ހައްދުއްމަތީ ކުނަހަންދޫގައި ކަރަންޓު ފޯރުކޮށްދޭ  ޖަނަރޭޓަރުތަށް ހަލާކުވެ، ކަރަންޓު ކެނޑެމުން ދިއުމުގެ ސަބަބުން ގިނަ އަދަދެއްގެ ކަރަންޓު ސާމާނު ހަލާކުވަމުންދާކަމަށް އެރަށު ކައުންސިލުން ބުނެފިއެވެ.
 
އެމްބީސީ އަށްދެއްވި ބަސްދީގަތުމެއްގައި ކައުންސިލް މެންބަރު އަސްމާއު އަބޫބަކުރު ވިދާޅުވީ ކުނަހަންދޫގައި ކަރަންޓުގެ މައްސަލަ ދިމާވާތާ އަހަރެއްހާ ދުވަސް ވެފައިވާ ކަމަށާއި، މިހާރު ރަށަށް ކަރަންޓުގެ ޚިދުމަށް ދޭން ހުރި ޖަނަރޭޓަރ ތަކަކީ އާބާދީއަށް ބަލާއިރު ޚިދުމަތް ފޯރުކޮށްދިނުމަށް އެކަށީގެންވާ ޖަނަރޭޓަރ ތަކެއް ނޫން ކަމަށެވެ. މިހާރު އެރަށަށް ކަރަންޓުގެ ޚިދުމަތް ދެމުންދަނީ ދެ ޖަނަރޭޓަރ އެއްފަހަރާ ހިންގައިގެން ކަމަށާއި އަދި ބައެއްފަހަރު ދެޖަނަރޭޓަރުވެސް އޯވަރ ލޯޑް ވުމުގެ ސަބަބުން އެއްކޮށް ހުއްޓޭ ފަހަރުވެސް އަންނަ ކަމަށް އަސްމާއު ވިދާޅުވިއެވެ.
 
ހާހެއްހާ މީހުންގެ އާބާދީއެއް އޮންނަ ކުނަހަންދޫގައި ވޭތުވެދިޔަ އަހަރު ތަކުގައިވެސް ކަރަންޓުގެ ޚިދުމަތް ދިނުމުގައި މައްސަލަތައްވަނީ ކުރިމަތިވެފައެވެ. އަދި ކޮންމެ ދުވަހެއްގެ ވެސް ވަކި ވަޤުތެއްގައި ކަރަންޓުގެ ޚިދުމަތް މެދު ކަނޑާލަންޖޭ ކަމަށް މައުލޫމާތުލިބެއެވެ. މީގެ އިތުރުން އިލެކްޓްރިސިޓީ ޑިސްޓްރިބިއުޝަން ބޮކްސްތައް ނެތުމުގެ ސަބަބުން އަލަށް ދޫކުރާ ގޯތިތަކަށް ކަރަންޓުގެ ޚިދުމަތް ދެވޭނެގޮތެއް ނެތްކަމަށްކައުންސިލުން މައުލޫމާތުދެއެވެ. ކުނަހަންދޫއިން ވާހަކަދެއްކި ބައެއް އާންމުން ބުނީ ކަރަންޓު އެކި ގަޑިގަޑީގައި ކެންޑެމުން ދިއުމުގެ ސަބަބުން އާންމު ހާލަތު ބަދަލުވެ ދަތިތަކާ ކުރިމަތިލާން ޖެހިފައިވާކަމަށެވެ.
 
 
ފެނަކަ ކޯޕަރޭޝަނުން ބުނީ، ކުނަހަންދޫއަށް ދިމާވެފައިވާ ކަރަންޓުގެ މައްސަލަ ހައްލު ކުރުމަށް މަސައްކަތް ކުރަމުންދާ ކަމަށާއި، މި އަހަރުތެރޭގައި އެކޯޕަރޭޝަނުން ގަތުމަށް ބީލަމަށް ހުޅުވާލި ޖަނަރޭޓަރ ތަކުން 100 ކިލޯވޯޓުގެ ޖަނަރޭޓަރެއް ކުނަހަންދޫއަށް ފޯރުކޮށްދެވޭނެކަމަށެވެ. އަދި މި އަހަރުގެ އޭޕްރީލް މަހުގެ ތެރޭގައި ޖަނަރޭޓަރތަށް ލިބޭވަރު ވާނެކަމަށް އެކޯޕަރޭޝަނުންބުނެއެވެ.