މި އަހަރުގެ ރިޔާސީ އިންތިޚާބުގައި އަމިއްލަގޮތުން ވާދަކުރައްވަން ނިންމަވާފައިވާ ކުރީގެ ހޯމް މިނިސްޓަރު އުމަރު ނަސީރު ސޮއި ހޯދަން ފަށައިފިއެވެ. "ސަން"އާ ވާހަކަދައްކަވަމުން އުމަރު ވިދާޅުވީ ސޮއި ހޯދުމުގެ މަސައްކަތް ދެ ދުވަސް ތެރޭގައި ނިންމާލެވޭނެ ކަމަށެވެ. "އަޅުގަނޑުމެން ޓާގެޓް ކަނޑައަޅާފަ މިއޮތީ ތިން ދުވަސް ނުވަތަ ހަތަރު ދުވަސް ތެރޭ ހުރިހާ ސޮޔެއް ހަމަކުރުމަށް. އަދި ތަންކޮޅެއް ކައިރި ކޮށް ފޯމުތައް ހުށައަޅާނީ،" އުމަރު ވިދާޅުވިއެވެ. ރިޔާސީ އިންތިޚާބުގައި އަމިގޮތުން ވާދަކުރައްވާނަމަ ކެންޑެސީ ފޯމް ހުށަހެޅޭނީ 1،500 މީހުންގެ ސޮޔާއެކުއެވެ. އުމަރު ވިދާޅުވީ މިހާރު ކުރިއަށް ދަނީ ކެންޑިޑެންސީ ފޯމު ފުރިހަމަ ކުރުމުގެ އިދާރީ މަސައްކަތްތައް ކަމަށެވެ. އަދި މިހާރުވެސް ކެމްޕޭނުގެ މަސައްކަތްތައް ކުރިއަށް ދާ ކަމަށް އޭނާ ވިދާޅުވިއެވެ. "ކެމްޕޭން ހަމަ ވަރަށް ރަނގަޅަށް ކުރިއަށް ދަނީ. އަޅުގަނޑުމެންގެ މަސައްކަތް އަތޮޅު ތެރޭގަ ވެސް ހިނގާ. މާލޭގަ ވެސް ހިނގާ އެބަ. އަޅުގަނޑު މި ގެންގުޅެނީ ވަރަށް ތަފާތު ޚިޔާލެއް. މި ޚިޔާލު ވިއްކާތާ ވަރަށް ދުވަސްވެފަ ވާނީ. އެހެންވީމަ މި ޚިޔާލު މީހުން ތެރޭ ވަރަށް މަޤުބޫލުކޮށް މި އޮތީ،" އުމަރު ވިދާޅުވިއެވެ. ރިޔާސީ އިންތިޚާބަށް ތައްޔާރުވުމުގެ ގޮތުން އުމަރު ވަނީ މާލޭގައި ދޮރުން ދޮރަށް ކެމްޕޭނެއް ކުރިއަށް ގެންގޮސްފައެވެ. އަދި ވ. އަތޮޅުގެ ބައެއް ރަށްތަކަށް ވަޑައިގެން އެ ރަށްތަކުގެ ރައްޔިތުންނާ ވެސް ވަނީ ބައްދަލު ކުރައްވާފައެވެ. އުމަރު ވިދާޅުވީ ކެންޑިޑެންސީ ފޯމު އިލެކްޝަންސް ކޮމިޝަނަށް ހުށަހެޅުމަށްފަހު އަނެއްކާވެސް އަތޮޅު ތެރެއަށް ކެމްޕެއިން ދަތުރުތައް ފަށާނެ ކަމަށެވެ. އެގޮތުން، ދެން އެންމެ ފުރަތަމަ ވަޑައިގަންނަވާނީ އއ. އަތޮޅާއި އދ. އަތޮޅުގެ ރަށްތަކަށް ކަމަށް އޭނާ ވިދާޅުވިއެވެ. "މިހާރު ޝެޑިއުލް ކޮށްފަ އޮންނަނީ އެކިއެކި ރަށްތަކަށް ދިއުމަށް. އެގޮތުން، އއ އަތޮޅާއި އދ ގެ ރަށްތައް ނިންމުމަށްފަހު ޝެޑިއުލްކޮށްފައިވާނީ ޏ. ފުވައްމުލަކާއި ހދ. ކުޅުދުށްފުއްޓަށް ދިއުމަށް،" އޭނާ ވިދާޅުވިއެވެ. މި އަހަރުގެ ރިޔާސީ އިންތިޚާބުގައި އެމްޑީޕީގެ ކެންޑިޑޭޓެއްގެ ގޮތުގައި ރައީސް އިބްރާހިމް މުޙައްމަދު ޞާލިޙު ނިކުންނަވާއިރު ޖުމްހޫރީ ޕާޓީގެ ފަރާތުން ޤާސިމް އިބްރާހިމް ވާދަކުރައްވަން ނިންމަވާފައިވާކަން ވަނީ އިއުލާންކުރައްވާފައެވެ. އަދި މޯލްޑިވްސް ނެޝަނަލް ޕާޓީގެ ރިޔާސީ ޓިކެޓުގައި ވާދަކުރައްވާނީ އެ ޕާޓީގެ ރައީސް އަދި ރައްޔިތުންގެ މަޖިލީހުގެ ދަނގެތީ ދާއިރާގެ މެމްބަރު މުޙައްމަދު ނާޒިމެވެ. މީގެ އިތުރުން، ކުރީގެ ބަންޑާރަނައިބު ޑރ. މުހައްމަދު މުނައްވަރު ވެސް ވަނީ އަމިއްލަ ގޮތުން ވާދަކުރަން ނިންމަވާފައިވާކަން ހާމަކުރައްވާފައެވެ. މީގެއިތުރުން، އަލަށް އުފެއްދި ޕާޓީ، ދަ ޑިމޮކްރެޓްސްގެ ޕްރައިމަރީގައި ވާދަކުރެއްވުމަށް ހުޅުދޫ ދާއިރާގެ މެމްބަރު އިލްޔާސް ލަބީބް ވަނީ ފޯމު ހުށަހަޅުއްވާފައެވެ. އިދިކޮޅު ޕީޕީއެމްއިން އަދިވެސް ބުނަމުން އަންނަނީ އެ ޕާޓީގެ ރިޔާސީ ކެންޑިޑޭޓަކީ ކުރީގެ ރައީސް އަބްދުﷲ ޔާމީން ޢަބްދުލްޤައްޔޫމް ކަމަށެވެ. އެހެން ނަމަވެސް އެމަނިކުފާނު އަދިވެސް ހުންނެވީ މަނީ ލޯންޑާ ކުރިކަމަށް ސާބިތުވެ 11 އަހަރުގެ ޖަލު ހުކުމެއް ތަންފީޒު ކުރައްވަމުންނެވެ.