ކޮންމެ ކުޅުންތެރިޔަކީވެސް ޤައުމީ ޖާރޒީގައި ޤައުމަށް ރީތިނަން ހޯދާ ކުޅުންތެރިޔަކަށްވުމަށް ކުޅިވަރާއިބެހޭ ވަޒީރު އިރުތިޝާމް އާދަމް އިލްތިމާސް ކުރައްވައިފިއެވެ.
އެކަމަނާ މިހެން އިލްތިމާސް ކުރެއްވީ އިއްޔެ ފެށި އޭޝިއަން ސެންޓްރަލް ޒޯން ވޮލީބޯޅަ މުބާރާތުގެ ހުޅުވުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.
މި ރަސްމިއްޔާތުގައި އެކަމަނާ ވިދާޅުވީ މި މުބާރާތުގައި ރާއްޖެއަށް ރަން ވަނައެއް ހޯދައިދީ، ޒުވާން ކުޅުންތެރިން ހިތްވަރު ގެނެސްދިނުމަށް އެދިވަޑައިގަންނަވާ ކަމަށާއި ޤައުމީ ވޮލީބޯޅަ ޓީމުން ރާއްޖެއަށް ރީތި ނަމެއް ހޯދައިދިނުމަށް ގަދައަޅައި މަސައްކަތްކޮށްދެއްވުމަށް އިލްތިމާސް ކުރައްވާ ކަމަށެވެ.
މީގެ އިތުރުން އެކަމަނާ ވިދާޅުވީ މިފަދަ ފުރުޞަތުތައް އަޅުގަޑުމެންނަށް ތަނަވަސްވެގެން މިދަނީ މިކަންކަން ތަނަވަސްކޮށްދެއްވުމަށް ޘާބިތު ލީޑަރެއް އަޅުގަނޑުމެންގެ ފަހަތްޕުޅުގައި ހުންނެވުމުން ކަމަށާއި އޭވީސީ މުބާރާތް ރާއްޖެއިން ކާމިޔާބުކުރުމަށް ދިވެހި ސަރުކާރުން ވަރަށް ބޮޑަށް އެދޭ ކަމަށެވެ. އަދި ވަކިން ޚާއްޞަކޮށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ ފުރިހަމަ އެއްބާރުލުމާއި އެހީތެރިކަން އަބަދުވެސް ލިބޭނެކަން ފާހަގަ ކުރައްވާ ކަމަށްވެސް އެކަމަނާ ވިދާޅުވިއެވެ.