އިގްތިސޯދީ ކުރިއެރުމަށް އިތުރު ފުރުސަތުތައް ހުޅުވޭނީ ކަނޑުގެ ވަސީލަތްތައް ދިރާސާކޮށްގެން ކަމަށް ވިދާޅުވެ، ފިޝަރީޒް މިނިސްޓަރު އަހުމަދު ޝިޔާމް، ކުރީގެ އެންވަޔަރަމަންޓް މިނިސްޓަރު އައިމިނަތު ޝައުނާއަށް ރައްދު ދެއްވައިފިއެވެ. ޝިޔާމް އެފަދައިން ވިދާޅުވީ ދިވެހިރާއްޖޭގައި ގާއިމުކުރާ ސްޕެޝަލް އިކޮނޮމިކް ޒޯން (އެސްއީޒެޑް)އިން ތެލާއި މައުދަން ހޯދުމުގެ މަސައްކަތް ކުރުމަށް ހުއްދަ ދިނީ، މުސްތަގުބަލަށް ވިސްނުމެއް ނެތި ކަމަށާއި، އެކަމުން ރާއްޖޭގެ މަސްވެރިކަމާއި ފަތުރުވެރިކަން ނެތި ދިޔުމުގެ ބިރު އެބަ އޮތް ކަމަށް ޝައުނާ ވިދާޅުވުމާ ގުޅިގެންނެވެ. ޝައުނާ އެފަދައިން ވިދާޅުވީ އެސްއީޒެޑްގައި ހިންގޭ މަސައްކަތްތަކަށް ތެލާއި މައުދަން ހޯދުން ރައީސް ޑރ. މުހައްމަދު މުއިއްޒު އިއްޔެ އިތުރުކުރެއްވުމާ ގުޅިގެންނެވެ. https://sun.mv/217243 އެކަމާ ގުޅިގެން މިނިސްޓަރު ޝިޔާމް 'އެކްސް'ގައި ކުރެއްވި ޕޯސްޓެއްގައި ވިދާޅުވީ ރައީސް ޑރ. މުޙަންމަދު މުޢިއްޒުގެ ސްޓްރެޓީޖިކް ޕްލޭނަކީ، ރާއްޖޭގެ އިގްތިސޯދު، ފަތުރުވެރިކަމާއި މަސްވެރިކަމުގެ ދާއިރާގެ ތެރެއިން ކުރިއެރުވުން ކަމަށެވެ. ޝިޔާމް ވިދާޅުވި ގޮތުގައި ރާއްޖޭގެ އިގްތިސޯދަކީ ބޭރުގެ އިގްތިސޯދުތަކާ އަޅާ ބަލާއިރު ނާޒުކު ގައުމަކެވެ. އެހެންކަމުން ރާއްޖޭގެ އިގްތިސޯދީ ބިންގާ ފުޅާކޮށް، ރިސްކުތައް ކުޑަކޮށް، ތަރައްގީގެ ބިންގާ އެޅިގެން ދާނެ ކަމަށް ޝިޔާމް ވިދާޅުވިއެވެ. https://x.com/Shiyamaldives/status/2016499091589738693 ގާތްގަނޑަކަށް 900،000 އަކަ ކިލޯމީޓަރުގެ ސަރަހައްދެއްގައި ދުނިޔޭގެ އެންމެ ބޮޑު އެކްސްކްލޫސިވް އިކޮނޮމިކް ޒޯން ރާއްޖޭގައި އޮތް ނަމަވެސް، އޭގެ ބޭނުން އެންމެ ކުޑަމިނުން ބޭނުންކުރެވެނީ ކަޅުބިލަ މަސްވެރިކަމުގެ ދާއިރާއިން އެކަނި ކަމަށް ޝިޔާމް ވިދާޅުވިއެވެ. މި ތަނަވަސް ކަނޑުގެ ވަސީލަތްތައް ރަނގަޅަށް ދިރާސާކޮށް ތަރައްގީ ކުރުމަކީ ދެމެހެއްޓެނިވި ވަސީލަތްތަކުގެ ބޭނުން ހިފުމަށް އާ ފުރުސަތުތަކެއް ހުޅުވިގެންދާނެ ކަމެއް ކަމަށް އޭނާ ވިދާޅުވިއެވެ. މޫސުމަށް އަންނަ ބަދަލުތަކުގެ އަސަރު އެންމެ ބޮޑަށް ފޯރާނެ އެއް ގައުމުގެ ހައިސިއްޔަތުން، ރާއްޖެއިން އާ ކަންތައްތަކަށް ސަމާލުކަން ދޭން ޖެހޭނެ ކަމަށާއި، ކޮންމެ އާ ކަމެއް ވިޔަސް، ތަރައްގީގެ އާ ޕްރޮޖެކްޓެއް ވެސް ކުރިއަށް ގެންދާނީ ބަޔޯޑައިވާސިޓީ ނުވަތަ ދިގު މުއްދަތަށް ދެމެހެއްޓެނިވި ގޮތެއްގައި ކަމަށް ޝިޔާމް ވިދާޅުވިއެވެ. އަދި އެކަން ކުރާނީ ތިމާވެށީގެ އަސަރު ދެމެހެއްޓުމުގެ ފުރިހަމަ އަދި ދެފުށް ފެންނަ އެސެސްމަންޓުތަކަކާއެކު ކަމަށް ޝިޔާމް ވިދާޅުވިއެވެ. އިގްތިސޯދީ ގޮތުން، މި ޑައިވާސިފިކޭޝަންގެ ސަބަބުން، އީޖާދީ އުފެއްދުންތައް އިތުރުވެ، ނޫ އިގްތިސޯދުގެ އައު ފުރުސަތުތަކުގެ މައި މަރުކަޒަކަށް ދިވެހިރާއްޖެ ވެގެންދޭ. މި އެއްބަސްވުމުގެ ދަށުން މެރިން ޖިއޮލޮޖީ، ސަބްސީ އިންޖިނިއަރިން، އެންވަޔަރަންމަންޓަލް ސައިންސް އަދި މޮނިޓާކުރުން ފަދަ ދާއިރާތަކުން ފެންވަރު ރަނގަޅު ހުނަރުވެރި ވަޒީފާތައް އުފެދި، ރާއްޖޭގެ ކެޕޭސިޓީއާއި ތަޖުރިބާ އިތުރުވެގެންދާނެ، ޝިޔާމް ވިދާޅުވި ގޮތުގައި ރާއްޖޭގައި ވެސް އިގްތިސޯދީ ކުރިއެރުމެއް ގާއިމުކޮށް، ފުދުންތެރި މުސްތަގުބަލެއް ކަށަވަރު ކުރަން އެބަޖެހެއެވެ. ތިމާވެށީގެ އެކި ކަންކަމުގައި ވަކާލާތު ކުރައްވާ ޝައުނާގެ މި ކަންބޮޑުވުންތަކުގެ ތަފްސީލު 'ސަން'އަށް މިއަދު ދެއްވަމުން އިތުރަށް ވިދާޅުވީ، މި ސަރަހައްދުގެ ގިނަ ކަނޑުތަކުން ތެލާއި މައުދަން ހޯދުން ފަދަ މަސައްކަތްތައް ކުރުމުން އެތައް ދިރުމެއް ނެތި ގޮސްފައިވާ ކަމަށެވެ. އެފަދަ ނިންމުންތައް ގިނަ ގައުމުތަކުން ނިންމާފައި ހުރީ އެހާ ބޮޑު ވިސްނުމެއް ނެތި ކަމަށާއި އެ ގައުމުތަކުގައި އެ ފަދަ މަސައްކަތްތައް ކުރުމުން މަސްވެރިކަމަށް ކުރި އަސަރާއި ކަނޑުގެ ދިރުންތައް ވަރަށް ބޮޑަށް ނެތި ދިޔަ މަންޒަރު ފެނުނު ކަމަށް އޭނާ ވިދާޅުވިއެވެ.