ލޯކަލް ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިޚާބަށް ކުރިމަތިލުމަށް އިތުރު 10 ދުވަސް ދިނުމަށް އިދިކޮޅު އެމްޑީޕީން މިއަދު ގޮވާލައިފައި ވަނިކޮށް، އިލެކްޝަންްސް ކޮމިޝަން (އީސީ)ން ފޯމު ހުށަހެޅޭނޭ ގަޑިތައް އިތުރުކޮށްފިއެވެ. އީސީން ސަރުކާރުގެ ގެޒެޓުގައި މިއަދު އާންމުކޮށްފައިވާ އިއުލާނެއްގައި ވަނީ، ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިޚާބަށް ކުރިމަތިލުމަށް އެދޭ ފަރާތްތަކުގެ ފޯމު އޮންލައިންކޮށް ކޮންމެ ދުވަހަކު ހުށަހެޅޭނެ ވަގުތު ދެ ގަޑިއިރަށް އިތުރުކޮށްފައި ވާކަމަށެވެ. އެހެންކަމުން، މިއަދުން ފެށިގެން އަންނަ އާދިއްތަ ދުވަހުގެ ނިޔަލަށް، ހުކުރު ދުވަސް ފިޔަވައި ކޮންމެ ދުވަހަކު ހެނދުނު 8:30 އިން ހަވީރު 05:30 އަށް އަދި ހުކުރު ދުވަހު މެންދުރުފަހު 03:30 އިން ރޭގަނޑު 08:00 އަށް، ފޯމު ހުށަހެޅޭނެ ގަޑިތައް އިތުރުކޮށްފައިވާ ކަމަށް އެ ކޮމިޝަނުން ވަނީ ބުނެފައެވެ. އަންނަ އޭޕްރިލް މަހުގެ ހަތަރު ވަނަ ދުވަހު އޮންނަ ކައުންސިލް އިންތިޚާބުތަކުގައި ވާދަކުރަން ހުޅުވާލީ މިމަހު 17ވަނަ ދުވަހެވެ. އެ މުއްދަތު ހަމަވާން މީގެ ކުރިން އޮތީ، އަންނަ އާދިއްތަ ދުވަހުގެ މެންދުރުފަހު 3:30 އަށެވެ. https://sun.mv/217253 އެމްޑީޕީން ވަނީ، އީސީން އިންތިޚާބަށް ކުރިމަތިލާން ދީފައިވަނީ ވަރަށް ކުޑަ މުއްދަތެއް ކަމަށާއި، ވަކިން ޚާއްސަކޮށް އޮންލައިންކޮށް ހުށަހެޅުމަށް ޖާގަ ދީފައި އޮތުމަކީ، ގިނަ ކެންޑިޑޭޓުންތަކެއްގެ އިންތިޚާބީ ހައްގު ނިގުޅައިގަނެވޭނޭ ކަމެއް ކަމަށް ބުނެފައެވެ. މީގެ އިތުރުން އެމްޑީޕީން ވަނީ މި ސަރުކާރުން އިންތިޚާބަށް ނުފޫޒު ފޯރުވަން މަސައްކަތް ކުރާ ކަމަށާއި، އީސީގެ ޕޯޓަލަށް ވެރިކަން ކުރާ ޕާޓީއަށް ވަދެވި، އޭގައި ހުރި މައުލޫމާތު ބެލޭ ކަމަށް ތުހުމަތުކޮށްފައެވެ. ނަމަވެސް އީސީން މީގެ ކުރިން ވަނީ އެ ތުހުމަތުތައް ދޮގުކޮށްފައެވެ.