ވ. އަތޮޅު ފުލިދޫ އަތިރިމަތިން ބޮޑު ސަރަހައްދެއް ގިރާލައި ދިރާގު ޓަވަރަށް ކަރަންޓް ދޭ ކޭބަލް މޫދުގައި އޮތުމުގެ ސަބަބުން އެ ސަރަޙައްދުން ކަރަންޓް ކަނޑާލުމަށް އެ ރަށު ކައުންސިލުން ނިންމައިފިއެވެ. ފުލިދޫ ކައުންސިލްގެ ރައީސް މޫސާ ފާއިޒު ވިދާޅުވީ އެ ރަށުގެ އިރުމަތީ ފަރާތުން ތިންސަތޭކަ ފަންސާސް ފޫޓު ގިރާލާފައި ވާކަމަށާއި، އެ ރަށުގައި ހުންނަ ދިރާގު ޓަވަރަށް ކަރަންޓް ދޭ ކޭބަލް ވެސް މިހާރު އޮތީ މޫދުގައި ކަމަށެވެ. އެ ސަރަޙައްދަކީ އެ ރަށުގެ ގިނަ ބަޔަކު މޫދަށް އެރުމާއި ފުޓްބޯޅަ ކުޅުން ފަދަ ކަންކަމުގައި ގޮސް އުޅޭ ސަރަހައްދަކަށް ވާތީ ޢާންމުންނަށް ލިބިދާނެ ގެއްލުމަކުން ސަލާމަތް ކުރުމަށް މި މަހުގެ އަށާރަ ވަނަ ދުވަހުން ފެށިގެން އެ ސަރަޙައްދުގެ ކަރަންޓް ކަނޑާލަން ކައުންސިލްގެ ޖަލްސާ އިން ނިންމާފައި ވާ ކަމަށް ކައުންސިލްގެ ރައީސް ވިދާޅުވިއެވެ. ދެހާސް ހަތަރުވަނަ އަހަރުން ފެށިގެން ރަށް ގިރައި، ރުއްތަކާއި ގަސްތަކުގެ އިތުރުން އަތިރިމަތީގައި ހަދާފައި ހުރި ފަތުރުވެރިންނަށް ޚާއްޞަ ތަންތަނާއި ޖޯލިފަތިތައް ވެސް ގިރާލައިގެން ގޮސްފައިވާ ކަމަށާއި، ރަށް ގިރުމުގެ މައްސަލަ އަށް ޙައްލެއް ހޯދައި ދިނުމަށް ސަރުކާރުގެ ކަމާބެހޭ ފަރާތް ތަކުގައި ތަކުރާރުކޮށް އެދިފައިވާ ކަމަށް ފުލިދޫ ކައުންސިލުން ވަނީ ބުނެފައެވެ. އެހެން ނަމަވެސް މިއަދާ ހަމައަށް ވެސް ކައުންސިލުން މިކަމަށް އެދި ފޮނުވި ސިޓީތަކުގެ ޖަވާބެއް ވެސް ކަމާބެހޭ އެއްވެސް ފަރާތަކުން ލިބިފައި ނުވާ ކަމަށް ވެސް އެރަށު ކައުންސިލުން ބުނެފައި ވެއެވެ. ވ ފުލިދުއަށް ރަށް ގިރުމުގެ މައްސަލަ ދިމާވާން ފެށީ ދެހާސް ހަތަރުވަނަ އަހަރުގެ ސުނާމީއަށް ފަހުގައެވެ.