އެންމެ ފުރަތަމަ ކަމަކީ ތިމާ އިޞްލާޙްވެ ހެޔޮ ޢަމަލުތައް ކުރުމެވެ. ފާފަނުކުރަން މަސައްކަތްކުރުމެވެ. އެކަމަކަށް އެއްވެސް ޝައްކެއް ނެތެވެ. ނަމަވެސް ގިނަ ބައަކަށް އިހްމާލްވެވޭ ކަމެއް އެބަ އޮތެވެ. އެއީ ތިމާގެ ޢާއިލާގެ މީހުންނާއި އެކުވެރިން އަދި އެހެން މީހުންނަށްވެސް ވިސްނައިދީ އެމީހުންނަކީވެސް ތިމާ ފަދަ ބައަކަށް ހެދުމަށް މަސައްކަތްކުރުމެވެ.
ހަމަ އެއާއިއެކު ގިނަ ބައަކަށް ހިފިފައިވާ ނުބައި ކަމެއްވެސް އެބަ އޮތެވެ. އެހެން ބުނަން ޖެހެނީ އަހުރެމެންގެ ތެރެއިން ބައެއް މީހުންނަށް ހިފިފައިވާ އެންމެ ނުބައިކަންބޮޑު އެއް އާދައަކީ ތިމާ ރުހޭ މީހަކު ކިތަންމެ ބޮޑު ނުބައިކަމެއް ކުރިނަމަވެސް އެކަމަކަށް ރުހި، ތާއީދުކުރުމެވެ. އެކުރީ ރަނގަޅު ކަމެއް ކަމާއި އެކަން އެކުރީ ހަމަ ކުރަންވެގެންކަމަށް ޤަބޫލުކުރުމެވެ. އަދި އެނުބައިކަން ކުރިމީހާ ދިފާޢުކޮށް އެކަމުގައި ހައްދުފަހަނައަޅައިގޮސް އެމީހަކު އެކުރީ ރަނގަޅު ޢަމަލެއް ކަމަށް މީސްތަކުންނަށް ވިސްނައިދޭންވެސް އެބަ މަސައްކަތްކުރެއެވެ.
ޙަޤީޤަތަކީ ކިތަންމެ ބޮޑަށް ހެޔޮއެދޭ، ކިތަންމެ ރުހޭ މީހަކު ނަމަވެސް ނުރަނގަޅު ކަމެއް، ޚާއްޞަކޮށް ﷲ ތަޢާލާ ޙަރާމްކުރައްވަވާފައިވާ ކަމެއް ކޮށްފިނަމަ ތިއަކުރީ ކުށެއް ކަމަށް ބުނެ އެމީހަކަށް ނަޞޭޙަތްތެރިވެ އިޞްލާޙްކުރުވަން މަސައްކަތްކުރަންޖެހޭނެ ކަމެވެ. އެއީ ކިތަންމެ ތަނަވަސް، ކިތަންމެ މަތީ މަޤާމެއްލިބިފައިވާ ކިތަންމެ ބޮޑު ޢިއްޒަތްތެރިއެއް ނަމަވެސްމެއެވެ.
އެހެން ނޫންނަމަ ތިބާވާނީ އެމީހާއަށް ހެޔޮއެދޭ މީހަކަށް ނޫނެވެ. ދުޝްމިނަކަށެވެ.
މީގެ އިތުރުން ތިމާ އިޞްލާޙްވުމަށްފަހު އެހެން މީހުން އިޞްލާޙްކުރަން މަސައްކަތްކުރުންވަނީ ދީނަށް ނަޞްރުދިނުމުގެ ތެރެއިންނެވެ. ﷲ ތަޢާލާގެ ދީނަށް ނަޞްރުދޭ މީހަކަށް ﷲ ތަޢާލާ ނަބްރުދެއްވަވާނެތެވެ. އެކަމަށް ދެއްވަވާނެ ޘަވާބު ދެނެވޮޑިގެންވަނީ ހަމައެކަނި ﷲ ތަޢާލާއެވެ. މާނައަކީ އެއީ އެހައިވެސް ގިނަ ޘަވާބު ދެއްވަވާނެ ކަމެކެވެ. އިން ޝާ ﷲ
--އިސްލާމީ ތިލަފަތުގެ ދަރުސަކުން