އުރީދޫން ކަނޑުއަޑީގެ ޑައިވިން އިކުއިޕްމަންޓް އެމްއެންޑީއެފްއަށް އިއްޔެ ހަދިޔާކޮށްފި އެވެ.
ވީ ކިހިނެއް؟ - އުރީދޫ މޯލްޑިވްސްގެ މެނޭޖިން ޑިރެކްޓަރު އަދި ސީއީއޯ ހާލިދު އަލް ހަމާދީ މި ތަކެތި ޑިފެންސް މިނިސްޓަރު މުހައްމަދު ގައްސާން މައުމޫނާ ރަސްމީކޮށް ހަވާލުކޮށްދެއްވީ އިއްޔެ ބަނޑާރަކޮށީގައި ބޭއްވި ރަސްމިއްޔާތެއްގަ އެވެ.
ތަފްސީލް - ހަދިޔާކުރި ތަކެތީގެ ތެރޭގައި ހިމެނެނީ:
1 އޯޝަން ރީފް އެމް105 ޑިޖިޓަލް ޑުއަލް ޗެނަލް ކޮމިއުނިކޭޝަން ޑިވައިސް
1 ލުބެލް ލެބް އަންޑަވޯޓާ ލައުޑް ސްޕީކަރު
3 އޯޝަން ރީފް ފުލް ފޭސް ފޭސް 2 ޑައިވިން މާސްކް
އުރީދޫން ބުނި ގޮތުގައި، އެ ކުންފުނިން ރާއްޖޭގައި ހިދުމަތްދޭތާ 20 އަހަރު ފުރުން ފާހަގަކުރުމަށް މިދިޔަ އަހަރު ބޭއްވި ކަނޑުއަޑީގެ އެންމެ ބޮޑު ޕެނަލް ޑިސްކަޝަންގެ ގިނިސް ވޯލްޑް ރެކޯޑް ހެދުމަށް މި އާލާތްތައް ވަނީ ބޭނުންކޮށްފަ އެވެ.
ބުނީ ކީކޭ؟ - އުރީދޫގެ ސީއީއޯ ހާލިދު އަލް ހަމާދީ ވިިދާޅުވި ގޮތުގައި، އުރީދޫން ކުރިއަށްގެންދިޔަ ދުނިޔޭގެ ރެކޯޑް ހެދުމުގެ ހަރަކާތުގައި ބޭނުންކުރި ސްޕެޝަލައިޒްޑް އިކުއިޕްމަންޓްތަކުގެ ސަބަބުން އެމްއެންޑީއެފުން މިހާރު ކުރަމުން އަންނަ މަސައްކަތް އިތުރަށް ފުރިހަމަ ވެގެންދާނެ އެވެ.
"ދިވެހިރާއްޖޭގެ ބޮޑު ބަޔަކީ ކަނޑު. ރާއްޖޭގެ ކަނޑުގެ ސަރަހައްދު ހިމާޔަތްކުރުމުގައި މޯލްޑިވްސް ނޭޝަނަލް ޑިފެންސް ފޯސް ވަރަށް މުހިންމު ދައުރެއް އަދާކުރެ،" އޭނާ ވިދާޅުވި އެވެ.
"ކަނޑުއަޑީގެ މުވާސަލާތީ ވަސީލަތްތަކާއި ސަލާމަތާއި ރައްކާތެރިކަން އަދި އޮޕަރޭޝަނަލް ގާބިލްކަން އިތުރުކޮށް، ކަނޑުއަޑީގެ ތިމާވެށި ހިމާޔަތް ކުރުމުގައި އެމްއެންޑީއެފްއަށް އެހީތެރިކަން ފޯރުކޮށްދިނުމަކީ އަޅުގަނޑުމެންނަށް ލިބޭ ފަހުރެއް."
ޗީފް އޮފް ޑިފެންސް ފޯސް މޭޖާ ޖެނެރަލް އިބްރާހިމް ހިލްމީ ވިދާޅުވި ގޮތުގައި، ރާއްޖެ ފަދަ ކަނޑުގެ ސަރަހައްދު ބޮޑު ގައުމެއްގައި ކޯސްޓްގާޑުގެ ސާޗު އެންޑް ރެސްކިއު ކެޕޭސިޓީ ވަރުގަދަކުރުމަށާއި ކަނޑުއަޑީގެ އޮޕަރޭޝަންތައް ހަރުދަނާ ކުރުމަށް ކަނޑުއަޑީގެ ޒަމާނީ އާލާތްތައް ބޭނުންކުރުން ވަރަށް މުހިއްމެވެ.
"މި އެހީގެ ސަބަބުން ރާއްޖޭގެ އޮޕަރޭޝަނަލް އިފެކްޓިވިޓީ އަދި މެރިޓައިމް ގޮންޖެހުންތަކަށް އިޖާބަދިނުމުގެ ގާބިލްކަން އިތުރުވެ، ގައުމީ ސަލާމަތާއި ރައްކާތެރިކަމަށް އިތުރު އެހީއަކަށް ވެގެންދާނެ،" އޭނާ ވިދާޅުވި އެވެ.