އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ ދަށުން މީހުން ދިރިއުޅޭ ރަށްތައް ކަނޑައެޅުމަށްޓަކައި އިދާރީ ގޮތުން އެއްކޮށްލާ ރަށްރަށުގެ ރައްޔިތުން އެކަމާ މެދު މެދު ދެކޭ ގޮތް ބެލުމަށް އަންނަ އޮކްޓޫބަރު 9 ގައި ފެންނަ ނުފެންނަ ވޯޓު ނަގާއިރު އެ ރަށްރަށުގެ ރައްޔިތުން ތިބޭނީ ހޭލުންތެރިވެފައި ކަމަށް ދެކެވަޑައިގަންނަވާ ކަމަށް ރައީސް އޮފީހުގެ ޕްރެސް ސެކްރެޓަރީ މުހައްމަދު ޒުހައިރު ވިދާޅުވެއްޖެ އެވެ.
މިދިޔަ ހަފުތާގައި "ހަވީރަ" ށް ދެއްވި އިންޓަވިއުއެއްގައި ޕްރެސް ސެކްރެޓަރީ ވިދާޅުވީ ސަރުކާރުން ކުރަން އުޅޭ ކަންތައްތައް ވަރަށް ރަނގަޅަށް ރައްޔިތުންނަށް އެނގޭނެ ކަމަށާއި އެއީ އެ މީހުން އަބަދުވެސް ވިސްނަމުންދާ ކަންތައްތަކެއް ކަމަށެވެ.
"ސަރުކާރުން ކުރަން މި އުޅެނީ ދެ ކަމެއް. އެއް ކަމަކީ މަދު އާބާދީތައް 1،000 އަށް މަތިކުރުން. މާނަ އަކީ 1،000 މީހުންގެ އާބާދީ ވާ ގޮތަށް އިދާރީ ގޮތުން ރަށްތައް އެއްކޮށްލުން. ދެވަނަ ކަމަކީ ހަތަރު ނޯޓިކަލް މޭލު ތެރޭގައި ހުރި ރަށްތައް އިދާރީ ގޮތުން އެއްކޮށްލުން. އަޅުގަނޑަކަށް ހިއެއް ނުވޭ މިއީ ރައްޔިތުންނަށް ނޭނގޭނެ ކަމެއް ހެން. މިކަންކަން މިހެން ކުރަންވާނެކަން ވަރަށް ރަނގަޅަށް ރައްޔިތުންނަށް މިހާރު އޮންނާނީ އެނގިފައި ކަމަށް ސަރުކާރުން ދެކެނީ،" ޒުހައިރު ވިދާޅުވި އެވެ.
އިދާރީ ގޮތުން މީހުން އެއްކޮށްލާ ރަށްތަކުގެ މީހުން ހޭލުންތެރިކުރުމަށް ސަރުކާރުން ކަންތައްތަކެއް ރާވާނެތޯ ދެންނެވުމުން އޭނާ ވިދާޅުވީ "ރައްޔިތުން ތިބީ ހޭލުންތެރިވެފައި" ކަމަށެވެ.
އިލެކްޝަންސް ކޮމިޝަންގެ ޑިރެކްޓަ ޖެނެރަލް އަހުމަދު ތޮލާލު މިދިޔަ ބުދަ ދުވަހު ވިދާޅުވީ އިދާރީ ގޮތުން ރަށްރަށް ހޭލުންތެރި ކުރުމަކީ އެ ކޮމިޝަންގެ ޒިންމާއެއް ނޫން ކަމަށާއި ސަރުކާރުން ކުރަންޖެހޭ ކަމެއް ކަމަށެވެ.
"އަޅުގަނޑުމެން ކޮމިޝަނުން މި ކުރާ ކަމަކީ މި ހިޔާލު ހޯދުމުގެ ވޯޓާ މެދު ރައްޔިތުން ހޭލުންތެރި ކުރުވުން. އެއީ ވޯޓުލާނެ ގޮތާއި ވޯޓު ބާތިލުވާނެ ގޮތާއި ރަޖިސްޓްރީ ކުރުމުގެ ކަންތައްތައް. އެ ކަންތައްތަކާ މެދު އަޅުގަނޑުމން ރައްޔިތުން ހޭލުންތެރި ކުރާނަން. މިހާރު ވެސް އެކަން ކުރަމުން މި ދަނީ،" ތޮލާލު ވިދާޅުވި އެވެ.
އިދާރީ ގޮތުން ރަށްތައް އެއްކޮށްލުމާ މެދު ރައްޔިތުން ތިބީ ހޭލުންތެރިވެފައި ކަމަށް ޕްރެސް ސެކްރެޓަރީ ވިދާޅުވި ނަމަވެސް އިދިކޮޅު ޑީއާރުޕީން ވަނީ ސަރުކާރުން ހޭލުންތެރިކުރުމުގެ ޕްރޮގްރާމް ކުރިއަށް ނުގެންދާތީ އެކަމަށް ވަރަށް ބޮޑަށް ފާޑު ކިޔައިފަ އެވެ.
"ޑިމޮކްރެސީގެ ރިވެތި އުސޫލަކީ ރައްޔިތުންގެ ބައިވެރިވުމާއެކު ކަންތައްތައް ނިންމުމާއި ތިރިން މައްޗަށް މަސައްކަތް ކުރުމުގެ އުސޫލު ކަމުގައި ވިޔަސް އިދާރީ ގޮތުން އެއްކޮށްލެވޭ ރަށްތައް ކަނޑައެޅުމުގައި އެ ރަށްރަށުގެ ރައްޔިތުންގެ ހިޔާލު އެއްވެސް ވަރަކަށް ނުހޯދާ މިހިސާބަށް ކުރިއަށް ގެންދިޔަ ކަމީ ސަރުކާރުން ލަދުގަންނަން ޖެހޭނެ ކަމެކެވެ. މިފަދަ ބޮޑެތި ބަދަލުތައް ގެނައުމަށް ރާވާއިރު އެ ރަށްރަށުގެ ރައްޔިތުންގެ ހިޔާލާއި މަޝްވަރާ ސަރުކާރުން އެއްވެސް ވަރަކަށް ނުހޯދަނީ ކީއްވެގެން ބާވަ އެވެ؟ ޑީއާރުޕީން އަބަދުވެސް ބުނަމުން މި ގެންދަނީ މިފަދަ ބަދަލެއް ގެނައުމަށް ރާވާއިރު ވެސް ރައްޔިތުންގެ މަޝްވަރާ އާއި ރުހުން ހޯދަން ޖެހޭނެ ކަމުގަ އެވެ. ގާނޫނުގައި ބަޔާންވެގެންވާ ގޮތަކީ ވެސް އެއީ އެވެ،" ޑީއާރުޕީގެ ލީޑަރު އަހުމަދު ތަސްމީންގެ ވެބްސައިޓްގައި ލިޔެފައިވާ ލިޔުމެއްގައިވެ އެވެ.
އެ ބަޔާނުގައި، އިދާރީ ގޮތުން އެއްކޮށްލުމަށް ބައެއް ރަށްރަށް ސަރުކާރުން ކަނޑައަޅާފައިވާ ގޮތަށް ވެސް ފާޑު ކިޔާފައިވެ އެވެ.
"ސަރުކާރުން ހުށަހަޅާފައިވާ ގޮތުން ޅ. ހިންނަވަރާއި ފެލިވަރު މިއީ އެއް އިދާރީ ދާއިރާގެ ގޮތުގައި ހަމަޖެހިގެންދާނެ އެވެ. ފެލިވަރަކީ މީހުން ދިރިއުޅޭ ރަށެއްގެ ގޮތުގައި ސަރުކާރުން ކަނޑައަޅާފައިވާ ރަށެއް ކަމުގައި ވީ ނަމަވެސް ފެލިވަރަކީ ރައްޔިތަކު އާބާދުވެ ދިރިއުޅެމުން ގެންދާ ރަށެއް ނޫނެވެ. މިހެން ކަމުން އިދާރީ ގޮތުން ގުޅާލުމަށް ނޭނގޭ ފެންނަ ނުފެންނަ ވޯޓެއްގައި ފެލިވަރުން ވޯޓުލާނީ ކޮން ބައެއް ހެއްޔެވެ؟ މި ހުށަހެޅުމަކީ މުޅި ޅ. އަތޮޅުގެ ރައްޔިތުންނަށް ސިނާއީ ގޮތުން މުހިންމު ރަށެއް ކަމަށްވާ ފެލިވަރު ހަމައެކަނި ހިންނަވަރުގެ ރައްޔިތުންނަށް ހަދިޔާކޮށް، އަތޮޅުގެ އެހެން ރައްޔިތުންގެ ކިބައިން ފެލިވަރުން މަންފާ ނިގުޅައި ގަތުމަށް ހަދާފައިވާ ޑީލެއް ނޫން ބާވަ އެވެ؟ ޔަގީނުން ވެސް ސުވާލު އުފެދެ އެވެ،" ތަސްމީންގެ ވެބްސައިޓްގައިވާ އެ ލިޔުމުގައިވެ އެވެ.