ޕޮލިސް އިންޓެގްރިޓީ ކޮމިޝަން (ޕީއައިސީ) ގެ ރައީސް ޝަހިންދާ އިސްމާއީލް އިސްތިއުފާ ދެއްވާފައިވާތީ ހުސްވެފައިވާ އެ ކޮމިޝަންގެ މެންބަރު ކަމަށް ކުރިމަތިލުމުގެ ފުރުސަތު ރައީސް އޮފީހުން މިއަދު ހުޅުވާލައިފި އެވެ. އެ އޮފީހުން ސަރުކާރުގެ ގެޒެޓްގައި މިއަދު ޝާއިއުކޮށްފައިވާ އިއުލާނެއްގައިވާ ގޮތުން މި ފުރުސަތު ހުޅުވާލާފައިވަނީ މިއަދުން ފެށިގެން މި މަހުގެ 31 ވާ ބުދަ ދުވަހުގެ ނިޔަލަށެވެ. ފުލުހުންގެ ގާނޫނުގެ 21 ވަނަ މާއްދާގައި، ކޮމިޝަންގެ މެންބަރު ކަމަށް އައްޔަނުކުރާ މީހުންގެ ކިބައިގައި ފުރިހަމަވާންޖެހޭ ކަމަށް ބަޔާންކޮށްފައިވާ ޝަރުތުތައް ވެސް މިއަދު ގެޒެޓްކުރި އިއުލާންގައި ބަޔާންކޮށްފައިވެ އެވެ. ޕޮލިސް އިންޓެގްރިޓީ ކޮމިޝަންގެ މެންބަރު ކަމަށް ކުރިމަތިލުމަށް އެދޭ ފޯމާއި އިގްރާރު ދޫކުރުމާއި ފޯމާއި އިގްރާރު ބަލައިގަތުމަށް ހަމަޖެހިފައިވަނީ މިކަމަށް ކުރިމަތިލުމަށް ދީފައިވާ މުއްދަތުގައި ސަރުކާރު ބަންދު ނޫން ކޮންމެ ދުވަހަކު ހެނދުނު 00: 8 އިން މެންދުރުފަހު 00: 3 އަށް ރައީސް އޮފީހުންނެވެ. އަދި މި ފޯމާއި އިގްރާރު، ރައީސް އޮފީހުގެ ވެބްސައިޓުން ޑައުންލޯޑްކުރެވޭނެ ކަމަށް އެ އޮފީހުން ބުންޏެވެ.