ޓެކްސީ ހިދުމަތަށް ވަންނަން ފަސޭހަކޮށްދީ، ހިދުމަތުގެ ވާދަވެރިކަން އިތުރުވާ ބަދަލުތަކާ އެކު ޓެކްސީ ގަވާއިދު އިސްލާހުކޮށްފި އެވެ.
ވީ ކިހިނެއް؟ - ޓެކްސީ ގަވާއިދަށް ގެނައި 4 ވަނަ އިސްލާހު ޓްރާންސްޕޯޓް މިނިސްޓްރީން ގެޒެޓުކުރީ މިއަދު އެވެ.
ގްރޭޓާ މާލެ ސަރަހައްދުގައި އޮޕަރޭޓުކުރަން ރަޖިސްޓްރީކުރާ ޓެކްސީ ސެންޓަރެއް ނަމަ، ސެންޓަރުގައި ރަޖިސްޓްރީކުރަން ލިސްޓުކޮށްފައިވާ ޓެކްސީކުރަން ބޭނުންކުރެވޭނެ 50 އުޅަނދު އޮތުން؛ މީގެ ކުރިން މަދުވެގެން 100 އުޅަނދު އޮންނަން ޖެހޭ
ގްރޭޓާ މާލެ ސަރަހައްދުގައި އޮޕަރޭޓުކުރަން ރަޖިސްޓްރީކުރާ ޓެކްސީ ސެންޓަރެއް ނަމަ، އެ ސެންޓަރުގައި ރަޖިސްޓްރީކުރަން ލިސްޓުކޮށްފައިވާ، ޓެކްސީކުރަން ބޭނުންކުރެވޭނެ އުޅަނދު ދުއްވުމުގެ ލައިސެންސް ލިބިފައިވާ 50 ޑްރައިވަރުން ތިބުން؛ މީގެ ކުރިން މަދުވެގެން 100 ޑްރައިވަރުން ވެސް ތިބެންޖެހޭ
ޓެކްސީ ސެންޓަރު ހިންގާ އޮފީސް ހުންނަންޖެހޭ މިންގަނޑުތައް ވެސް ވަނީ ކަނޑައަޅާފައި؛ އޭގެ ތެރޭގައި މީހުންނަށް ވަދެނުކުމުވޭ އަދި އިށީނދެ ތިބެވޭ ތަނަކަށް ވުމާއި ސެންޓަރު ހިންގަން ބޭނުންވާ ވަސީލަތްތައް ހުންނަން ޖެހޭ
ޓެކްސީ ސެންޓަރަކުން މި ޝަރުތުތައް އުނިވެއްޖެ ހާލަތެއްގައި އެ ޝަރުތެއް ފުރިހަމަކުރަން 60 ދުވަހުގެ މުއްދަތެއް ދޭނެ
ޝަރުތު ފުރިހަމަނުވެއްޖެ ނަމަ އެ ސެންޓަރެއްގެ ރަޖިސްޓްރި ބާތިލްވާނެ؛ ސެންޓަރުގެ ރަޖިސްޓްރީ ބާތިލްވުމުން އެ ސެންޓަރެއްގައި ރަޖިސްޓްރީކޮށްފައިވާ ޓެކްސީތަކަށް ދޫކޮށްފައިވާ ކާރު ޓެކްސީ ލައިސެންސް ވެސް ބާތިލްވާނެ
މިގޮތަށް ލައިސެންސް ބާތިލްވާ އުޅަނދުތައް އެހެން ސެންޓަރެއްގައި ރަޖިސްޓްރީވާން ހުށަހެޅުމުން، ޝަރުތުހަމަވާ ނަމަ 10 ދުވަހުގެ ތެރޭގައި ލައިސެންސް ދޭން ވާނެ
މީގެ އިތުރުން ޑްރައިވަރުންނަށް ދެ ޓެކްސީ ސެންޓަރެއްގައި ރަޖިސްޓްރީވެ، މަސައްކަތް ކުރުމުގެ ފުރުސަތު ވެސް ވަނީ ދީފަ އެވެ.