ޓެކްސީ ސެންޓަރެއް ހަދާނަމަ ފުރިހަމަވާންޖެހޭ ޝަރުތުތައް ފަސޭހަކޮށް، ހުއްދަ ނަގައިގެން އޮންލައިންކޮށް ވެސް ޚިދުމަތް ދެވޭގޮތަށް ޓެކްސީ ގަވައިދަށް އިސްލާހުތަކެއް ގެނެސްފިއެވެ. މިއަދު ގެޒެޓުކުރި އިސްލާހުގައިވާ އެއް ބަދަލަކީ ޓެކްސީ ސެންޓަރެއް ރަޖިސްޓްރީ ކުރުމަށް ޓަކައި ބޭނުންވާ އުޅަނދާއި ޑްރައިވަރުންގެ އެންމެ، މަދު އަދަދު 100 އިން 50 އަށް މަދުކުރުމެވެ. މިނިސްޓްރީން ބުނީ މީގެ ސަބަބުން އައު ސެންޓަރުތައް އުފެދުމަށް، ހުރި ހުރަސްތައް ނެތި، ގިނަ ބަޔަކަށް މި ދާއިރާއަށް، ވަނުމުގެ ފުރުސަތު ހުޅުވޭނެ ކަމަށެވެ. އަދި އޭގެ ސަބަބުން މާކެޓުގައި، ވާދަވެރިކަން އުފެދި އާންމުންނަށް ލިބޭ ޚިދުމަތުގެ ފެންވަރު، ރަނގަޅުވާނެ ކަމަށް ބެލެވޭކަމަށް ވެސް ބުންޏެވެ. މީގެ އިތުރުން ލައިސަންސް އޮންނަ ޓެކްސީ ޑްރައިވަރުންނަށް އެއް ވަގުތެއްގައި ދެ ޓެކްސީ ސެންޓަރެއްގައި ރަޖިސްޓްރީވެގެން، މަސައްކަތް ކުރުމުގެ ފުރުޞަތު ވެސް ދެން ލިބޭނެ ކަމަށާއި އޭގެ ސަބަބުން ޑްރައިވަރުންނަށް، ލިބޭ އާމްދަނީ އިތުރުކުރުމަށް މަގުފަހިވާނެ ކަމަށް ވެސް މިނިސްޓްރީން ބުންޏެވެ. އަދި ޚިދުމަތަށް އެންމެ ބާރުބޮޑު ވަގުތުގައި ޑިމާންޑާ އެއްވަރަށް ޚިދުމަތް ފޯރުކޮށްދިނުމަށް ސެންޓަރުތަކަށް އިތުރު ފަސޭހައަކަށް ވާނެ ކަމަށް ވެސް ބުންޏެވެ. މީގެ އިތުރުން ދަތުރުވެރިންގެ ރައްކާތެރިކަން ކަށަވަރުކުރުމަށް ޓަކައި، މޮބައިލް އެޕްލިކޭޝަން ނުވަތަ އޮންލައިން ޕޯޓަލްތައް މެދުވެރިކޮށް ޓެކްސީ ޚިދުމަތް ދޭން ބޭނުންވާ ފަރާތްތަކުން މިނިސްޓްރީގެ ޚާއްޞަ ހުއްދައެއް ހޯދައިގެން އެ ގޮތަށް ޚިދުމަތް ދެވޭނެކަމަށް ވެސް އިސްލާހުގައިވެއެވެ. "މިގޮތަށް ހުއްދަ ހޯދައިގެން ޑިޖިޓަލް ޚިދުމަތް ދިނުމަކީ، ޚިދުމަތްދޭ ފަރާތްތައް ޖަވާބުދާރީކުރުވުމަށް ލިބޭ ބާރެއް،" މިނިސްޓްރީން ބުންޏެވެ. ހަމައެއާއެކު އެމްޓީސީސީން ޓެކްސީ ޚިދުމަތް ފަށަން ތައްޔާރުވަމުން އަންނައިރު އެކަމަށް ފަހިކުރުމަށް ވެސް މާއްދާއެއް ވަނީ ހިމަނައިފައެވެ. އެގޮތުން ކުންފުންޔަކުން، ޓެކްސީ ދަތުރުފަތުރުގެ ޚިދުމަތް ދޭނަމަ އެކަމަކީ، އެ ފަރާތެއްގެ މެންޑޭޓުގައި ހިމެނޭ ކަމެއްކަން ކަށަވަރުކުރަންޖެހޭ ގޮތަށް ވަނީ މާއްދާއެއް އިތުރުކޮށްފައެވެ. އިސްލާހުތަކާ ގުޅިގެން މިނިސްޓްރީން ބުނީ، އެ ހުރިހާ ބަދަލުތަކެއްގެ މައިގަނޑު ބޭނުމަކީ ފަސިންޖަރުންނާއި ޚިދުމަތްދޭ ފަރާތްތަކަށް ވެސް މަންފާކުރާނެ، އިތުބާރު ހުރި އަދި ޒަމާނީ ޓެކްސީގެ ނިޒާމެއް ރާއްޖޭގައި ގާއިމުކުރުން ކަމަށެވެ.