ރައްޔިތުންގެ މަޖިލީހުގެ ފޭދޫ ދާއިރާގެ މެމްބަރު އަދި ޖުމްހޫރީ ޕާޓީގެ ކައުންސިލް މެމްބަރު އަލްހާން ފަހުމީ ޖުމްހޫރީ ޕާޓީން ވަކިވެވަޑައިގެންފިއެވެ.
ރާއްޖެޓީވީއަށް މައުލޫމާތުދެއްވަމުން އަލްހާން ވިދާޅުވީ ޖުމްހޫރީ ޕާޓީން ވަކިވެވަޑައިގެނެވުމަށް މިރޭ ޖުމްހޫރީ ޕާޓީގެ ލީޑަރު ގާސިމް އިބްރާހީމް އަށް ސިޓީ ފޮނުވާފައިވާކަމަށެވެ.
އިތުރަށް އަލްހާން ވިދާޅުވީ ޖުމްހޫރީ ޕާޓީގެ ކައުންސިލްގެ ބައެއް މެމްބަރުން ޖުމްހޫރީ ޕާޓީ ޕްރޮމޯޓް ކުރުމަށްވުރެ ރައީސް ޑރ. ވަހީދު ޕްރޮމޯޓް ކުރައްވަން މަސައްކަތް ކުރައްވަމުންދާކަމަށެވެ. އަދި ކާށިދޫ ދާއިރާގެ މެމްބަރު އަބްދުﷲ ޖާބިރު އެޕާޓީގެ ޑެޕިއުޓީ ލީޑަރު ކަމުން ވަކިކުރަން ކައުންސިލުން ނިންމީ ސަރުކާރުގެ ނުފޫޒު އޮންނަ އެކައުންސިލްގައި ތިއްބަވާ މެމްބަރުންގެ އަގްލަބިއްޔަތުން ކަމަށް އަލްހާން ތުހުމަތު ކުރެއްވިއެވެ.
އަދި ރޭ ޖުމްހޫރީ ޕާޓީގެ ކައުންސިލްގެ ބައްދަލުވުމުގައި އަލްހާނު ވެސް ޕާޓީން ވަކިކުރަން އެކައުންސިލްގަ ހިމެނޭ ޒުވާނުންގެ ގޮފީގެ ރައީސް ވަރަށްބޮޑަށް މަސައްކަތްކުރެއްވި ކަމަށާއި އެހެންނަމަވެސް އެމައްސަލައަށް ވޯޓަށް އައްސަވާފައިނުވީ އެމައްސަލަ ހުށަހަޅަންހެޖޭގޮތަށް ހުށަހަޅާފައި ނުވާތީކަމަށްވެސް އަލްހާން ވިދާޅުވިއެވެ.
"ސާރުކާރުގެ ވަޒީފާތަކުގައި އުޅޭ ޖުމްހޫރީ ޕާޓީގެ މެމްބަރުން އުޅޭނީ ޕާޓީގެ ލީޑަރު ޕްރޮމޯޓް ކުރާކަށްނޫން، އެބޭފުޅުން އުޅެނީ ރައީސް ވަހީދު ޕްރޮމޯޓްކުރަން،" އަލްހާން ސަރުކާރުގެ ވަޒީފާތަކުގައި ތިއްބެވި ޖުމްހޫރީ ޕާޓީގެ މެމްބަރުންނާދޭތެރޭ ހިތްހަމަ ނުޖެހިހުންނަވާ ވިދާޅުވިއެވެ.