ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގެ އިތުރުބުރުގައި، ވެރިކަންކުރާ ޕީއެންސީން 3 ގޮނޑި ކާމިޔާބުކޮށްފިއެވެ.
މި ބުރުގެ ނަތީޖާ ދައްކާގޮތުން ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގެ އިތުރު ބުރުގެ 5 ގޮނޑީގެ ތެރެއިން 3 ގޮނޑި ޕީއެންސީން ވަނީ ކާމިޔާބުކޮށްފައެވެ.
ޕީއެންސީން ކާމިޔާބުކުރީ ހއ.ކެލާ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ރައީސްގެ މަޤާމާއި، ހދ.ނޭކުރެންދޫ އަދި ލ. މާވަށް އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެންބަރުގެ ގޮނޑިއެވެ.
ހއ. ކެލާ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެމްބަރުކަމަށް ހޮވިފައިވަނީ، ހައްވާ ފަޒްނާއެވެ. ނޭކުރެންދޫ އ.ތ.މ ކޮމިޓީގެ މެމްބަރުކަމުގެ މަޤާމަށް ހޮވިފައިވަނީ ފާތިމަތު ރިއުޒާއެވެ. އަދި މާވަށު ކޮމިޓީގެ މެންބަރުގެ މަޤާމަށް ހޮވިފައިވަނީ ފާތިމަތު ޝާފިޔާއެވެ.
މީގެއިތުރުން، ލޯކަލް ކައުންސިލް އިންތިޚާބުގެ މިބުރުގައި ފުވައްމުލައް ސިޓީ ދަޑިމަގު ދާއިރާގެ މެންބަރުގެ ގޮނޑިއަށް ހޮވިފައިވަނީ އަމިއްލަގޮތުން ވާދަކުރި ޝީޒާ އިބްރާހީމެވެ. ބ. ދޮންފަނު ކައުންސިލްގެ އަންހެނުންނަށް ޚާއްސަކޮށްފައިވާ ގޮނޑިއަށް ހޮވިފައިވަނީ، އެމްޑީޕީގެ ކެންޑިޑޭޓް އައިމިނަތު ރަފާޙްއެވެ.
މިއަދު ބޭއްވި އިންތިޚާބުގައި ވޯޓުލުމުގެ ހައްޤު ލިބިފައިވާ މީހުންގެ ތެރެއިން %72 މީހުންވަނީ ވޯޓުލާފައެވެ. ވޯޓު ފޮށިތައް ބަންދުކުރުމާހަމައަށް އިލެކްޝަންސްކޮމިޝަނަށް އެއްވެސް ޝަކުވާއެއް ހުށަހަޅާފައިނުވާކަމަށް އެ ކޮމިޝަނުން ވިދާޅުވެއެވެ.
އަދި އެހެން ބައި އިލެކްޝަންތަކާ ޚިލާފަށް މިފަހަރުގެ މި އިންތިޚާބަށް އާންމުންގެ ފަރާތުން ބޮޑުތަރުޙީބެއްލިބިފައިވާކަމަށްވެސް އިލެކްޝަންސް ކޮމިޝަނުން ވިދާޅުވެއެވެ.