އއ. ތޮއްޑޫ ކައުންސިލް އިދާރާގެ ކަރަންޓް ބިލް ނުދައްކައިގެން އެ އިދާރާ އިން ކަރަންޓް ކަނޑާލާފައި ހުންނަތާ މަސް ދުވަސް ވެއްޖެ ކަމަށް އެކައުންސިލް އިދާރާ އިން ބުނެފި އެވެ.
ތޮއްޑޫ ކައުންސިލްގެ ރައީސް މުހައްމަދު އިބްރާހިމް މިއަދު "ސަން" އަށް ވިދާޅުވީ އެކައުންސިލް އިދާރާ އިން މި އަހަރުގެ މިހާތަނަށް އެއްވެސް ކަރަންޓް ބިލަކަށް ފައިސާ ދައްކާފައިނުވުމުގެ ސަބަބުން މިދިޔަ މަހުގެ 22 ވަނަ ދުވަހުން ފެށިގެން ކަރަންޓް ކަނޑާލާފައިވާ ކަމަށެވެ. އަދި ބިލްތައް ނުދެއްކި ވަނީ ފިނޭންސް މިނިސްޓްރީ އިން ފައިސާ ނުދޭތީ ކަމަށާއި ގާތްގަނޑަކަށް އެއް ލައްކަ ވަރަކަށް ރުފިޔާ ކަރަންޓް ބިލްތަކަށް އަރާކަމަށް އޭނާ ވިދާޅުވި އެވެ.
"ތަފާތު އެތައް ފަހަރެއްގެ މަތިން ބިލްތަކަށް ފައިސާ ދެއްކުމަށް އެދި އަޅުގަނޑުމެންވާނެ ފިނޭންސް މިނިސްޓްރީގައި އެދިފައިވީ ނަމަވެސް މުސާރައިގެ އިތުރުން ފައިސާއެއް އަޅުގަނޑުމެނަކަށް ނުލިބޭ،" ތޮއްޑޫ ކައުންސިލްގެ ރައީސް ވިދާޅުވި އެވެ.
އޭނާ ވިދާޅުވީ 1790 މީހުންގެ އާބާދީއެއް އޮންނަ ތޮއްޑޫގައި ކައުންސިލް އިދާރާ އިން ރައްޔިތުނަށް ދޭންޖެހޭ ހިދުމަތްތައް ނުދެވޭ ކަމަށާއި ގިނަ ފަހަރަށް ހިދުމަތްދިނުމަށް މިހާރު ބޭނުންކުރަމުންދަނީ ސްކޫލު ކަމަށެވެ.
އެކަމާ ގުޅިގެން ފިނޭންސްގެ ބަހެއް ލިބޭ ގޮތްނުވެފައިވާ އިރު ގިނަ ކައުންސިލްތަކަކަށް ވަނީ އެމައްސަލަ ކުރިމަތިވެފަ އެވެ. އެގޮތުން ބަޖެޓް ނެތިގެން ފަސް ލައްކައަށް ވުރެ ގިނަ ރުފިޔާގެ ކަރަންޓް ބިލް ނުދައްކާ އެބަހުރި ކަމަށް ހއ. ކެލާ ކައުންސިލް އިދާރާ އިން ވެސް ވަނީ މިމަހުގެ ތެރޭގައި ބުނެފަ އެވެ.