ސަރުކާރުން ހިންގާ ބޯހިޔާވަހިކަމުގެ މަޝްރޫއުތަކުގެ ތެރެއިން، ބިންވެރިޔާ ސްކީމާއި ގެދޮރުވެރިޔާ ސްކީމްގެ ދަށުން ދޫކުރާ ފްލެޓްތައް ލިބޭނެ ކަމަށް ބުނެ މީހުންގެ އަތުން ފައިސާ ނަގަމުންދާ ކަމަށް ހައުސިން މިނިސްޓްރީން މިއަދު ބުނެފި އެވެ.
ވީ ކިހިނެއް؟ - ހައުސިން މިނިސްޓްރީން މިއަދު ނެރުނު ބަޔާނެއްގައި ބުނީ ސްކޭމްގެ މި ފަދަ މައްސަލަތައް މިހާރު އިތުރުވަމުންދާ ކަމަށެވެ.
ތަފްސީލް - އެ ތަނުން ބުނީ:
މިނިސްޓްރީން ހިންގާ ބޯހިޔާވަހިކަމުގެ ހުރިހާ މަޝްރޫއެއްގައި ވެސް ގޯއްޗާއި ފްލެޓް ދިނުމުގެ މަސައްކަތް ކުރިއަށް ދާނީ، ގެޒެޓްގައި ޝާއިއުކޮށް، އާއްމުކޮށްފައިވާ އުސޫލުތަކާއި އިޖުރާއަތްތަކުގެ އިތުރުން މިނިސްޓްރީން އާއްމުކުރާ އިއުލާނުތަކާ އެއްގޮތަށް ކަމަށް
ގެޒެޓްގައި އާއްމުކޮށްފައިވާ އުސޫލަކާ ނުވަތަ މިނިސްޓްރީން އާއްމުކުރާ އިއުލާނަކާ ހިލާފަށް އެއްވެސް ފަރާތަކަށް، ބޯހިޔާވަހިކަމުގެ އެއްވެސް މަޝްރޫއަކުން ގޯއްޗާއި ފްލެޓް ލިބުމުގެ ފުރުސަތެއް ނޯންނާނެ ކަމަށް
މިނިސްޓްރީން ވަނީ، އެކި ފަރާތްތަކުން ހިންގާ މި ފަދަ އޮޅުވާލުންތަކާއި ސްކޭމްތަކަށް އާއްމު ރައްޔިތުން ސަމާލުވުމަށް އެދިފަ އެވެ. އަދި ގޯތި ނުވަތަ ފްލެޓް ހޯދުމުގެ ގޮތުން އެއްވެސް ފަރާތަކާ ފައިސާގެ މުއާމަލާތެއް ނުހިންގުމަށާއި އެ ފަދަ މައުލޫމާތެއް ލިބިއްޖެ ނަމަ، ވީ އެންމެ އަވަހަކަށް ފުލުހުންގެ އެންޓި ސްކޭމް ސެންޓަރުގެ ހޮޓްލައިން ނަމްބަރު 125އަށް ރިޕޯޓުކުރުމަށް އެދިފައިވެ އެވެ.
އެނގުން މުހިއްމު - ފްލެޓް ލިބޭނެ ކަމަށް ބުނެ މީހުންގެ އަތުން ފައިސާ ނަގާ މައްސަލަ ފުލުހުން ވެސް ވަނީ މި ފަހުން ވަނީ އާއްމުންގެ ސަމާލުކަމަށް ގެނެސްފަ އެވެ. 
ފުލުހުންގެ އެންޓި-ސްކޭމް ސެންޓަރުގެ ސީނިއާ ސާޖެންޓް އަބްދުﷲ ޝަހުނީޒް ވިދާޅުވީ، ހައުސިން ސްކީމްތަކަށް ހުޅުވާލާއިރު، ލިންކުތަކާއި ކޯލްތައް މެދުވެރިކޮށް އޯޓީޕީ ހޯދުމާއި ޒާތީ މައުލޫމާތު ހޯދުމަށް ފޮނުވާ ލިންކުތައް އާއްމުވާ ކަމަށެވެ. އެހެންވެ އެ ފަދަ ލިންކުތަކަށް ފިއްތުމުގެ ބަދަލުގައި ސަރުކާރުން އަންގާފައިވާ ގޮތަށް، އީފާސް މެދުވެރިކޮށް ޕޯޓަލްއަށް ވަދެ، މުއާމަލާތްތައް ހިންގުމަށް އޭނާ އެދިވަޑައިގެންފައިވެ އެވެ.