ސަރަހައްދީ ރަން ކާމިޔާބީއާއެކު ރާއްޖެއަކީ ފުޓްސަލްގައި މުސްތަގްބަލް އޮތް ބައެއްކަން ކުޅުންތެރިން ސާބިތުކޮށްދީފިއެވެ. ރާއްޖޭގައި ފުޓްސަލްގެ ގަވާއިދުތަކާ އެއްގޮތަށް ގާއިމުކޮށްފައިވާ އިންޑޯ ފެސިލިޓީއެއް ނެތް ނަމަވެސް ސަރަހައްދީ ފުޓްސަލްގެ ރަސްކަމާއެކު އެ ކުޅުންތެރިންގެ އެންމެ ބޮޑު އެއް އާދޭހަކީ އިންޑޯ ފުޓްސަލް އެރީނާއެއް އަޅައިދިނުމެވެ. ރާއްޖެއިން މުބާރާތުގެ ތަށި އުފުލާލީ ސަރަހައްދުގެ ހުރިހާ ޓީމެއް ބަލިކުރުމަށްފަހު ސައްތައިން ސައްތަ މޮޅުވުމުގެ ރެކޯޑަކާއެކު އެވެ. ބޫޓާނާ ދެކޮޅަށް ކުޅުނު މެޗުން ހޯދި ތިން ޕޮއިންޓާއެކު ރާއްޖެއަށް މުބާރާތް ކަށަވަރުވީ ބާކީ މެޗެެއް އޮއްވައެވެ. މުބާރާތުގެ ކުރިން ޗައިނާގެ ފެންވަރު ރަނގަޅު އިންޑޯ ފެސިލިޓީއެއްގައި ބޭރުގެ ތަޖުރިބާކާރު ކޯޗު އުޒްބެކިސްތާންގެ ފާރޫކް ޒަކީރޯވްގެ އިރުޝާދުގެ ދަށުން ކުރިއަަށްގެންދިޔަ ތަމްރީނުތަކުގެ ސަބަބުން ތަފާތުތަކެއް ފެނިގެންދިޔަ ކަމަށް އެފްއޭއެމުގެ އިސްވެރިންވެސް ގަބޫލުކުރެއެވެ. އަދި ރާއްޖޭގައި ތިބި ފުޓްސަލް ކޯޗުންވެސް ވަނީ މުބާރާތުގައި ދިވެހި ޓީމުގެ ކުޅުން ތަފާތު ވާހަކަ ދައްކާފައެވެ. އަދި މިއީ އިންޑޯއެއްގައި ފެންވަރު ރަނގަޅު ތަމްރީނުތަކެއް ލިބިއްޖެނަމަ ތަފާތު ދެއްކިދާނެ ކަމެއްގެ ގޮތުގައި އެ ކޯޗުންވެސް ގަބޫލުކުރިއެވެ. ތާރީހީ ބޮޑު ކާމިޔާބީއަށްފަހު އެނބުރި ރާއްޖެ އައުމަށްފަހު "ސަން" އާއި ވާހަކަދައްކަމުން ކޮންމެ ކުޅުންތެރިއެއްވެސް ވަނީ މި ކާމިޔާބީ ތަކުރާރުކުރާ ނަމަ އިންޑޯ ފެސިލިޓީއެއް ރާއްޖޭގައި ހުރުން މުހިންމުކަން ހާމަކޮށްފައެވެ. އަދި އެއީ މުސްތަގްބަލުގައި މިއަށްވުރެ ރަނގަޅު ނަތީޖާތަކެއް ނެރުމަށް ލިބިގެންދާނެ ބޮޑު ހިތްވަރެއްގެ ގޮތުގައި އެ ކުޅުންތެރިން ފާހަގަކުރިއެވެ. ސަރަހައްދީ ޓްރޮފީއާއެކު ރާއްޖޭގެ ގައުމީ ފުޓްސަލް ޓީމު އެނބުރި ރާއްޖެ އައުމުން ހޫނު މަރުހަބާއެއް ކިޔަނީ-- ސަން ފޮޓޯ: ނަދީމް "ފުޓްސަލް ޑީވެލޮޕްކުރުން އެންމެ މުހިންމު ކަމަކީ، "އިންޑޯ" ދަނޑުތައް ޑިވެލޮޕްކޮށްގެން ދެން ވާނީ، ފެސިލިޓީތައް ޑިވެލޮޕްކޮށްގެން ދެން ކޮމްޕީޓް (ވާދަ) ކުރެވޭނީ" ގައުމީ ފުޓްސަލް ޓީމުގެ ކުޅުންތެރިޔާ ހުސެއިން ސުހައިލް (ސޮކޭ) "ސަން" އާއި ވާހަކަދައްކަމުން ބުންޏެވެ. "ސަން" އާއި ވާހަކަދައްކަމުން ޓީމުގެ ކެޕްޓަން އަދި މުޅި މުބާރާތުގެ އެންމެ ގިނަ ލަނޑުޖެހި ކުޅުންތެރިޔާ މުހައްމަދު އިމްރާން (އިންމި) ވެސް ވަނީ ފެސިލިޓީއެއްގެ މުހިންމުކަން ފާހަގަކޮށްފައެވެ. އެގޮތުން ރަނގަޅު ފެންވަރުގެ ފެސިލިޓީއަކާއެކު ޕްރޮފެޝަނަލް ލީގެއް އޮތުން މުހިންމުކަން އޭނާ ފާހަގަކުރިއެވެ. "ރަނގަޅު ފެސިލިޓީސްތަކާއެކު ކޮމްޕެޓިޓިވްކޮށް ރަނގަޅު ޕްރޮފެޝަނަލް ލީގެއް އައިސްގެން ދެން ރާއްޖޭގައި ފުޓްސަލް ކުރިއަރާނީ" ޓީމުގެ ކެޕްޓަން އިންމި ބުންޏެވެ. ދެކުނު އޭޝިއާގައި ފުޓްސަލްގެ ފޯރި އެންމެ ބޮޑު އެއް ގައުމަކީ ރާއްޖެއެވެ. އިންޑޯ ފެސިލިޓީއެއް އޮތްނަމަ އޭޝިއާއާއި ދުނިޔޭގެ ލެވެލްގައި ވެސް ރާއްޖެއަށް ތަފާތު ދެއްކިދާނެކަމަށް ތަޖުރިބާކާރު ގޯލްކީޕަރު އިބްރާހިމް ނާޖިހު (ހޭޓް) ދެކެއެވެ. "މި ފެނުނީ އިންޑޯ ޕިޗެއް ނެތި މި ކާމިޔާބީ ހޯދިތަން، އިންޑޯ ޕިޗެއް އޮތްނަމަ ދުނިޔޭގެ ލެވެލްގައި ރާއްޖެ ފެންނާނެ" ހޭޓް ބުންޏެވެ. މީގެއިތުރުން ޓީމުގައި ތިބި ސީނިއާ ކުޅުންތެރިންގެ ތެރެއިން އަބްދުﷲ ޖުނައިދު (ޖެންނޭ) ވެސް ވަނީ އިންޑޯ ޕިޗެއްގެ މުހިންމުކަން ފާހަގަކޮށް "ސަން" އާއި ވާހަކަދައްކާފައެވެ. "އެންމެ ފުރަތަމަވެސް ކުރަންޖެހޭ ކަމަކީ އިންޑޯ ޕިޗެއް އޮތުން، ދެން ރަނގަޅު ކޯޗެއް ހުރުުން" ޖެންނޭ ބުންޏެވެ. ހުސެއިން ޝަރީފް (އޮންލީ) އަކީ މުޅި ޓީމުގައިވެސް ހުރި، މިވަގުތު ބޭރު ގައުމެއްގެ އިންޑޯއެއްގައި ވަރުގަދަ ގައުމުތަކަކާ ދެކޮޅަށް އިންޑޯ ފުޓްސަލް ކުޅުނު އެއް ކުޅުންތެރިޔާއެވެ. އަދި ރާއްޖޭގައި މިހާރު ހުރި ދަނޑުމަތީގައި އެންމެ ވިސްނުންތޫނު އެއް ކުޅުންތެރިޔާއެވެ. އޮންލީވެސް ވަނީ އިންޑޯ ޕިޗެއް ރާއްޖޭގައި އޮތްނަމަ ބޮޑު ތަފާތެއް ފެންނާނެކަމަށް ބުނެފައެވެ. "ދެން ހުރިހާ އެންމެންވެސް ބުނާހެން އިންޑޯ ޕިޗެއް ދެން ބޭނުންވަނީ، އިންޑޯ ޕިޗެއް ލިބިގެން އެ ޕިޗުގަ މުބާރާތް ކުޅެގެން ޓީމެއް ނަގައިގެން، ކޯޗަކާއެކު ދެތިން މަސްވަންދެން ރަނގަޅު ޕްރެކްޓިހެއް ކޮށްގެން ތަފާތު ފެންނާނެ" އޮންލީ ބުންޏެވެ. ރާއްޖޭގެ ހަމަލާތަކުގެ އިތުރުން ޑިފެންސުގައިވެސް ފާހަގަކޮށްލެވޭ މޮޅު ކުޅުމެއް ދެއްކި އަލީ ޝިޔާހު (ޝިޔަޅޭ) ވަނީ ރާއްޖޭގެ ފުޓްސަލް ކޮމިއުނިޓީގެ ފަރާތުން އިންޑޯ އަޅަން ތާއިދު އޮތްކަން ފާހަގަކޮށްފައެވެ. "ޔަގީނުންވެސް ކުޅުންތެރިންގެ ފަރާތުން ފުރިހަމަ އެއްބާރުލުން ލިބޭނެ މިކަމަށް، ބޭނުންވަނީ (އިންޑޯ ފުޓްސަލް) ސްޓޭޑިއަމެއް" ޝިޔަޅޭ ބުންޏެވެ. ސަރުކާރުގެ ދެ މިނިސްޓްރީ އާއި އެޗްޑީސީން، 24 ފެބްރުއަރީ 2025 ގައި، ނެޓްބޯލް އާއި ފުޓްސަލް ކޮމްޕްލެކްސްގެ ބިން ހަވާލުކުރުމުގެ އެއްބަސްވުމުގައި ސޮއިކުރިއިރު، މި ކޮމްޕްލެކްސްގެ އެއްވެސް އަލިމަގެއް އަދި ފެންނަން ނެތެވެ. ނަމަވެސް ކުޅިވަރު ވަޒީރު ވިދާޅުވީ މި ކާމިޔާބީއާއެކު އެ މަސައްކަތް އަވަސްކުރަން ޖެހިއްޖެ ކަމަށެވެ.