ސްޕެޝަލް އިކޮނޮމިކް ޒޯންތަކުގައި (އެސްއީޒެޑް) އިންވެސްޓްކުރެވޭނެ އިގުތިސޯދީ ހަރަކާތްތަކުގެ ދާއިރާތަކުގެ ތެރޭގައި ކަނޑު އަޑިން ތެލާއި މިނަރަލް ހޯދުމުގެ މަސައްކަތް ހިމެނީ އިގްތިސޯދު ފުޅާކުރުމަށް ކުރާ މަސައްކަތުގެ ދަށުން ކަަމަށާއި އެ މަސައްކަތްތައް ކުރިއަށްގެންދާނީ ތިމާވެއްޓަށް ލިބޭނެ ގެއްލުންތައް ކުޑަވާނެ ގޮތަށް ކަމަށް ފިޝަރީޒް އެންޑް އޯޝަން ރިސޯސަސް މިނިސްޓަރު އަހުމަދު ޝިޔާމް މިއަދު ވިދާޅުވެއްޖެ އެވެ.
ވީ ކިހިނެއް؟ - ރާއްޖޭގެ ކަނޑު އަޑިން މައިނިންގެ މަސައްކަތާއި ތެޔޮ ހޯދުމަށް މަގުފަހިވާ ގޮތަށް ގާނޫނީ ގޮތުން ބާރުދިނުމަކީ ކަންބޮޑުވުމެއް ކަމަށާއި އޭގެ ސަބަބުން އިގްތިސޯދަށް ނޭދެވޭ އަސަރު ކުރާނެ ކަމަށް ވިދާޅުވެ ކުރީގެ އެންވަޔަރަމެންޓު މިނިސްޓަރު އައިމިނަތު ޝައުނާ ވަނީ ކަންބޮޑުވުން ފާޅުކުރައްވައިފަ އެވެ.
ތަފްސީލް - ޝައުނާގެ ވާހަކައަށް ރައްދު ދެއްވައި ޝިޔާމް އެކްސްގައި ވިދާޅުވީ ރާއްޖޭގެ އިގްތިސޯދު ފަތުރުވެރިކަމާއި މަސްވެރިކަމުގެ އިތުރުން އެހެން ދާއިރާތަކަށް ފުޅާކުރެއްވުމަށް ރައީސް މުހައްމަދު މުއިއްޒު ގެންގުޅުއްވާ ސިޔާސަތަކީ ގައުމުގެ ކުރިމަގަށް މުހިއްމު ފިޔަވަޅެއް ކަމަށެވެ.
ބޭރުގެ ނުފޫޒުތަކާއި ދުނިޔެއަށް އަންނަ ލޮޅުންތަކުގެ ސަބަބުން ރާއްޖޭގެ އިގްތިސޯދަށް ކުރިމަތިވާ ނުރައްކާތައް ކުޑަކޮށް، ދެމެހެއްޓެނިވި ކުރިއެރުމަށް ބޭނުންވާ ވަރުގަދަ ބިންގަލެއް އެޅުމަށް އިގްތިސޯދީ ދާއިރާތައް ފުޅާކުރުން މުހިއްމު ކަމަށް އޭނާ ވިދާޅުވި އެވެ.
ޝިޔާމް ވިދާޅުވީ:
ރާއްޖޭގެ އިގްތިސޯދީ ހާއްސަ ސަރަހައްދަކީ ދުނިޔޭގެ ނިސްބަތުން ވެސް ބޮޑު ސަރަހައްދެއް
ގާތްގަނޑަކަށް 900،000 އަކަކިލޯމީޓަރުގެ މި ސަރަހައްދުން މިހާތަނަށް ނަފާ ހޯދުނީ ކަނޑުމަހުގެ މަސްވެރިކަމުން އެކަނި
"މިއީ ލިބެންހުރި ފުރުސަތުތަކުގެ ވަރަށް ކުޑަ މިންވަރެއް. މި ކަނޑުގެ ވަސީލަތްތައް ފަރުވާތެރިކަމާ އެކު ބަލާ، ތަރައްގީކުރުމަކީ އިގްތިސޯދީ އާ ދޮރުތައް ހުޅުވިގެންދާނެ ކަމެއް،" ޝިޔާމް ވިދާޅުވި އެވެ.
މިކަން ކުރިއަށްގެންދާނީ، އޯޝަން ރިސޯސަސް މިނިސްޓަރު ވިދާޅުވި ގޮތުގައި، އިތުބާރު ހުރި، ގާބިލު އިންވެސްޓަރުންނާ ގުޅިގެންނެވެ.
ރާއްޖެއަކީ މޫސުމީ ބަދަލުތަކުގެ ނުރައްކަލުގެ އަސަރު އެންމެ ބޮޑަށް ކުރާނެ އެއް ގައުމުކަން ފާހަގަ ކުރައްވައި މިނިސްޓަރު ވިދާޅުވީ މިފަދަ ކޮންމެ މަޝްރޫއެއް ވެސް ކުރިއަށްގެންދާނީ ތިމާވެއްޓަށް ކުރާނެ އަސަރުތައް ދެނެގަތުމަށް ހަރުދަނާ އަދި ދެފުށް ފެންނަ ދިރާސާތަކެއް ކުރުމަށް ފަހު ކަމަށެވެ.
ދިިރޭތަކެތީގެ ނަސްލުތަކާއި ތިމާވެށީގެ ދެމެހެއްޓެނިވިކަމަށް އެއްވެސް ފަރުވާކުޑަކުރުމެއް ނުގެންގުޅޭނެ ކަމަށް އޭނާ ވިދާޅުވި އެވެ.
"އިގްތިސޯދީ ގޮތުން ބަލާއިރު، މި ކަމުގެ ސަބަބުން އާ އީޖާދުތަކަށް ފުރުސަތު ލިބި،  ނޫ އިގްތިސޯދުގެ މަރުކަޒަކަށް ރާއްޖެ ވެގެންދާނެ. މީގެ ސަބަބުން މެރިން ޖިއޮލޮޖީ، ސަބްސީ އިންޖިނިއަރިން، އެންވަޔަރަންމެންޓަލް ސައިންސް ފަދަ ދާއިރާތަކުން ދިވެހިންނަށް މަތީ ފަންތީގެ ވަޒީފާގެ ފުރުސަތުތައް ފަހިވެ، ދިވެހިންގެ ހުނަރާއި ގާބިލުކަން އިތުރުވެގެންދާނެ،" ޝިޔާމް ވިދާޅުވި އެވެ.
މިނިސްޓަރު ވިދާޅުވީ ގައުމުގެ އިގްތިސޯދު ވަރުގަދަކޮށް، އަމިއްލަ ފައިމައްޗަށް ތެދުވެފައިވާ އުޖާލާ މުސްތަގުބަލެއް ކަށަވަރުކުރުމަށް މަސައްކަތް ކުރަން ޖެހިފައިވާ ކަމަށެވެ.
އެނގުން މުހިއްމު - ރައީސް މުހައްމަދު މުއިއްޒު އިއްޔެ ވަނީ މަދުވެގެން 100 މިލިއަން ޑޮލަރު އިންވެސްޓްކުރަން ޖެހޭ އިގުތިސޯދީ މަސައްކަތްތަކުގެ ލިސްޓަށް ބަދަލު ގެންނަވައިފަ އެވެ. އެއާ އެކު، އެ ލިސްޓުގައި ގޭސް އެކްސްޕްލޮރޭޝަންގެ މަސައްކަތްތަކާ އެކު ވަނީ ތެލާއި ގޭހާއި މިނަރަލް އެކްސްޕްލޮރޭޝަންގެ މަސައްކަތްތައް ހިމަނުއްވައިފަ އެވެ.