އީރާނުގެ ހަކަތަ އުފައްދާ މަރުކަޒުތަކަށް ދޭން ރާވާފައިވާ ހަމަލާތައް ފަސްކުރުމަށް ނިންމަވައި، އީރާނާ އެކު ވަރަށް ރަނގަޅު އަދި ނަތީޖާ ނެރެވޭނެ ފަދަ މަޝްވަރާތަކެއް ކުރިއަށްދާ ކަމަށް އެމެރިކާގެ ރައީސް ޑޮނަލްޑް ޓްރަމްޕް އިއްޔެ ވިދާޅުވެފައިވިޔަސް، އެމެރިކާއާ އެކު އެފަދަ އެއްވެސް މަޝްވަރާއެއް ކުރަމުން ނުދާ ކަމަށް އީރާނުން ބުނެފި އެވެ.
މެދުއިރުމަތީގައި އުފެދިފައިވާ ހަމަނުޖެހުންތަކަށް ދާއިމީ އަދި ފުރިހަމަ ހައްލެއް ހޯދުމަށް މަޝްވަރާ ކުރަމުންދާކަން ފާހަގަކުރައްވައި ޓްރަމްޕް ވިދާޅުވީ، "އަޅުގަނޑުމެން މިދަނީ ވަރަށް ވަރުގަދަ މަޝްވަރާތަކެއް ކުރަމުން... މިއީ ހުރިހާ ފަރާތްތަކަށް ވެސް ފައިދާހުރި އެއްބަސްވުމަކަށް ވެގެންދާނެ ކަމަށް އުންމީދުކުރަން،" ކަމަށެވެ.
ނަމަވެސް، އީރާނުގެ މަޖިލީހުގެ ރައީސް މުހައްމަދު ބާގިރު ގާލީބާފް ވަނީ އެކަން ދޮގުކުރައްވާފަ އެވެ.
"އެމެރިކާއާ އެކު އެއްވެސް މަޝްވަރާއެއް ކުރިއަކަށް ނުދޭ. މިއީ މާލީ ބާޒާރާއި ތެލުގެ ބާޒާރަށް ނުފޫޒު ފޯރުވުމަށް ފަތުރަމުންދާ ދޮގު ހަބަރުތަކެއް،" އޭނާ ވިދާޅުވި އެވެ.
މީގެ އިތުރުން، އީރާނުގެ ރިވޮލިއުޝަނަރީ ގާޑްސްއިން ވެސް ވަނީ ޓްރަމްޕްގެ ވާހަކަތަކަކީ "ނަފްސާނީ ހަނގުރާމައެއްގެ" ބައެއްގެ ގޮތުގައި ސިފަކޮށްފަ އެވެ. އަދި އިޒްރޭލުގެ ރަށްތަކަށާއި ސަރަހައްދުގައި ހުރި އެމެރިކާގެ އަމާޒުތަކަށް ދެމުންދާ ހަމަލާތައް ހުއްޓުމެއް ނެތި ކުރިއަށްދާނެ ކަމުގެ ޔަގީންކަން އެ ފަރާތުން ވަނީ ދީފަ އެވެ.
އީރާނުން ސީދާ މަޝްވަރާތަކެއް ކުރަމުން ނުދާ ކަމަށް ބުނި ނަމަވެސް، މިސްރާއި ޕާކިސްތާނާ އަދި ގަލްފުގެ ގައުމުތައް މެދުވެރިވެގެން މެސެޖުތައް ބަދަލުކުރަމުންދާ ކަމަށް ރިޕޯޓުތައް ބުނެ އެވެ. އަދި ކުރިއަށް އޮތް ތަނުގައި ޕާކިސްތާނުގެ އިސްލާމްއާބާދުގައި މިފަދަ މަޝްވަރާތަކެއް ހިނގައިފާނެ ކަމަށް ވެސް ބެލެވެ އެވެ.
ދެ ފަރާތުގެ ބަހުގެ ހަމަލާތައް މިގޮތަށް ހުރިއިރު، ހަނގުރާމައަށް މިހާރު ވަނީ ހަތަރު ހަފުތާ ވެފަ އެވެ. މި ހަނގުރާމައިގައި މިހާތަނަށް 2،000އަށް ވުރެ ގިނަ މީހުން މަރުވެފައިވާއިރު، ހޮރްމޫޒް ކަނޑުއޮޅި ބަންދުވުމުގެ ސަބަބުން ދުނިޔޭގެ ހަކަތަ ފޯރުކޮށްދިނުމުގެ ނިޒާމަށް ވަނީ ބޮޑެތި ބުރޫތަކެއް އަރާފަ އެވެ.
އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ވިދާޅުވީ އަސްކަރީ ހަރަކާތްތައް ހުއްޓުމެއްނެތި ކުރިއަށްދާނެ ކަމަށެވެ. ނަމަވެސް، މިހާތަނަށް ލިބިފައިވާ ކާމިޔާބީތަކުގެ އެހީގައި، އިޒްރޭލުގެ މަސްލަހަތުތައް ހިމާޔަތްކުރެވޭނެ ފަދަ ސުލްހަވެރި ހައްލަކަށް ދިއުމުގެ ފުރުސަތު އޮތްކަން އޭނާ ފާހަގަކުރެއްވި އެވެ.