ޚިދުމަތް ނުފެށި ދިގުލައިގެން ގޮސްފައިވާ އައްޑޫ އިކުއެޓޯރިއަލް ހޮސްޕިޓަލުގެ ކެތެޓަރައިޒޭޝަން ލެބޯރެޓަރީ ނުވަތަ ކެތު ލެބުގެ ޚިދުމަތް މިއަދު ފަށައިފިއެވެ. މިއީ މާލޭން ބޭރުގައި ގާއިމްކޮށް ޚިދުމަތްދޭން ފެށި ފުރަތަމަ ކެތު ލެބެވެ. އައްޑޫ އިކުއެޓޯރިއަލް ހޮސްޕިޓަލުގެ ކެތުލެބުގެ ޚިދުމަތް ފެށީ ސަރުކާރުގެ މައި ހޮސްޕިޓަލު އައިޖީއެމްއެޗާ ގުޅިގެންނެވެ. ކެތު ލެބުގެ ޚިދުމަތްތައް ފަށައި، އައްޑޫ އިކުއެޓޯރިއަލް ހޮސްޕިޓަލާއި އައިޖީއެމްއެޗުން ބޭއްވި ނޫސްވެރިންގެ ބައްދަލުވުމުގައި މާލޭ ހޮސްޕިޓަލްތަކުގެ ގްރޫޕު (އެމްސީޖީއެޗް)ގެ ސީއީއޯ އިބްރާހީމް ޢަބްދުއްރައްޒާޤް ޙަލީމް ވިދާޅުވީ، އޭއީއެޗުގައި ކެތު ލެބުގެ ޚިދުމަތް ފެށީ ސައްތައިންސައްތަ ދިވެހީންނާއެކު ކަމަށެވެ. މިއީ ރަށްރަށުގައި ސަރުކާރުން ސިއްހީ ޚިދުމަތް ފުޅާކުރުމަށް ކުރަމުން އަންނަ މަސައްކަތަށް ލިބުނު ކުރިއެރުމެއް ކަމަށް، ޙަލީމް ވިދާޅުވިއެވެ. https://sun.mv/207696 ކެތު ލެބަކީ ހިތުގެ މައްސަލަތައް ހުންނަ ބަލިމީހުންނަށް ފަރުވާ ދެވޭ މުހިންމު ލެބެކެވެ. ކެތު ލެބުން ހިތުގެ ބަލިތަކަށް އެންޖިއޯގްރަފީ، އިންވޭސިވް އަދި ނޮން އިންވޭސިވް ޕްރޮސީޖަރުތައް ހެދޭނެއެވެ. އެ ކެތު ލެބު ފަސް އަހަރުގެ މުއްދަތަށް މެނޭޖްކޮށް އޮޕަރޭޓުކޮށްދޭނެ ބަޔަކު ހޯދުމަށް އިއުލާނުކުރީ މިދިޔަ ޖޫން މަހުގެ 12 ވަނަ ދުވަހެވެ. އެ ލެބުގެ މަސައްކަތް ފެށީ މިދިޔަ އެމްޑީޕީ ސަރުކާރުގައެވެ. ސަރުކާރުގެ ހޮސްޕިޓަލެއްގައި ކެތު ލެބެއް އެންމެ ފުރަތަމަ ހުޅުވީ 2016 ވަނަ އަހަރު އައިޖީއެމްއެޗުގައެވެ. މިހާރު އެފަދަ ލެބެއް އޭޑީކޭ ހޮސްޕިޓަލުގައި ވެސް ހުރެއެވެ.