އެމެރިކާ، އިޒްރޭލު އަދި އީރާނާ ދެމެދު ހިނގަމުންދާ ހަނގުރާމަ ހުއްޓުވުމަށްޓަކައި މުހިންމު މެދުވެރިއެއްގެ ދައުރު އަދާކުރުމަށް ޕާކިސްތާނުން އިސްނަގައިފި އެވެ.
މިގޮތުން، މި ހަފުތާގެ ކުރީކޮޅު މަޝްވަރާތައް ބޭއްވުމަށްޓަކައި ޕާކިސްތާނުގެ ވެރިރަށް އިސްލާމްއާބާދު ހަމަޖެއްސުމަށް އެ ގައުމުގެ އޮފިޝަލުން ވަނީ ހުށަހަޅުއްވާފަ އެވެ.
މި މަސައްކަތުގެ ދަށުން ޕާކިސްތާނުގެ އިސްވެރިން ވަނީ ދެ ފަރާތާ އެކު މަޝްވަރާ ކުރައްވާފަ އެވެ. އެގޮތުން، ޕާކިސްތާނުގެ ސިފައިންގެ ވެރިޔާ އާސިމް މުނީރު، އެމެރިކާގެ ރައީސް ޑޮނަލްޑް ޓްރަމްޕާ ވާހަކަދައްކަވާފައިވާއިރު، ބޮޑުވަޒީރު ޝެހްބާޒް ޝަރީފް ވަނީ އީރާނުގެ ރައީސް މަސްއޫދު ޕެޒެޝްކިއާނާ މަޝްވަރާ ކުރައްވާފަ އެވެ. ޕާކިސްތާނުން ބުނެފައިވަނީ ސަރަހައްދީ ސުލްހަ ގާއިމުކުރުމަށްޓަކައި ބިނާކުރަނިވި ދައުރެއް އަދާކުރުމުގައި އެ ގައުމު ދެމިއޮންނާނެ ކަމަށެވެ.
މި ޑިޕްލޮމެޓިކް މަސައްކަތްތައް ފެށިފައި މިވަނީ، ހަނގުރާމަ މުޅިން ހުއްޓާލުމަށް އަމާޒުކޮށްގެން ބޭއްވުނު "ވަރަށް ރަނގަޅު އަދި ނަތީޖާ ނެރެވޭނެ" މަޝްވަރާތަކަކަށް ފަހު، އީރާނުގެ ކަރަންޓު އުފައްދާ މަރުކަޒުތަކަށް ދޭން ރޭވި ހަމަލާތައް ޓްރަމްޕް އިއްޔެ ފަސްކުރެއްވުމާ ގުޅިގެންނެވެ.
ނަމަވެސް، އީރާނުން ވަނީ ވޮޝިންޓަނާ އެކު ސީދާ މަޝްވަރާ ކުރަމުންދާ ކަމަށް ބުނާ ވާހަކަތައް ދޮގުކޮށްފަ އެވެ. އީރާނުގެ ހާރިޖީ ވުޒާރާގެ ތަރުޖަމާނު އިސްމާއީލް ބަގާއީ ވިދާޅުވި ގޮތުގައި، މެދުވެރިން މެދުވެރިކޮށް މެސެޖުތައް ލިބިފައިވާ ކަމަށާއި އެ ގައުމުގެ އަސާސީ އުސޫލުތަކާ އެއްގޮތްވާ ގޮތުގެ މަތިން އެކަށީގެންވާ ޖަވާބު ދީފައިވާ ކަމަށެވެ.
އޮފިޝަލުން ހާމަކުރި ގޮތުގައި، މި މަޝްވަރާތަކުގައި ތުރުކީ، މިސްރު އަދި ގަލްފުގެ ގައުމުތައް ވެސް މެދުވެރިއެއްގެ ގޮތުން ބައިވެރިވަމުންދެ އެވެ. ނަމަވެސް، މި މަސައްކަތްތައް އަދި އޮތީ ވަރަށް ކުރީގެ މަރުހަލާއެއްގަ އެވެ.
ތަޖުރިބާކާރުން ގަބޫލުކުރާ ގޮތުގައި، މިކަމުން އަވަސް ހައްލެއް ފެނުމަކީ ނާދިރު ކަމެކެވެ. ޗެތަމް ހައުސްގެ ސަނަމް ވަކީލް ވިދާޅުވި ގޮތުގައި، މިއީ ހަނގުރާމަ ނިމުމަކަށް އަންނާނެ ކަމުގެ ނިޝާނެއް ކަމަށް ބަލަން އަދި މާ އަވަހެވެ. އަދި ދެ ފަރާތުން ވެސް ދޫދިނުމުގެ ރޫހެއް މިވަގުތު ނެތް ކަމަށް އޭނާ ފާހަގަކުރެއްވި އެވެ.
ހަތަރުވަނަ ހަފުތާއަކަށް ދެމިގެން ގޮސްފައިވާ މި ހަނގުރާމައިގެ ސަބަބުން ދުނިޔޭގެ ހަކަތައިގެ ބާޒާރަށް ދަނީ ނޭދެވޭ އަސަރުތަކެއް ކުރަމުންނެވެ. ވަކިން ހާއްސަކޮށް، ތެލާއި ގޭސް އުފުލާ މުހިންމު މަގު ކަމަށްވާ ހޮރްމޫޒް ކަނޑުއޮޅީގެ ނުތަނަވަސްކަން މިވަގުތު ވަނީ ވަރަށް ބޮޑުވެފަ އެވެ.