ކާބޯތަކެތީގެ ހިދުމަތް ދޭ ތަންތަނުގެ ރަޖިސްޓްރޭޝަން ފީ އާއި ކެޓަގަރީ ފީ %50 ކުޑަކޮށްފި އެވެ.
ވީ ކިހިނެއް؟ - މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ)ން މިއަދު ބުނީ، މި ލުއި ގެނެސްފައިވަނީ މިއަދުން ފެށިގެން ދެ އަހަރުގެ މުއްދަތަކަށް ކަމަށެވެ.
ތަފްސީލް - ކާބޯތަކެތީގެ ހިދުމަތް ދޭ ތަންތަނާއި ފަރާތްތައް ރަޖިސްޓްރީކޮށް، ލައިސަންސް ދޫކުރަނީ އެމްއެފްޑީއޭން އެކުލަވާލާފައިވާ ގަވައިދެއްގެ ދަށުން އެ އިދާރާއިންނެވެ.
އެ ގަވައިދުގެ ދަށުން، ކާބޯތަކެތީގެ ހިދުމަތްދޭ ތަންތަން 14 ކެޓަގަރީއަކަށް ބަހާލާފައިވެ އެވެ. ހުރިހާ ތަނަކަށް ވެސް ރަޖިސްޓްރޭޝަން ފީގެ ގޮތުގައި ނަގަނީ 500ރ. އެވެ. މިއީ އެއް ފަހަރު ނަގާ ފީއެއް ކަމަށް ގަވައިދުގައިވެ އެވެ.
މި ބަދަލާ އެކު ދެން ރަޖިސްޓްރޭޝަން ފީގެ ގޮތުގައި ނަގާނީ 250ރ. އެވެ.
މީގެ އިތުރުން، އަހަރީ ފީގެ ގޮތުގައި 2،000ރ. އިން ފެށިގެން އެކި އަގުތައް އެކި ކެޓަގަރީތަކުގެ ތަންތަނުން ނަގަ އެވެ. މިއަދުން ފެށިގެން ދެން ދައްކަންޖެހޭނީ މި އަގުތަކުގެ ދެބައިކުޅަ އެއްބަ އެވެ.
އެގޮތުުން، މިހާރު ނަގާ އަގުތަކަކީ:
ހޮޓާ، ކެފޭ، ރެސްޓޯރެންޓު، ކެންޓީނު ފަދަ އިކޮނޮމިކް މިނިސްޓްރީގައި ރަޖިސްޓްރީކޮށްގެން ހިންގާ ތަންތަނުން 2،000ރ.؛ އިތުރުވާ ކޮންމެ ބަދިގެ، ސާވިން އޭރިއާއަކަށް 100ރ. އަދި އިތުރުވާ ކޮންމެ 50 ގޮނޑިއަކަށް ވެސް 100ރ.
ކޭޓަރިން، ބޭކަރީ އަދި ޕޭސްޓްރީ ޝޮޕްތަކުން 1،000ރ.
ބަތްޕާރުސަލް ހަދައި ވިއްކާ ޓޭކްއަވޭ ތަންތަނުން 2،000ރ.
ވިޔަފާރި އުސޫލުން ކާބޯތަކެތި ތައްޔާރުކޮށް ފޯރުކޮށްދޭ ބަދިގެތަކުން 2،000ރ.
ހެދިކާ ވިއްކާ ތަންތަނުން 2،000ރ.
ޖޫސް ފަދަ ބުއިންތައް އެކަނި ވިއްކާ ތަންތަނުން 2،000ރ.
މަގުމަތީގައި ކާނާ ވިއްކާ ތަންތަނާއި ގާޑިޔާ އަދި އެހެން އުޅަނދުތަކުން 500ރ.