ނޯވޭގެ ޕްރައިމަރީ ސްކޫލްތަކުގައި ކިޔަވާ ކުދިން ޖެނެރޭޓިވް އާޓިފިޝަލް އިންޓެލިޖެންސް (އޭއައި) ޓޫލްތައް ބޭނުންކުރުން އެގައުމުގެ ސަރުކާރުން މަނާކޮށްފިއެވެ. ނޯވޭގެ ބޮޑުވަޒީރު ޔޯނަސް ގާ ސްޓޭރޭ ވިދާޅުވި ގޮތުގައި، އޭއައި ޓޫލްތަކުގެ ސަބަބުން ކުދިން އަމިއްލައަށް އުނގެނުމަށް ކުރަންޖެހޭ މުހިންމު މަސައްކަތްތައް ދޫކޮށްލުމުގެ ފުރުސަތު ބޮޑުވެއެވެ. އަދި މި ދުވަސްވަރު ސްކޫލްތަކުން އެންމެ ބޮޑު އިސްކަމެއް ދޭންޖެހޭނީ ކުދިންނަށް ލިޔުމާއި، ކިޔުމާއި، ހިސާބު ހަދަން ދަސްކޮށްދިނުމަށް ކަމަށް ވެސް އޭނާ ފާހަގަކުރެއްވިއެވެ. މި އައު ގަވާއިދަށް އަމަލުކުރަން ފެށުމަށް ހަމަޖެހިފައިވަނީ އަންނަ އޮގަސްޓް މަހުގެ ފަހުކޮޅު ފެށޭ އައު ދިރާސީ އަހަރާއެކުގައެވެ. މި ބަދަލުގެ އަސަރު އެންމެ ފުރަތަމަ ގްރޭޑުން ފެށިގެން ހަތްވަނަ ގްރޭޑާ ހަމައަށް، އެބަހީ އުމުރުން 6 އަހަރާއި 13 އަހަރާ ދެމެދުގެ ކުދިންނަށް ކުރާނެއެވެ. ނަމަވެސް، އުމުރުން 14 އަހަރާއި 16 އަހަރާ ދެމެދުގެ ކުދިންނަށް ޓީޗަރުންގެ ބެލުމުގެ ދަށުން އޭއައި ބޭނުންކުރުމުގެ ހުއްދަ އޮންނާނެއެވެ. އަދި 17 އަހަރުން މަތީގެ ކުދިންނަށް އަމިއްލައަށް ޒިންމާދާރުކަމާއެކު އޭއައި ބޭނުންކުރުމަށް ވަނީ ހިތްވަރުދީފައެވެ. https://sun.mv/223419 މިއީ ސްކޫލް މާހައުލުން ޓެކްނޮލޮޖީގެ ނޭދެވޭ އަސަރުތައް ކުޑަކުރުމަށް ނޯވޭއިން އެޅި ފުރަތަމަ ފިޔަވަޅެއް ނޫނެވެ. މީގެކުރިން 2024 ވަނަ އަހަރު އެގައުމުގެ ސްކޫލްތަކުގައި ސްމާޓްފޯނާއި ޓެބްލެޓް ބޭނުންކުރުން މަނާކުރުމުން ވަރަށް ބޮޑު ކާމިޔާބީއެއް ލިބިފައިވާކަން ފާހަގަކުރެވެއެވެ. އެ ފިޔަވަޅުގެ ސަބަބުން ކުދިންގެ މެދުގައި ގަނާކުރުން (ބުލީކުރުން) މަދުވެ، ކިޔެވުމުގެ ނަތީޖާ ރަނގަޅުވެ، އަދި ނަފްސާނީ ދުޅަހެޔޮކަން އިތުރުވެގެން ގޮސްފައިވެއެވެ. މީގެ އިތުރުން، ނޯވޭއިން ދަނީ އުމުރުން 16 އަހަރުން ދަށުގެ ކުދިންނަށް ސޯޝަލް މީޑިއާ ބޭނުންކުރުން މަނާކުރުމާ ބެހޭ ބިލެއް މި އަހަރުގެ ނިޔަލަށް ޕާލިމަންޓަށް ހުށަހެޅުމަށް ތައްޔާރުވަމުންނެވެ. މިފަދަ ފިޔަވަޅުތަކެއް އެމެރިކާގައިވެސް އެޅުމަށް މަސައްކަތް ކުރަމުންދާއިރު، އެގައުމުގެ ސެނެޓުން ދަނީ ކުޑަކުދިން އޭއައި ޗެޓްބޮޓްތަކުން ރައްކާތެރިކުރުމާ ބެހޭ ގާނޫނެއް ފާސްކުރުމަށް ބަހުސްކުރަމުންނެވެ.