މިދިޔަ މަހުގެ 26، ގައި ރާއްޖެ ޓީވީން ގެނެސްދިން "ދިވެހިން ހަމަ ފުނޑިއްޖެއޭ، މިވަރުން ދެން ފުނޑިއްޖެއޭ،" ލަވަ, ހަބަރާއި ކަރަންޓު އެފެއާޒް ބްރޯޑްކާސްޓް ކުރުމުގެ އުސޫލާ ހިލާފު ކަމަށް ނިންމައި، ލިޔުމުން ޖަވާބުދާރީވާން އެ ޓީވީއަށް ބްރޯޑްކާސްޓިން ކޮމިޝަން (ބްރޯޑްކޮމް) އިން އަންގައިފި އެވެ.
ކޮމިޝަނުން ބުނަނީ އެ މައްސަލަ ތަހުގީގު ކުރަމުންދިޔައިރު، ހަބަރާއި ކަރަންޓު އެފެއާޒް ގެނެސްދިނުމުގައި ވަކި ފަރާތަކަށް ބުރަ ނުވާން ބުނެފައި އޮންނަ ކޯޑް އޮފް ޕްރެކްޓިސްގެ މާއްދާއާ "ހިލާފު ކަމަށް ފާހަގަ ކުރެވިފައިވާ" ކަމަށެވެ.
ކަމެއް ހިނގި ގޮތް ސާބިތުނުވާ ހާލަތުގައި މުއުތަބަރު ފަރާތަކާ ހަވާލާދީ ހަބަރު ގެނެސްދޭން ބުނެފައި އޮންނަ މާއްދާއާ އެ ލަވައިގެ ބައެއް ބައިތައް "ހިލާފު ކަމަށް ބެލެވޭ" ކަމަށް ވެސް ކޮމިޝަނުން ބުނެފައިވެ އެވެ.
ރާއްޖެ ޓީވީއިން ގެނެސްދިން ލަވަ ގެނެސްދީފައި ވަނީ ހަބަރެއް ނުވަތަ އެފަދަ ކޮންޓެއްގެ ގޮތުގައި ނޫނެވެ. އެހެންކަމުން ހަބަރެއްގެ މިންގަނޑަށް ލަވަ ފައްތައިގެން ތަހުގީގު ކުރަމުންދާ ސަބަބެއް ކޮމިޝަނުން ނުބުނެ އެވެ.
ބްރޯޑްކާސްޓިން ކޮމިޝަނުން ރާއްޖެ ޓީވީއަށް އަންގާފައި ވަނީ ފެބްރުއަރީ 24، ގެ މެންދުރު 2:00 ޖެހުމުގެ ކުރިން ޖަވާބުދާރީވުމަށެވެ. ރާއްޖެ ޓީވީއިން މައްސަލައިގައި ހަވާބުދާރީނުވެއްޖެ ނަމަ "ލިބިފައިވާ ލިޔެކިޔުންތަކުގެ" މައްޗަށް ބިނާކޮށް މައްސަލަ ނިންމާނެ ކަމަށް ވެސް ކޮމިޝަނުން ބުނެ އެވެ.
ރާއްޖެޓީވީން ގެނެސްދިން ލަވައިގެ ޅެން ހެދީ އާމިރު ސަލީމް އެވެ. އެ ލަވައިގައި މައިގަނޑު ގޮތެއްގައި ފާޑުކިޔާފައި ހުރީ ރައްޔިތުންނަށް މި ސަރުކާރުން ނުކޮށްދީ ދިގުލައިގެންދާ ކަންކަމަށެވެ.
އެގޮތުން މިިދިޔަ ސަރުކާރުން މާލެ ރައްޔިތުންނަށް ދޫކުރި ފްލެޓާއި ގޯތިތައް ހަވާލު ކުރުން ލަސްވަމުންދާ މައްސަލަ އާއި މާލޭގައި ފެންބޮޑުވާ މައްސަލަ އިތުރަށް ގޯސްވުމުގެ އިތުރުން ރައްޔިތުން ހާލުގައި ތިއްބައި ރައީސުލްޖުމްހޫރިއްޔާ ރާއްޖެއިން ބޭރަށް ގިނަ އަދަދެއްގެ ދަތުރު ކުރެއްވި ވާހަކައަށް އެ ލަވައިގައި ފާޑުކިޔާފައިވެ އެވެ.