މި މަހު ކަރަންޓު ބިލަށް ދިން ޑިސްކައުންޓްތަކާއެކުވެސް ބިލުތައް ބޮޑުވެގެން ދިޔަ އެއް ސަބަބަކީ ހޫނު މޫސުމާ ދިމާވުމުން ކަރަންޓު ބޭނުންކުރި މިންވަރު އިތުރުވުން ކަމުގައި ސްޓެލްކޯއިން ބުނެފިއެވެ.
ޑިސްކައުންޓާއެކުވެސް ކަރަންޓު ބިލުތައް ބޮޑުވެގެން ދިއުމާއެކު ގިނަ ބަޔަކު ވަނީ ސޯޝަލް މީޑިއާގައި ހިތްހަނަނުޖެހުން ފާޅުކޮށްފަ ސަރުކާރާއި ސްޓެލްކޯއަށްވެސް ވަރަށް ބޮޑަށް ފާޑުކިޔާފައެވެ. މިކަމާ ގުޅިގެން ސްޓެލްކޯއިން ބުނީ ކަރަންޓް ބިލްތައް ބޮޑުވީ ރޯދަ މަހާއި ހޫނު ދުވަސްވަރު ދިމާވުމުންކަމަށެވެ. ނަމަވެސް މިދިޔަ އަހަރުގެ ރޯދަ މަހަށްވުރެ މި އަހަރު ޕީކް ކުޑަވި ކަމަށް ސްޓެލްކޯއިން ވަނީ ފާހަގަކޮށްފައެވެ.
މީގެ އިތުރުން ސްޓެލްކޯގެ މީޑިއާ އޮފިޝަލް އަހުމަދު މުހައްމަދު ވިދާޅުވީ ރޯދަމަހުގެ ބިލްތަކުގައި ޑިސްކައުންޓު ހިމެނިފައިވަނީ މިދިޔަ އަހަރުގެ އެންމެ ހޫނު 3 މަސްދުވަސް، ފެބްރުއަރީ، މާޗް އަދި އެޕްރީލް އުނި ކުރުމަށްފަހު ބާކީ 9 މަސް ދުވަހުގެ އެވްރެޖެއް ހަދާ އެ އެވްރެޖަށް ވުރެ ބޮޑު ނުވާނެހެން ކަމަށެވެ. އަދި ކޮންމެ ރޯދަ މަހަކު ވެސް ކަރަންޓު ބޭނުންކުރާ މިންވަރު އިތުރު ވާނެ ކަމަށާއި، ހާއްސަކޮށް ހޫނު މޫސުމާއެކު ރޯދަ މަސް އައިސްފިނަމަ ބިލުތައް މީގެކުރިންވެސް ބޮޑުވެގެން ދާ ކަމަށް އަހުމަދު މުހައްމަދު ވިދާޅުވިއެވެ.