އެޑިއުކޭޝަން އެކްސްޕޯ 2025ގެ ޑިޖިޓަލް ޕާޓްނަރެއްގެ ގޮތުގައި ދިރާގުން މިއަދު ސޮއިކޮށްފި އެވެ.ތައުލީމީ ދާއިރާއަށް ހާއްސަކޮށް ބާއްވާ މި އެކްސްޕޯ ކުރިއަށް ދާނީ އަންނަ ހުކުރު ދުވަހު އާއި ހޮނިހިރު ދުވަހު އެވެ. ކިއު ސްޓަޑީ މޯލްޑިވްސް އިން އިންތިޒާމްކޮށްގެން ބާއްވާ މި އެކްސްޕޯއަކީ ތައުލީމީ ގޮތުން ހުރި ފުރުސަތުތައް އަންނަން އޮތް ޖީލުތަކަށް ފަހި ކޮށްދިނުމުގެ މަގުސަދުގައި ބާއްވާ އެކްސްޕޯއެކެވެ. މި އެކްސްޕޯގައި ބައިނަލްއަގުވާމީ އެކި ޔުނިވާސިޓީތަކާއި ތައުލީމު ފޯރުކޮށްދޭ ފަރާތްތަކާއި ދަރިވަރުންނާއި ބެލެނިވެރިން އަދި މުހިންމު ސްޓޭކްހޯލްޑަރުން ބައިވެރިވާނެ އެވެ.އެ އެކްސްޕޯގައި ދިރާގު ގޭމާސް ގިލްޑްގެ ހާއްސަ ޔޫތު އެކްޓިވޭޝަން ޒޯނެއް ހިމެނޭނެ އެވެ. އެ ޒޯނުގައި ހުރިހާ އުމުރުފުރާއަކަށް ވެސް ބައިވެރިވެވޭފަދަ ހަރަކާތްތައް ކުރިއަށް ގެންދިއުމަށް ވަނީ ހަމަޖެހިފަ އެވެ. އެ ޒޯނުގައި ކުރިއަށްދާ ހަރަކާތްތަކުގެ ތެރޭގައި އެފްސީ25 ޒޯނާއި މައިންކްރާފްޓާއި އެސްޓްރޯ ބޮޓް އަދި ބްރޯލްހަލާއާ އެކު ކުޑަކުދިންނަށް ހާއްސަ ޒޯނެއްގެ އިތުރުން ސްޓްރީޓް ފައިޓާ 6 އާއި މޯޓަލް ކޮމްބަޓް 1 އާއި އަދި ނަރޫޓޯ އެކްސްއާ އެކު ފައިޓިން ގޭމް ޒޯނާއި ޕަވްލޯވް ޝެކް އަދި ބީޓް ސޭބާއާ އެކު ވީއާރު ޒޯނާއި ގްރޭން ޓުރިޒްމޯއާ އެކު ރޭސިން ސިމިއުލޭޝަން ޒޯނެއް ވަނީ ހިމަނައިފަ އެވެ.ދިރާގުން ބުނީ, މި ޒޯނަށް ޒިޔާރަތްކުރާ ހުރިހާ ފަރާތްތަކަށް ވެސް މި ހުރިހާ ގޭމްތަކެއްގައި މުޅިން ހިލޭ ބައިވެރިވުމުގެ ފުރުސަތު ހުޅުވާލާފައިވާ ކަމަށެވެ.އެ ކުންފުނިން އަންނަނީ ތައުލީމީ އެކި ފުރުސަތުތައް ފަހިކޮށްދިނުމަށާއި ޒުވާނުން ބާރުވެރިކުރުމަށް ހިންގާ އެކިއެކި ހަރަކާތްތަކުގައި އެންމެ ކުރީސަފުގައި ބައިވެރިވެ އެއްބާރުލުންދެމުންނެވެ.