްކިތްތަކުގައި ސޯލާ ޕެނަލް ހަރުކުރުމަށްޓަކައި މައުލޫމާތު އެއްކުރަމުންދާ ކަމަށްވެސް ވަޒީރު ޠާރިޤު ވިދާޅުވިއެވެ.
ރާއްޖޭގެ މިސްކިތްތަކުގެ ކަރަންޓަށް ބިލް ކުރާ ބޭންޑް ޑޮމެސްޓިކް ބޭންޑަށް ބަދަލުކުރަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމެވީ މިދިޔަ ފެބްރުއަރީ މަހުގެ ތެރޭގައެވެ.