އިންޑިއާއާ މެދު ދިވެހި ރައްޔިތުންގެ ހިތްތަކުގައި ފިތުނަވެރިކަން އުފެއްދެވީ ކުރީގެ ރައީސް އަބްދުﷲ ޔާމީން އަބްދުލްޤައްޔޫމް ކަމަށާއި ނަމަވެސް އެ ތަޒުބާތުގައި ރައީސް ޑރ. މުހައްމަދު މުއިއްޒު ޖެހިވަޑައިގަންނަވަން ނުޖެހޭ ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ވިދާޅުވެއްޖެއެވެ.
ޖުމްހޫރީ ޕާޓީން މިއަދު ބޭއްވި ނޫސްވެރިންގެ ބައްދަލުވުމެއްގައި "ވަން"އިން ކުރި ސުވާލަކަށް ޖަވާބުދެއްވަމުން ގާސިމް ވިދާޅުވީ ޗައިނާގެ ދަތުރުފުޅަކަށްފަހު ނޫސްވެރިންނާ ރައީސް މުއިއްޒު ދެއްކެވި ބައެއް ވާހަކަފުޅުތައް ނިސްބަތްވަނީ އިންޑިއާއަށް ކަމަށާއި އެއީ އެމަނިކުފާނު ޖަޒުބާތުގައި ޖެހިވަޑައިގެންނެވީ ކަމަށެވެ.
"އިންޑިއާ އައުޓް ކިޔައިގެން މި ފިތުނަވެރިކަން އުފެއްދުމުގެ ނުކުތާ ޖައްސަވައި، އެކަން އެސްޓަބްލިޝް ކުރެއްވީ ރައީސް ޔާމީން. އެހެންވީމާ ޑރ. މުއިއްޒަށް ކީއްވެގެންތޯ، އެ ހަގީގަތް ވިދާޅު ނުވެވުނީ. ޑރ. މުއިއްޒު އޭގައި ޖެހިވަޑައިގަންނަވަނީ ޖަޒުބާތުގައި ހުންނަވައިގެން. އެހެން ހުންނަވާކަށް ނުޖެހޭ. އަޅުގަނޑުމެންގެ އަވަށްޓެރި ގައުމަކާ އަޅުގަނޑުމެން ޖެހޭކަށެއް ނުޖެހޭ،" އޭނާ ވިދާޅުވިއެވެ.
ގާސިމް ވިދާޅުވީ އިންޑިއާގެ ރައްޔިތުންނާއި ދިވެހި ރައްޔިތުންނާ މެދުގައި މި ހިތްހަމަނުޖެހުން އުފައްދަން ފުރަތަމަ ބިސްމި އެޅުއްވީ ޔާމީން ކަމަށާއި އިންޑިއާ އައުޓް ޖަހައި އަމިއްލަ މިލްކިއްޔާތަކަށް ހައްދަވައިގެން ވެސް އުޅުއްވީ ޔާމީން ކަމަށެވެ. އަދި ކުރީގެ ރައީސް އިބްރާހިމް މުހައްމަދު ސޯލިހު ވެސް އެކަމުގައި ގޯސްތަކެއް ހެއްދެވި ކަމަށް ވިދާޅުވިއެވެ.
"ޔާމީން އެ ހަމަނުޖެހުން އުފެއްދުމަށްޓަކައި ރާއްޖޭގެ ރައްޔިތުންނާއި އިންޑިއާގެ ރައްޔިތުން ފިތުނަވެރިކަން އުފެއްދުމަށްޓަކައި އެ ވާހަކަ ދައްކައި، އިންޑިއާ އައުޓް ޖަހައިގެން އެ ވާހަކަ ދެއްކީ. އޭރު އެކަން ކުރަން ލިމިޓެއް ނެތި ދޫކޮށްލައިގެން ހުރީ އޭރުގެ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު. އެއީ ވެސް ކޮށްގެންވާނެ ކަމެއް ނޫން. ހާއްސަކޮށް އަވަށްޓެރިންނާ ޖެހި، އެ ބާވަތުގެ ވާހަކަތައް ދައްކާ އިރު، ދައުލަތުގެ ވާޖިބާއި ޒިންމާ އުފުލަން ޖެހޭނެ. އެކަން އެސްޓަބްލިޝްވެ ނިމުނު ފަހުން އަޅުގަނޑުމެންގެ އޭރުގެ ރައީސް އިބްރާހިމް މުހައްމަދު ސޯލިހު ފިޔަވަޅު އެޅުއްވީ، ގަރާރަކުން މަނާކުރެއްވީ،" އޭނާ ވިދާޅުވިއެވެ.
ގާސިމް އިތުރަށް ވިދާޅުވީ ރައީސް ސޯލިހު ނެރުއްވި ގަރާރު ބާތިލުކުރުމަށް ޔާމީން ގޮވައިލެއްވި ނަމަވެސް، ރައީސް މުއިއްޒު އެކަން ކުރައްވައިގެން ނުވާނެ ކަމަށެވެ. އަދި އިންޑިއާއާ ގުޅޭގޮތުން ރައީސް މުއިއްޒު ދެއްކެވި ވާހަކަފުޅުތަކަށް ރަސްމީކޮށް އިންޑިއާ ސަރުކާރާއި ބޮޑުވަޒީރު ނަރެންދްރަ މޯދީގެ އަރިހުން މައާފަށް އެދިވަޑައިގަންނެވުމަށް ވެސް ގާސިމް އިލްތިމާސްކުރެއްވިއެވެ.