އާންމު ސަރަހައްދުތަކުގައި ބިދޭސީންގެ މެދުގައި ހަމަނުޖެހުން އުފެދޭ ފަދަ ކަންކަން އިތުރުވާތީ، ހަމަނުޖެހުން ހިންގާ ސަރަހައްދުތައް ސިލްސިލާކޮށް މޮނީޓަރުކުރުމުގެ މަސައްކަތް އިމިގްރޭޝަނުން މިއަދު ފަށައިފިއެވެ. މިފަހުން އާފިޝަލް ބީޗުގައި ބިދޭސީންގެ މާރާމާރީއެއް ދެ ފަހަރަކު ހިންގިއިރު، އެ މައްސަލައިގައި ހައްޔަރުކުރި ތިން ބިދޭސީއަކު ޑީޕޯޓު ކުރުމުގެ މަސައްކަތް ކުރާ ކަމަށް އިމިގްރޭޝަނުން ބުންޏެވެ. މިއަދު އިމިގްރޭޝަނުން ކުރި ޕޯސްޓެއްގައި ބުނީ، އާންމު ސަރަހައްދުތަކަށް އެއްވެ އުޅޭ ބިދޭސީންގެ މެދުގައި ފަހަކަށް އައިސް އާންމު މަސްލަހަތު ގެއްލޭފަދަ ކަންކަން ހިނގަމުންދާކަން ފާހަގަކުރެވޭތީ، އިމިގްރޭޝަންގެ އެންފޯސްމަންޓް އެންޑް ކޮމްޕްލަޔަންސް ޑިވިޝަންގެ އޮފިސަރުން އެ ސަރަހައްދުތަކަށް ގޮސް މިއަދު މޮނީޓަރުކުރަން ފަށާފައިވާ ކަމަށެވެ. މިފަދަ އަމަލުތައް ތަކުރާރު ވިޔަ ނުދިނުމަށް މި ހަރަކާތް ސިލްސިލާކޮށް ކުރިއަށް ގެންދާނެ ކަމަށް ބުނެފައިވެއެވެ. https://x.com/immigrationmv/status/1882830474655277094?s=51 އޭގެއިތުރުން، ހަރަކާތް ކުރިއަށް ގެންދާއިރު ގަވައިދާ ޚިލާފަށް އުޅޭ ބިދޭސީއެއްގެ މައްސަލައެއް ފާހަގަވެއްޖެނަމަ ޓާސްކްފޯހުން އެ މީހުންނާ މެދު ފިޔަވަޅު އަޅާނެކަމަށް އެ ޕޯސްޓުގައި ވަނީ ބުނެފައެވެ. ރާއްޖޭގައި ގަވައިދާ ޚިލާފަށް އުޅޭ ބިދޭސީން ހޯދުމުގެ މަސައްކަތް ވެސް އިމިގްރޭޝަނުން ކުރަމުން އަންނައިރު، އިމިގްރޭޝަންގެ ޓާސްކުފޯހުން މިދިޔަ އަހަރު ބަލައި ފާސްކުރި ތަންތަނުގައި މިހާރު ބިދޭސީން އުޅެނީ ސައްހަ ވިސާއާއެކު، ގަވާއިދާ އެއްގޮތަށްތޯ ބެލުމަށް ޚާއްސަ އޮޕަރޭޝަނެއް ވެސް ވަނީ ފަށާފައެވެ.