އެމެރިކާއިން އެހީގެ ގޮތުގައި އުރުދުންއަށް އަހަރަކު ދޭ 1.45 ބިލިއަން ޑޮލަރު ކަނޑާލި ނަމަވެސް، ފަލަސްތީންގެ ޣައްޒާއާ މެދު އެމެރިކާގެ ރައީސް ޑޮނަލްޑް ޓްރަމްޕް ގެންގުޅުއްވާ ވިސްނުމަށް ތާއީދުނުކުރައްވާނެ ކަމަށް އުރުދުންގެ އަބްދުﷲ ރަސްގެފާން ވިދާޅުވެއްޖެ އެވެ.
އަބްދުﷲ ރަސްގެފާނާއި ޓްރަމްޕް އެމެރިކާގެ ރިޔާސީ ގަނޑުވަރުގައި މިއަދު ވަނީ ބައްދަލުކުރައްވާފަ އެެެވެ. މި ބައްދަލުކުރެއްވުމުގެ މުޅި ތަފުސީލު އަދި ހާމައެއް ނުކުރެ އެވެ.
ޣައްޒާއާ މެދު ޓްރަމްޕް ގެންގުޅުއްވާ ވިސްނުމަކީ، ޣައްޒާގެ ރައްޔިތުން އުރުދުން އާއި މިސްރުގައި ވަޒަންވެރިކުރުވުމެވެ.
މިކަމަށްޓަކައި މިސްރާއި އުރުދުންގެ ރުހުން ބޭނުންވާނެ ކަމަށް ޓްރަމްޕް ވިދާޅުވި ނަމަވެސް، މި ދެ ގައުމުން ވެސް ގެންގުޅެނީ ޣައްޒާގެ ރައްޔިތުން އެ މީހުންގެ އުފަން ބިމުން ބޭރުނުކުރުމުގެ ވިސްނުމެވެ.
ޓްރަމްޕް ވިދާޅުވި ގޮތުން ޣައްޒާ މިހާރު އެ އޮތީ އިންސާނުން ދިރިއުޅެން ކަމުދާ ވަރަށް ވުރެ ދަށު ދަރަޖާގަ އެވެ. ޣައްޒާގައި އާބާދުވުމަށް ވުރެ އަވައްޓެރި ގައުމުތަކުގައި ފަލަސްތީން މީހުން އާބާދުވުން މާ ރަނގަޅުވާނެ ކަމަށް ޓްރަމްޕް ވިދާޅުވި އެވެ.
ޣައްޒާ އަލުން ބިނާކުރުމަށް ފަހު އެ ބިން އޮންނާނީ އެމެރިކާގެ ބެލެހެއްޓުމުގައި ކަމަށްވެސް ޓްރަމްޕް ވިދާޅުވި އެވެ. އަދި ޣައްޒާ އާބާދުކުރަން ފަލަސްތީނަށް ފުރުސަތު ދުނެއްވާނެ ކަމަށްވެސް އޭނާ ވިދާޅުވި އެވެ.
ޣައްޒާ އަލުން އާބާދުކުރުމަށް ފަހު ފަލަސްތީންގެ އެއްވެސް މީހަކަށް އެ ބިމަށް ނުވަދެވޭނެ ކަމަށްވެސް ޓްރަމްޕް ވިދާޅުވި އެވެ.
ޓްރަމްޕްގެ މި ރޭވުމަށް ދުނިޔޭގެ އެތައް ގައުމަކުން ވަނީ ދެކޮޅުހަދާފަ އެވެ. ސައޫދީ އަރަބިއްޔާ އާއި މިސްރު އަދި އުރުދުންއިން ވެސް ވަނީ ވަރަށް ބޮޑަށް ނުރުހުން ފާޅުކޮށްފަ އެވެ.
ޑޮނަލްޑް ޓްރަމްޕް ހީކުރެއްވި ގޮތާ ޚިލާފަށް މިސްރާއި އުރުދުންއިން ޖަވާބުދިނުމުން ޓްރަމްޕް ވަނީ މި ދެގައުމަށް ބިރުދައްކަވައި، މިސްރަށާއި އުރުދުންއަށް އެމެރިކާއިން ދޭ އަހަރީ އެހީ ކަނޑާލާނެ ކަމަށް ވިދާޅުވެ އިންޒާރުދެއްވާފަ އެވެ.
އެމެރިކާގެ ރައީސްގެ މަގާމަށް ޓްރަމްޕް ވަޑައިގަތުމަށް ފަހު، އެމެރިކާއިން ގައުމުތަކަށް ދޭ އެހީ 90 ދުވަހަށް ވަނީ މެދުކަނޑާލާފަ އެވެ. އެކަމަކު މިސްރަށާއި އުރުދުންއަށް ދޭ އެހީ މެދުކަނޑައި ނުލައްވާ ކަމަށް ޚަބަރުތައް ބުނެ އެވެ.