ދަތުރުފަތުރަށް މި އަހަރުގެ ބަޖެޓުގައި ކަނޑައަޅާފައިވާ އަދަދަށް ވުރެ ތިން މިލިއަން އިތުރަށް މިއަހަރު މިހާތަނަށް ހޭދަވެ، މި ސަރުކާރުގެ ވެރިންގެ ދަތުރުފަތުރުގެ ޖުމްލަ ހަރަދު 231 މިލިއަން ރުފިޔާއަށް އަރާފައިވާ ކަމަށް ފިނޭންސް މިނިސްޓްރީގެ ތަފާސް ހިސާބުތަކުން ދައްކައިފި އެވެ.
ފިނޭންސް މިނިސްޓްރީން ކޮންމެ ހަފްތާއަކު އާންމުކުރާ ތަފާސް ހިސާބުތަކުން އެނގޭ ގޮތުގައި، ބަޖެޓުގައި ދަތުރުފަތުރަށް ކަނޑައަޅާފައިވަނީ 228 މިލިއަން ރުފިޔާ އެވެ. އަދި ސަޕްލިމެންޓްރީ ބަޖެޓުގައި ވެސް ދަތުރުފަތުރުގެ ބަޖެޓު ކޯޑަށް އިތުރު އަދަދެއް ކަނޑައަޅާފައެއް ނުވެ އެވެ.
ބަޖެޓުގައިވާ ގޮތުން ބޭރު ދަތުރުތަކަށް ކަނޑައަޅާފައިވަނީ 69 މިލިއަން ރުފިޔާ އެވެ. އަދި އެތެރޭގެ ވައިގެ ދަތުރުތަކަށް ކަނޑައަޅާފައިވަނީ 54 މިލިއަނެވެ. ކަނޑު ދަތުރުތަކަށް އޮތީ 45 މިލިއަން ރުފިޔާ އެވެ.
މި އަހަރު ދަތުރުފަތުރަށް ކޮށްފައިވާ ހޭދަ މިދިޔަ އަހަރުގެ އެ ހަރަދާ އަޅާބަލާއިރު ގާތްގަނޑަކަށް ހަތް ޕަސެންޓު އިތުރެވެ. މިދިޔަ އަހަރުގެ މި މުއްދަތުގައި ދަތުރުފަތުރަށް ހޭދަކުރީ 216 މިލިއަން ރުފިޔާ އެވެ.
މިއަހަރުގެ މިހާތަނަށް ދައުލަތުގެ ބަޖެޓުން 40 ބިލިއަން ރުފިޔާ ހޭދަކޮށްފައިވެ އެވެ. އޭގެ ތެރެއިން އެންމެ ބޮޑު ހޭދައެއް ކުރީ، އެހެން އަހަރުތަކެކޭ ވެސް އެއްގޮތަށް، ސަރުކާރުގެ މުވައްޒަފުންނަށް މުސާރަ ދިނުމާއި ހިންގުމުގެ ހަރަދަށެވެ. އެ ކަންކަމަށް 28 ބިލިއަން ރުފިޔާ ހޭދަވެފައިވެ އެވެ. އެއީ ޖުމްލަ ހަރަދުގެ 70 ޕަސެންޓެވެ.
މިދިޔަ މަހު ސަރުކާރުން ބަޖެޓަށް އިތުރު ކުރި 5.1 ބިލިއަން ރުފިޔާގެ ސަޕްލިމެންޓްރީ ބަޖެޓާ އެކު ޖުމްލަ މިއަހަރުގެ ބަޖެޓު 55 ބިލިއަން ރުފިޔާއަށް އަރާނެ ކަމަށް ލަފާކުރެ އެވެ.
މުއިއްޒު ހިމެނޭގޮތުން ސަރުކާރުގެ އިސްވެރިން ދުނިޔޭގެ އެކި ކަންކޮޅުތަކުގައި ރަސްމީ ދަތުރުފުޅުތަކުގެ ނަމުގައި ދަލަތުގެ މާލިއްޔަރުން ޚަރަދު ކޮށްގެން, އެއްވެސް ހިފެހެއްޓުމެއްނެތި ދުނިޔޭގެ އެކި ކަންކޮޅުތަކުގައި އުދުހެމުންދާއިރު, މަސް ކިރުވާތާ 48 ގަޑިއިރުތެރޭ މަސްވެރިނަށް ފައިސާ ދޭނެކަމަށް ވައުދުވުމަށްފަހު, ފާއިތުވި ރައްޔިތުންގެ މަޖިލިހުގެ އިންތިޚާބުގައި ސުޕަރ މެޖޯރިޓީ ކަށަވަރު ވުމާއެކު މިސަރުކާރުން މިހާރުވަނީ މަސްވެރިންނަށް ހައްގުވާ ފައިސާވެސް ނުދީ ހިފަހައްޓާފައެވެ. އެގޮތުން މަސްވެރިން ލިބެންޖެހޭ ފައިސާ ނުލިބިގެން މަސްވެރިންދަނީ ތަކުރާރުކޮށް އިހުތިޖާޖު ކުރަމުންނެވެ.
އަދި ދައުލަތުގެ ރިޒާވް އަދަޔާ ޚިލާފަށް ދަށްވެ ރާއްޖޭގެ އިގްތިސާދީ ހާލަތު ގޯސްވެފައިވާއިރު, ދުނިޔޭގެ ރޭޓިން އޭޖެންސީތަކުން ރާއްޖޭގެ ރޭޓިންވަނީ ދަށް ކޮށްފައެވެ.
ސަރުކާރުގެ އިސްވެރިން ދައުލަތުގެ މާލިއްޔަތުން ދަތުރުފަތުރަށް އެތައް އިސްރާފެއް ކުރަމުންދާއި, މާލީ ހާލަތު ދަށްކަމަށް ބުނެ, މުވައްޒަފުންގެ އިތުރު ގަޑީގެ ފައިސާއާއި ޕްރޮމޯޝަންތައްވެސް ރައީސް އޮފީހުގެ އެންގުމަށް ދަނީ ހިފަހައްޓަމުންނެވެ.
ގިނަ ބަޔަކު މުއިއްޒު ސިފަ ކުރައްވަނީ ބަހާއި އަމަލާ ދިމާނުވާ ރައީސެއްގެ ގޮތުގައެވެ.