މަނީ ލޯންޑްރިންގެ ކުށް ސާބިތުވެ، އެފްއޭއެމްގެ ކުރީގެ ރައީސް ބައްސާމް އަދީލް ޖަލީލްގެ މައްޗަށް އިއްވި ފަސް އަހަރުގެ ޖަލު ހުކުމް އޭނާ އިސްތިއުނާފުކޮށްފިއެވެ. ބައްސާމްގެ މައްޗަށް އިއްވި، ފަސް އަހަރުގެ ހުކުމަކީ އޭނާގެ މައްޗަށް އިއްވި ދެވަނަ ހުކުމެވެ. އޭނާ ހުރީ ޖުމްލަ ހަތަރު ހުކުމެއްގައި 32 އަހަރަށް ޖަލަށްލާފައެވެ. ދެވަނަ ހުކުމް އިސްތިއުނާފު ކޮށްފައިވަނީ މިދިޔަ ހަފްތާގައި ކަމަށްވަނީ މައުލޫމާތު ލިބިފައެވެ. ބައްސާމް ކުރިން ވަނީ ހިޔާނާތުގެ ކުށް ސާބިތުވެ، އިއްވާފައިވާ ހަތަރު އަހަރުގެ ޖަލު ހުކުމްވެސް އިސްތިއުނާފުކޮށްފައެވެ. ހައިކޯޓުގައި އިސްތިއުނާފުކޮށްފައިވާ މައްސަލައަކީ، ބައްސާމް 2016 ވަނަ އަހަރުން ފެށިގެން ފުޓްބޯލް އެސޯސިއޭޝަން އޮފް މޯލްޑިވްސްގެ ރައީސްގެ މަގާމުގައި ހުރެ، އެފްއޭއެމްގެ ނަމުގައި ބޭންކް އޮފް ސިލޯނުގައި ހުޅުވާފައިވާ އެކައުންޓަށް ފީފާގެ ފަރާތުން 2018 ވަނަ އަހަރުގެ ޖުލައި މަހާއި އޮގަސްޓު މަހުގެ ތެރޭގައި ޖަމާކޮށްފައިވާ ފައިސާގެ ތެރެއިން 10،000 އެމެރިކާ ޑޮލަރު ބައްސާމްގެ އަމިއްލަ އެކައުންޓަށް ޖަމާކޮށް، އެ ފައިސާ ބޭނުން ކުރި މައްސަލައެވެ. އެ މައްސަލައިގައި ކޮށްފައިވާ މަނީ ލޯންޑްރިންގެ ދައުވާއާ ގުޅިގެން ފަސް އަހަރުގެ ޖަލު ހުކުމަކާ އެކު 154،000 ރުފިޔާއިން ބައްސާމް ޖޫރިމަނާ ވެސް އޮތީ ކޮށްފައެވެ.