ވެމްކޯގެ ހިދުމަތް ދެމުން އަންނަ އަތޮޅުތަކުގެ ރަށްތަކުގެ ކުނީގެ ހިދުމަތުގެ ބިލް ކަރަންޓް ބިލާ އެއްކޮށް ފޮނުވާ ގޮތަށް އަންނަ އަހަރު ހަމަޖައްސަން ނިންމައިފި އެވެ.
ވެމްކޯ، ސަދަން އޮޕަރޭޝަންސްގެ މެނޭޖިން ޑިރެކްޓަރު އަހުމަދު ޝާފިއު ދައިލަތުގެ މީޑިއާ، ޕީއެސްއެމްގައި ވިދާޅުވީ
އަންނަ ޖެނުއަރީ މަހުން ބިލުން ފެށިގެން މާލެ ސަރަހައްދާ އެއްގޮތަށް، ރަށްރަށުގައި ވެސް ވެމްކޯގެ ބިލު، އެ ތަނެއްގެ ކަރަންޓު ބިލާ އެއްކޮށް ފޮނުވޭނެ އިންތިޒާމު ހަމަޖެހިގެން ދާނެ ކަމަށެވެ.
ވެމްކޯ އަކީ 2016 އިން ފެށިގެން ހިދުމަތް ދެމުން އަންނަ ކުންފުންޏެކެވެ. މިހާތަނަށް އެ ކުންފުނިން އެންމެ ބޮޑު އިސްކަމެއް ދީފައިވަނީ މާލެ ސަރަހައްދުގެ އިތުރުން، އައްޑު އާއި ފުވައްމުލަކުގެ ކުނި މެނޭޖުކުރުމަށެވެ. އަދި ވެމްކޯ އިން މި އަހަރު ހިދުމަތް ދޭން ފެށި ސަރަހައްދުތަކުގެ ތެރޭގައި ތިނަދު އާއި ކުޅުދުއްފުށި ސިޓީ ވެސް ހިމެނެ އެވެ.
އަދި މީގެ ހަފުތާއެއްހާ ދުވަސް ކުރިން ކ. ހިންމަފުށީގައި ވެސް ވެމްކޯގެ ހިދުމަތް ފަށާފައިވެ އެވެ.
ޝާފިއު ވިދާޅުވީ ރަށްތަކުގައި ވެމްކޯގެ ޚިދުމަތް ފަށަނީ، ކުނި މެނޭޖުކުރުމުގެ ޚިދުމަތް ފަށަން އެ ރަށެއްގެ ކައުންސިލުން ވެމްކޯއާއެކު ޕާޓްނާޝިޕް އުސޫލުން ކުރާނެ އިންވެސްޓަށް ވެސް ބެލުމަށް ފަހު ކަމަށެވެ.
އެ ކުންފުނިން ބުނީ އަންނަ އަހަރުގެ ތެރޭގައި ވެމްކޯގެ ޚިދުމަތް އިތުރު ރަށްތަކަށް ފުޅާކުރުމުގެ މަސައްކަތް ކުރާނެ ކަމަށެވެ. ނަމަވެސް މިހާރު އަލަށް ރަށެއްގައި ޚިދުމަތް ފެށުން ބިނާވެފައި އޮތީ ކައުންސިލުން އެކަމަށް އެދޭ މިންވަރަކުން ކަމަށް ވިދާޅުވިއް ޝާފިއު ވިދާޅުވި އެވެ.