މި މަހުގެ 24 ވަނަ ދުވަހު އިންޑޮނޭޝިއާގެ ޖަވާގެ ހުޅަނގަށް ބޯކޮށް ވާރޭވެހި ބިންގަނޑު ކަނޑައިގެން ދިއުމުގެ ސަބަބުން ގެއްލިގެން ހޯދަމުންދާ 32 މީހުން އަދިވެސް ނުފެންނަ ކަމަށް ކަމާބެހޭ ފަރާތްތަކުން ބުނެފިއެވެ. އެ ހާދިސާގައި މަރުވި މީހުންގެ އަދަދު މިހާތަނަށް ވަނީ 50 އަށް އުފުލިފައެވެ. ޖާވާގެ ހުޅަނގުގައި އޮންނަ ބަނޑޮސް ބާރަތު ސަރަހައްދުގެ ޕާސިރު ލަންގު އަވަށަށް ބިންގަނޑު ކަނޑައިގެން ގޮސްފައިވަނީ އެ އަވަށަށް ވާރޭ ވެހޭތާ ދުވަސްގަނޑެއް ފަހުންނެވެ. ކޮމްޕާސް ޓީވީން ރިޕޯޓްކޮށްފައިވާ ގޮތުގައި މޫސުން ގޯސްވި ނަމަވެސް ސާޗް އެންޑް ރެސްކިއު އޮޕަރޭޝަންތައް ކުރިއަށްދާއިރު، އެ ސަރަހައްދުގައި ގިނަ އަދަދެއްގެ ބަރު އިކުއިޕްމަންޓްތަކާއި ޓްރެކިން ޑިވައިސްތައް ބަހައްޓާފައިވެއެވެ. ބިންގަނޑު ކަނޑައިގެން ދިއުމުގެ ސަބަބުން މަރުވި މީހުންގެ އަދަދު ވަނީ 50 އަށް އުފުލިފައި -- ފޮޓޯ/ އީޕީއޭ އެ ހާދިސާގެ ސަބަބުން ގާތްގަޑަކަށް 685 މީހުން ވަނީ ރައްކާތެރި ހިސާބުތަކަށް ގެންގޮސްފައެވެ. އިންޑޮނޭޝިއާގެ ނޭވީގެ ޗީފް އޮފް ސްޓާފް މުހައްމަދު އަލީ ވިދާޅުވި ގޮތުގައި ބިންގަނޑު ކަނޑައިގެން ދިއުމުގެ ހާދިސާ ހިނގާފައި ވަނީ އެ ސަރަހައްދުގައި ތަމްރީނުތަކެއް ކުރިއަށް ގެންދަނިކޮށެވެ. ހާދިސާގައި ސިފައިންގެ ހަތަރު މީހަކު މަރުވެފައިވާކަން ކަށަވަރުވެފައިވާއިރު، 19 ސިފައިން ވަނީ ގެއްލިފައެވެ. އިންޑޮނީޝިއާއަކީ ވިއްސާރަ މޫސުމުގައި ބިންގަނޑު ކެނޑުމާއި ކިސަޑު ފޭބުމުގެ ނުރައްކާ ބޮޑު ގައުމެކެވެ.