މާލެއަށް މެދު ނުކެނޑި ރަނގަޅަށް ކަރަންޓް ދިނުމަށްޓަކައި އިތުރު އަށް މެގަވޮޓްގެ އިތުރު ޖަނަރޭޓަރެއް ބޭނުންވާކަމަށާއި އިންޖީން ލިބޭގޮތް ނުވާނަމަ މާލެއިން ކަރަންޓް ކެނޑޭނެ ކަމަށް ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން ބުނެފިއެވެ.
ސްޓެލްކޯއިން ހުޅުވާފައިވާ އޯވަރޑްރާފްޓް އެކެއްގެ މުއްދަތު ހަމަވުމާގުޅިގެން މުއްދަތު އިތުރު ކުރުމަށް ރައްޔިތުންގެ މަޖިލީހަށް ހުށަހެޅުމުން މަޖިލީހުގެ މާލިއްޔަތު ކޮމެޓީން މިއަދު މެންދުރުފަހު ބޭއްވި ބައްދަލުވުމަށް ވާހަކަ ދައްކަވަމުން ސްޓެލްކޯގެ މެނޭޖިންގ ޑައިރެކްޓަރު ވިދާޅުވީ 2009 ވަނަ އަހަރުން ފެށިގެން ހުޅުވާފައިވާ 50 މިލިއަން ރުފިޔާގެ އޯވާރޑްރާފްޓް މިހާރުވަނީ ހަމަވެފައި ކަމަށާއި ސްޓެލްކޯގެ ކަރަންޓްގެ ހިދްމަތް އިތުރަށް ފުޅާކުރުމަށް އޯވަރޑްރާފްޓްގެ މުއްދަތު އާކޮށްދެއްވުމުގެ ހުއްދައަށް މާލިއްޔަތު ކޮމެޓީގައި އެދޭ ކަމަށެވެ.
ސްޓެލްކޯއިން ބުނީ މާލޭގެ ކަރަންޓް ބޭނުން ކުރާ މިންވަރު ކޮންމެ މަހަކު 10 އާއި 15 އިން ސައްތައަށް އިތުރުވަމުން އަންނަ ކަމަށާއި އެއީ ހިދުމަތް ފުޅާކޮށް ރަންގަޅު ކުރަންޖެހޭ އެއްސަބަބު ކަމަށެވެ. އަދި ސްޓެލްކޯއަށް ސަރުކާރުގެ ބައެއް އޮފީސްތަކުންނާއި ބައެެއް މިނިވަން މުއައްސަސާތަކުން ބިލް ދައްކަމުން ނުދާތީ ފައިސާގެ ތާށިކަން ވަރަށް ބޮޑުކަމަށެވެ. އެގޮތުން ދައުލަތުގެ ފަރާތުން ސްޓެލްކޯއަށް 281 މިލިއަން ރުފިޔާ ދައްކަން އެބައޮތް ކަމަށްވެސް ސްޓެލްކޯއިން ބުނެއެވެ.
ސްޓެލްކޯއިން އެތަނުގެ ހިދްމަތްތައް އިތުރަށް ތަރައްގީކުރުމަށާއި ދިމާވެފައިވާ ދަތިތަކުގެ ވާހަކަ ދައްކަވަމުން މެނޭޖިންގ ޑިރެކްޓަރ ވިދާޅުވީ 50 މިލިއަން ރުފިޔާގެ އޯވަރޑްރާފްޓް އާކުރުމުގެ އިތުރުން މާލެއަށް ކަރަށް ދިނުމަށްޓަކައި އިތުރު 8 މެގަވޮޓް އިންޖީނެއް ގަންނަން ޖެހޭ ކަމަށާއި މާލޭގެ ޓްރާންސްމިޝަން އެންޑް ޑިސްޓްރިބިއުޝަން ވިއުގަ މިހާރު ވަނީ ވަރަށް ބޮޑަށް "ފުލް" ވެފައި ކަމަށެވެ. އެހެންކަމުން ޓްރާންސްމިޝަން އެންޑް ޑިސްޓްރިބިއުޝަން ވިއުގަ އިތުރަށް ފުޅާކުރުމާއި ހުޅުމާލެ ޕަވަރ ސިސްޓަމް އަޕްގްރޭޑް ކުރުމާއި މާލޭގައި އިތުރު 8 މެގަވޮޓްގެ ޖަނަރޭޓަރު ގާއިމުކޮށް ނިމޭއިރު އިތުރު ޖަނަރޭޓަރެއް ބަހައްޓާނެ ތަނެއް ނެތް ކަމަށެވެ.
މާލޭގައި އިތުރު ޖަނަރޭޓަރެއް ބަހައްޓާނެ ތަނެއް ނެތުމުން މާލެއާއި ހުޅުމާލެ އާދެމެދު ސަބްމެރިން ކޭބަލެއް އަޅައިގެން ކަރަންޓްގެ ވިއުގައަކުން ގުޅާލާ ވަރުގަދަ ކުރަން ޖެހޭކަމަށް ސްޓެލްކޯއިން ބުނެއެވެ. އަދި ސްޓެލްކޯއަށް ބޭރުން ގަންނަންޖެހޭ ސްޕެއާރޕާރޓްސްތަކާއި އެހެނިހެން އެއްޗެހި ގަތުމަށް ޑޮލަރު ބޭނުންވާ ކަމަށާއި އެކަންތައްތަކަށް މަހަކު ފަސް ލައްކަ ޑޮލަރު ބޭނުންވާ ކަމަށްވެސް ސްޓެލްކޯއިން ބުނެއެވެ.
އަތޮޅުތަކުގެ އިންޖީނުގެ ތަކުގެ ތެރެއިން ކ، އއ، އދ އަދި ވ ގައިވާ 18 ވަރަކަށް އިންޖީނުގެތަކަށް ކެޕިޓަލް ހަރަދުގެ ގޮތުގައި 12 މިލިއަން ރުފިޔާ ހަރަދުވެފައިވާތީ ސްޓެލްކޯއަށް ވަރަށް ބޮޑަށް ގެއްލުންވެފައިވާ ކަމަށާއި އެގޮތުން 2011 ވަނަ އަހަރު އެ އިންޖީނުގެތަކުން 17،881،316.00 ރުފިޔާ ގެއްލުން ވެފައިވާ ކަމަށާއި އަދި 2012 ވަނަ އަހަރު 26،579،190.00 ރުފިޔާ ގެއްލުންވެފައިވާ ކަމަށްވެސް ސެޓެލްކޯގެ މެނޭޖިން ޑައިރެކްޓަރު މިއަދު ކޮމެޓީގައި މައުލޫމާތު ހިއްސާކުރަމުން ވިދާޅުވިއެވެ.