ޔޫރޮޕާ ލީގުގައި ރޭ ޖަރުމަނުގެ ހޮފެންހޭމް އާއި ދެކޮޅަށް ޓޮޓްނަމް ހޮޓްސްޕަރ ކުޅުނު މެޗު 3-2 ގެ ނަތީޖާއަކުން ޓޮޓްނަމް ހޮޓްސްޕަރ ކާމިޔާބުކޮށް މުބާރާތުގެ ދެވަނަ ބުރުގެ ސީދާ ޖާގައެއް ހޯދުމުގެ ފުރުސަތު ބޮޑުކޮށްފި އެވެ.
މި މެޗުން ޓޮޓްނަމް ހޮޓްސްޕަރ މޮޅުވުމާއެކު އެ ޓީމަށް ވަނީ ލީގުގައި މިހާތަނަށް ކުޅުނު 7 މެޗުން 14 ޕޮއިންޓާއެކު ތާވަލުގެ ހަވަނަ ލިބިފަ އެވެ. އެއްވަނައިގައި އޮތް ލާޒިއޯ އަށް 19 ޕޮއިންޓް ލިބިފައިވާއިރު ފުރަތަމަ ބުރުގެ ކުޅުން ނިމޭއިރު ގަދަ އަށެއްގައި ހިމެނޭ އަށް ޓީމަށް ދެވަނަ ބުރުގެ ސީދާ ޖާގައެއް ލިބިގެންދާނެ އެވެ. އަދި 9 ވަނަ އާއި 24 ވަނަ އާއި ދެމެދުގެ ޓީމުތަކަށް ޖެހޭނީ ހޯމް އެންޑް އަވޭ އުސޫލުން ޕްލޭއޮފް ދެ މެޗު ކުޅުމަށެވެ.
އިނގިރޭސި ޕްރިމިއާ ލީގުގައި އެދެވޭ ނަތީޖާތަކެއް މި ސީޒަނުގައި ހޯދިފައިނުވާއިރު ލީގުގައި އެންމެ ފަހުން އެވަޓަން އާއި ދެކޮޅަށް ކުޅުނު މެޗުން ބަލިވެ ޓޮޓްނަމް ހޮޓްސްޕަރ އޮތީ ތާވަލުގެ 15 ވަނައިގަ އެވެ.
ހޮފެންހޭމްގެ ދަނޑުގައި ކުޅުނު މި މެޗުގެ ތިން ވަނަ މިނިޓުގައި ޓޮޓްނަމް ހޮޓްސްޕަރ ގެ ޖޭމްސް މެޑިސަން ވަނީ ލަނޑެއް ޖަހާ އެ ޓީމަށް ކުރި ހޯދަދީފަ އެވެ. މި ލަނޑަކީ ޕެޑްރޯ ޕޯރޯ ޖައްސާލި ބޯޅައެއް ވަރަށް ބާރަށް ގޯލުގެ މަތީ ދާގަނޑަށް ފޮނުވާލައިގެން މެޑިސަން ކާމިޔާބު ކޮށްފައިވާ ލަނޑެކެވެ.
މި މެޗުގައި ޓޮޓްނަމް ހޮޓްސްޕަރ އިން ޖެހި ދެވަނަ ލަނޑަކީ މެޗުގެ 22 ވަނަ މިނިޓުގައި ކެޕްޓަން ސޮން ހިއުން-މިން ކާމިޔާބުކޮށްދިން ލަނޑެކެވެ.
މެޗުގެ ދެވަނަ ހާފުގެ ކުޅުން ފެށިއިރު 2-0 ގެ ނަތީޖާއަކުން ޓޮޓްނަމް ހޮޓްސްޕަރ ކުރީގައި އޮތް ނަމަވެސް މެޗުގެ 68 ވަނަ މިނިޓުގައި ހޮފެންހޭމްގެ އެންޓޮން ސްޓެޗް ވަނީ ކައުންޓަރ އެޓޭކެއްގައި ލަނޑެއް ޖަހާ އެ ޓީމުގެ ހިތްވަރު އައު ކޮށްދީފަ އެވެ.
ނަމަވެސް އޭގެ ނުވަ މިނިޓު ފަހުން ސޮން ހިއުން-މިން ވަނީ އިތުރު ލަނޑެއް ކާމިޔާބުކޮށް ދެ ޓީމުގެ ދެމެދުގައިވާ ފަރަގު އަނެއްކާވެސް ބޮޑުކޮށްފަ އެވެ.
ހޮފެންހޭމްގެ އަމިއްލަ ސަޕޯޓަރުންގެ ކުރިމަތީގައި ކުޅުނު މި މެޗުގައި އެ ޓީމުން އިތުރު ލަނޑެއް ޖެހުމަށް ކުރަމުން އައި މަސައްކަތަށް ނިމުމެއް އައިސްފައިވަނީ މެޗުގެ ފުރިހަމަ ވަގުތު ހަމަވާން ދެ މިނިޓަށް ވެފައިވަނިކޮށް ޑޭވިޑް މޮކްވާ ކާމިޔާބުކޮށްދިން ލަނޑުންނެވެ.
މި މުބާރާތުގެ ފުރަތަމަ ބުރުގެ ފަހު މެޗުގައި އަންނަ ބުރާސްފަތި ދުވަހު އެލްފްސްބޯރޖް އަތުން ޓޮޓްނަމް ހޮޓްސްޕަރ މޮޅުވެއްޖެނަމަ އެ ޓީމަށް މި މުބާރާތުގެ ދެވަނަ ބުރުގެ ސީދާ ޖާގައެއް ލިބިގެންދާނެ އެވެ.