ރޭ މެންދަމު މާލެއިން ކަރަންޓު ކެނޑުނީ މާލޭގެ ކަރަންޓު ވިއުގައަށް ދިމާވި މައްސަލައަކާއި ގުޅިގެން ކަމަށް ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ބުނެފިއެވެ.
ރޭ މެންދަމު 03:15 ގައި މާލޭގެ ބޮޑު ބަޔަކުން ވަނީ ކަރަންޓް ކެނޑިފަ އެވެ. ސްޓެލްކޯ އިން މިއަދު ނެރުނު ނޫސްބަޔާނެއްގައި ބުނީ، އެ ހާދިސާ އެ ކުންފުނިން ބަލަމުންގެންދާކަމަށާއި ކަރަންޓު ފޯރުކޮށްދިނުމަށް ކުރި މަސައްކަތުން ބައެއް ހިސާބުތަކަށް 03:55 ހާއިރު ކަރަންޓު ފޯރުކޮށްދެވިފައިވާ ކަމަށެވެ.
ކަރަންތް ވިއުގަ އަށް ދިމާވި މައްސަލަ ހައްލުކޮށް މާލޭގެ ހުރިހާ ސަރަހައްދުތަކަށް ހެނދުނު 06:00 ގައި ކަރަންޓު ފޯރުކޮށްދީފައިވާނެ ކަމަށްވެސް ސްޓެލްކޯ އިން ބުނެއެވެ.
މާލޭން ރޭ ކަރަންޓް ކެނޑުނު ވަގުތަކީ ހުއްޓުމެއްނެތި ގިނަ އިރުތަކަކަށް މާލެ އަށް ވާރޭ ވެހުމާއި ގުޅިގެން މާލޭގެ ގިނަ މަގުތަކުގައި ވަރަށް ބޮޑަށް ފެން ބޮޑުވެފައި އޮތް ވަގުތެކެވެ.