އެެމެރިކާ އަދި އިޒްރޭލުން އީރާނާ ދެކޮޅަށް ކުރަމުންދާ ހަނގުރާމައިގައި ބައިވެރިވުމަށް ސައުދީ އަރަބިއްޔާ އަދި ޔޫއޭއީން ފިޔަވަޅުތަކެއް އަޅަން ފަށާފައިވާ ކަމަށް ވޯލް ސްޓްރީޓް ޖާނަލް ނޫހުން މިއަދު ބުނެފި އެވެ.
އެ ރިޕޯޓުގައިވާ ގޮތުން، ގަލްފުގެ ގައުމުތަކުގެ ސަރަހައްދުތަކަށާއި ހަކަތަ އުފައްދާ މަރުކަޒުތަކަށް މެދުނުކެނޑި ދެމުންދާ ހަމަލާތަކުގެ ސަބަބުން، އެ ހަމަލާތަކަށް ރައްދު ދިނުމަށް އެމެރިކާގެ ބައިވެރިންނަށް ވަނީ މަޖުބޫރުވެފަ އެވެ.
މިގޮތުން، ސައުދީ އަރަބިއްޔާގެ ކިންގް ފަހުދު އެއާބޭސް ބޭނުންކުރުމުގެ ހުއްދަ އެމެރިކާގެ ސިފައިންނަށް މިހާރު ވަނީ ދީފަ އެވެ. މިއީ މީގެ ކުރިން އެ ގައުމުން ގެންގުޅުނު ވަކި ފަރާތަކަށް ނުޖެހުމުގެ ސިޔާސަތަށް އައި ބޮޑު ބަދަލެކެވެ.
ސައުދީ ހާރިޖީ ވަޒީރު ފައިސަލް ބިން ފަރްހާން ވިދާޅުވި ގޮތުގައި، އީރާނުގެ ހަމަލާތަކަށް ސައުދީން ކެތްކުރާނެ ވަކި މިންވަރެއް އޮވެ އެވެ. އަދި ގަލްފުގެ ގައުމުތަކަކީ ރައްދު ދިނުމުގެ ގާބިލުކަން ނެތް ބައެއް ކަމަށް ހީކުރުމަކީ ހެދޭ ވަރަށް ބޮޑު ގޯހެކެވެ.
ޔޫއޭއީ ވެސް ވަނީ އީރާނާ ގުޅުންހުރި މުއައްސަސާތަކާ ދެކޮޅަށް ފިޔަވަޅުތަކެއް އަޅަން ފަށާފަ އެވެ. އެގޮތުން، އީރާނުގެ ސަރުކާރާ ސީދާ ގުޅުންހުރި އިދާރާތައް ބަންދުކޮށް، މާލީ ގޮތުން އިތުރު ދަތިކުރުމުގެ ފިޔަވަޅުތައް އަޅާނެކަމުގެ އިންޒާރު ވަނީ ދީފަ އެވެ.
ގަލްފުގެ ގައުމުތަކުން އަދި ސީދާ އަސްކަރީ ހަރަކާތްތަކުގައި ބައިވެރިވާން ނިންމާފައި ނުވި ނަމަވެސް، އެ ނިންމުން ނިންމުމާ ވަރަށް ގާތްވެފައިވާ ކަމަށް މަސްދަރުތަކުން ބުނެ އެވެ. ބައެއް ރިޕޯޓްތައް ބުނާ ގޮތުން، ސައުދީ އަރަބިއްޔާ މި ހަނގުރާމައިގެ ތެރެއަށް ވަނުމަކީ މިހާރު ހަމައެކަނި ވަގުތުގެ މައްސަލައެކެވެ.
މި ބަދަލުތައް އަންނަން ފަށާފައިވަނީ، އީރާނުން ސަރަހައްދުގެ އެކި ތަންތަނަށް މިސައިލާއި ޑްރޯން ހަމަލާތައް ދެމުންދާ ދަނޑިވަޅެއްގަ އެވެ. ހާއްސަކޮށް ހަކަތަ އުފައްދާ ވަސީލަތްތަކަށް އަމާޒުކޮށްދޭ ހަމަލާތައް ވަނީ އިތުރުވެފަ އެވެ. ރިޕޯޓްތައް ބުނާ ގޮތުން، ހަމައެކަނި ޔޫއޭއީއަށް ވެސް 2,000އަށް ވުރެ ގިނަ ހަމަލާ ވަނީ ކުރިމަތިވެފަ އެވެ.
މީގެ އިތުރުން، ހޮރްމޫޒް ކަނޑުއޮޅީގެ ކޮންޓްރޯލް އަތުލައި އެތަނުން ދަތުރުކުރާ އުޅަނދުތަކުން ފީ ނެގުމަށް އީރާނުން އުޅޭކަމުގެ ނިޝާންތައް ފެންނަން އޮތުމުން، ސަރަހައްދީ ނުފޫޒާ މެދު އޮތް ކަންބޮޑުވުންތައް ވަނީ އިތުރުވެފަ އެވެ.
ތަޖުރިބާކާރުން ބުނާ ގޮތުގައި، ގަލްފުގެ ގައުމުތަކުން ސީދާ ހަނގުރާމައެއްގެ ތެރެއަށް ވަންނަން ބޭނުން ނުވި ނަމަވެސް، މަޑުމަޑުން އެ ގައުމުތައް މި މައްސަލައިގެ ތެރެއަށް ދަނީ ވަންނަމުންނެވެ.
މި ހަމަނުޖެހުމުގެ ސަބަބުން ސަރަހައްދީ މަޝްރަހު ގޯސްވެ، ދުނިޔޭގެ ހަކަތައިގެ ބާޒާރަށް ވެސް ވަނީ އޭގެ ނޭދެވޭ އަސަރު ކުރަން ފަށާފަ އެވެ. މީގެ ސަބަބުން ގަލްފުގެ ގައުމުތަކަށް ވަނީ އަމިއްލަ ސަލާމަތާއި ރައްކާތެރިކަން ކަށަވަރުކުރުމާއި ހަނގުރާމަ ފުޅާވެގެން ދިއުމުން ކުރިމަތިވެދާނެ ނުރައްކާތަކާ ދެމެދު ބޮޑު ގޮންޖެހުމަކާ ކުރިމަތިލާން ޖެހިފަ އެވެ.