ޤައުމީ އެއަރލައިން މޯލްޑިވިއަންގެ ސީދާ ދަތުރުތައް ޗައިނާގެ ބެއިޖިންއަށް ފަށައިފިއެވެ. މިއީ މޯލްޑިވިއަންއިން ގެނައި ވައިޑް-ބޮޑީ މަތިންދާބޯޓުގައި ދަތުރުފެށި ޗައިނާގެ 2 ވަނަ މަންޒިލެކެވެ.
މޯލްޑިވިއަންގެ ވައިޑް-ބޮޑީ މަތިންދާބޯޓު ރާއްޖެ ގެނެސްފައިވަނީ މިމަހުގެ 6 ވަނަ ދުވަހުއެވެ. ފުރަތަމަ ދަތުރު ކޮށްފައިވަނީ މިމަހުގެ 21 ވަނަ ދުވަހު ޗައިނާގެ ޗެންޑޫއަށެވެ. އެއަށްފަހު މިއަދު ވަނީ ބެއިޖިންއަށް ދަތުރު ފަށާފައެވެ.
ބެއިޖިންއަށް ކުރި ފުރަތަމަ ދަތުރުގައި ދިވެހިންގެ އިތުރުން ފަތުރުވެރިންވެސް ވަނީ ރާއްޖެއިން ޗައިނާއަށް ދަތުރުކޮށްފައެވެ. މޯލްޑިވިއަންގެ ދަތުރުތައް ބެއިޖިންއަށް ފެށުން ފާހަގަކުރުމަށް ފުރަތަމަ ޗެކިންވި ފަތުރުވެރިޔާއަށް ވަނީ ހޫނު މަރުހަބާއެއް ކިޔާފައެވެ.
މޯލްޑިވިއަންގެ ދަތުރުތައް ޗައިނާއަށް ފެށުމާއިއެކު އެއެއަރލައިނުން ވަނީ ޓިކެޓް އަގުހެޔޮ ފެއަރއެއްވެސް ފަށާފައެވެ. މިވަގުތު މޯލްޑިވިއަންގެ ޓިކެޓުން ކުރިއަށްގެންދާ ފެއަރއިން މާކެޓްގައި ޗައިނާގެ ޓިކެޓްހުރި އަގާއި އާޅަބަލާއިރު 30 އާއި 50 އިންސައްތައާއި ދެމެދު އަގު ހެޔޮވާނެކަމަށް މޯލްޑިވިއަނުން ވަނީ ވިދާޅުވެފައެވެ. މޯލްޑިވިއަނުން ވިދާޅުވީ މި ހުރިހާ ޕްރޮމޯޝަނަލް އަގުތަކުގައިވެސް 40 ކިލޯގެ ލަގެޖާއި، ކެއުމުގެ ޕެކޭޖެއް ހިމަނާފައިވާކަމަށެވެ. އަދި މިފެއަރ ހަމަޖައްސާފައިވަނީ މިތިން ސިޓީއަށްވެސް ކުރާ ފުރަތަމަ ދެދަތުރަށެވެ. އަދި މިއީ ފަސިންޖަރުންނަށް ފަސޭހަކަމާއެކު، ހިތްފަސޭހަ ދަތުރެއް ކުރެވޭނެކަމުގެ ޔަޤީންކަން އެރުވުމުގެ ގޮތުން ހަމަޖައްސާފައިވާ ޚާއްޞަ ފެއަރއެއް ކަމަށް މޯލްޑިވިއަނުން ހާމަކުރެއެވެ.
މޯލްޑިވިއަންގެ ދަތުރުތައް ޗައިނާގެ ޗެންޑޫ، އަދި ބެއިޖިންއަށް ފަށާފައިވާއިރު މިމަހުގެ 27 ވަނަ ދުވަހު ޝެންހާއީއަށް ދަތުރު ފަށާނެއެވެ. މިއިން ކޮންމެ ސިޓީއަކަށްވެސް ހަފްތާއަކު 1 ދަތުރު ކުރުމަށް ވަނީ ހަމަޖެހިފައެވެ.
މޯލްޑިވިއަންއިން ޗައިނާއަށް މި ފެށި ދަތުރުތަކާއިއެކު އެ ޤައުމުން ރާއްޖެއަށް އަންނަ ފަތުރުވެރިންގެ އަދަދަށް ބޮޑު ކުރިއެރުމެއް ލިބޭނެއެވެ. އަދި ޗައިނާއިން ރާއްޖެއަށް ކާގޯ ގެނައުމަށްވެސް ފުރުސަތު ފަހިވެގެންދާނެއެވެ.