ހދ. ކުރިނބިއާއި ފ. ފީއަލީގެ ކަރަންޓުގެ ކެޕޭސިޓީ އިތުރުކުރުމަށް އެ ދެރަށަށް ޖެނަރޭޓަރު ގެންގޮސްފައި ވާކަމަށް ފެނަކަ ކޯޕަރޭޝަން ލިމިޓެޑުން ބުނެފިއެވެ.
ފެނަކައިން ބުނީ އެ ރަށުގައި މިހާރު ހުރި ޖެނަރޭޓަރުން ހިދުމަތް ފޯރުކޮށްދެވޭ ވަރަށްވުރެ ކަރަންޓަށް އޮތް ޑިމާންޑު ބޮޑުވެފައި ވަތީ، ދެތެރެއަކުން ކަރަންޓު ކެނޑޭ ކަމަށެވެ. އަދި އެ ޖެނަރޭޓަރު ގެންދިއުމުން، ކުރިނބީގެ 450 މީހުންގެ އާބާދީއަށް މެދުނުކެނޑި ކަރަންޓުގެ ހިދުމަތް ލިބޭނެ ކަމަށް މައުލޫމާތު ދެއެވެ.
ފެނަކައިން ބުނީ އެ ރަށަށް ގެންގޮސްފައި ވަނީ 250 ކިލޯވޮޓުގެ ޖެނަރޭޓަރެއް ކަމަށެވެ. އަދި އެ ޖެނަރޭޓަރު އިންސްޓޯލް ކުރުމުގެ މަސައްކަތް ނިމުނުހާ އަވަހަށް، އެ ޖަނަރޭޓަރުގެ ހިދުމަތް ފޯރުކޮށްދެވިގެން ދާނެ ކަމަށް ބުންޏެވެ.
އޭގެ އިތުރުން ފެނަކައިން ވަނީ ފ. ފީއަލީއަށްވެސް އާ ޖެނަރޭޓަރެއް ގެންގޮސްފައެވެ.
އެގޮތުން، ފީއައްޔަށް ގެންގޮސްފައި ވަނީ 400 ކިލޯވޮޓުގެ ޖެނަރޭޓަރެކެވެ. އަދި މިހާރު ހުރި ޕަވާ ކޭބަލް ނެޓްވޯކް ރިޕްލޭސް ކުރަން ކޭބަލްވެސް ގެންގޮސްފައި ވެއެވެ. ފެނަކައިން ބުނީ އެ ޖެނަރޭޓަރު އިންސްޓޯލް ކުރެވުމުން އެ ރަށުގެ 800 މީހުންގެ އަބާދީއަށް އެއްވެސް ދަތިކަމެއް ނެތި ކަރަންޓުގެ ހިދުމަތް ފޯރުކޮށްދެވޭނެ ކަމަށެވެ.
ފެނަކައަކީ ރާއްޖޭގެ 150 އަށްވުރެ ގިން ރަށްރަށަށް ކަރަންޓުގެ ހިދުމަތް ފޯރުކޮށްދޭ ކުންފުންޏެކެވެ.