މޫސުމީ ބަދަލުތަކުގެ ސަބަބުން ކުރިމަތިވާ ގެއްލުންތަކުން އަރައިގަތުމަށް ދޭ އެހީތެރިކަން އިތުރުކުރުމަށް ދިވެހިރާއްޖެއިން ގޮވާލައިފިއެވެ. ރާއްޖެއިން މިކަމަށް ގޮވާލީ އދ ގެ އިންސާނީ ހައްގުތަކާ ބެހޭ މަޖިލީހުގެ 62 ވަނަ ދައުރުގައި، މޫސުމީ ބަދަލުތަކުން އިންސާނީ ހައްގުތަކަށް ކުރާ އަސަރު ދެނެގަތުމާ ގުޅޭގޮތުން ބޭއްވި ބައްދަލުވުމުގައެވެ. ޖެނީވާގައި ހުންނަ އދ ގެ އޮފީސްތަކަށް ރާއްޖެއިން ކަނޑައަޅުއްވާފައިވާ ދާއިމީ މަންދޫބު ޑރ. ސަލްމާ ރަޝީދު މި ބައްދަލުވުމުގައި ވާހަކަދައްކަވަމުން، ހުރިހާ ގައުމުތަކުން ވެސް "މަލްޓި ޑައިމެންޝަނަލް ވަލްނަރަބިލިޓީ އިންޑެކްސް" ބަލައިގަތުމަށް ބާރުއެޅުއްވިއެވެ. މިއީ އިގްތިސާދީ، ތިމާވެށި، އަދި އިޖުތިމާޢީ ގޮތުން ކުރިމަތިވާ ނުރައްކާތަކުން އަރައިގަތުމަށް ގައުމެއްގެ ނާޒުކުކަމާއި ގާބިލުކަން ހުރި މިންވަރު ދެނެގަތުމަށް އދ އިން އެކުލަވާލާފައިވާ ބައިނަލްއަގުވާމީ މިންގަނޑެކެވެ. ރާއްޖޭގެ ފަރާތުން އިއްވި ބަޔާނުގައި، ކާބޯތަކެތީގެ ރައްކާތެރިކަމާއި މޫސުމީ ވިލުންތެރިކަމާ ދެމެދު އޮތް ގުޅުމުގެ މައްޗަށް އަލިއަޅުވާލާފައެވެ. އެގޮތުން ރާއްޖޭގެ ދޮށީގެ މަސްވެރިކަމަކީ ދެމެހެއްޓެނިވި ގޮތެއްގައި މަސްވެރިކަން ބެލެހެއްޓުމުގެ ނަމޫނާ މިސާލެއްކަން ފާހަގަކޮށް، ރަށު ފެންވަރުގައި ކުރެވޭ މިފަދަ މަސައްކަތްތަކުގެ ސަބަބުން މޫސުމީ ބަދަލުތަކަށް ކުރިމަތިލުމުގެ ގާބިލުކަން އިތުރުވާކަމަށް ރާއްޖެއިން ވަނީ ބުނެފައެވެ. https://x.com/MDVinGeneva/status/2067982816495685902 މީގެއިތުރުން މޫސުމީ ބަދަލުތަކާ ގުޅިގެން އުފައްދާފައިވާ ބައިނަލްއަގުވާމީ ފަންޑުތަކަށް، ޚާއްސަކޮށް "ފަންޑް ފޯ ރެސްޕޮންޑިން" ފަދަ ވަސީލަތްތަކަށް ބޭނުންވާ ފައިސާ ފުރިހަމައަށް ހަމަޖެއްސުމަށް ރާއްޖެއިން ވަނީ ގޮވާލާފައެވެ. އަދި މޫސުމީ ކަންކަމާ ގުޅިގެން ހިލޭ އެހީގެ ގޮތުގައި ލިބޭ ފައިސާގެ ނިޒާމު ހަރުދަނާކުރުމަށް ވެސް ގޮވާލިއެވެ. މި ދައުރުގެ ހަވާސާގައި ބޭއްވި ތަފާތު ސަގާފަތްތައް ދައްކާލުމުގެ ހަރަކާތެއްގައި ޖެނީވާގައި ހުންނަ ރާއްޖޭގެ ދާއިމީ މިޝަނުން ވަނީ ބައިވެރިވެފައެވެ. މި ހަރަކާތުގައި ގާއިމުކުރި ރާއްޖޭގެ ސްޓޯލުން ދިވެހިރާއްޖޭގެ މުއްސަނދި ސަގާފީ ތަރިކައާއި، އަތްތެރި މަސައްކަތްތެރިކަމާއި، ދިވެހި ކާނާގެ ރަހަތަކުގެ އިތުރުން އަދަބިއްޔާތު ވަނީ ދައްކާލާފައެވެ. މި ހަރަކާތަށް ޒިޔާރަތްކުރި ފަރާތްތަކަށް ރާއްޖޭގެ ޚާއްސަ އާދަކާދަތަކާއި، ދިވެހިވަންތަކަން ބިނާވެފައިވާ ގޮތުގެ މައުލޫމާތު ފޯރުކޮށްދީފައި ވާއިރު، މިއީ ބައިނަލްއަގުވާމީ މައިދާނުގައި ރާއްޖޭގެ ތަސައްވުރު ރަނގަޅުކުރުމަށް ކުރެވުނު މުހިންމު މަސައްކަތެއްގެ ގޮތުގައި ފާހަގަކުރެވެއެވެ.