ހެޔޮ ޢަމަލުތައް ކުރުން މަދުވަނީ ދުނިޔެއަށް ފޮނުއްވެވި ޒަމާން ފަސްވުމުން ކަމަށްބަލައި އެކަން ކުށްވެރިކުރާ ބައަކު އުޅެއެވެ. ޞަޙާބީން އުޅުއްވެވި ގޮތަށް އަހުރެމެންނަށް އުޅެވޭނީ ކިހިނަކުންތޯ ވެސް އެބަ ސުވާލުކުރެއެވެ. ޞަޙާބީންނަށް ލިބިވަޑައިގެންނެވި މަތީ ދަރަޖަ އަހުރެމެންނަށް ލިބޭނީ ކިހިނަކުންތޯވެސް ސުވާލުކުރާ ބައަކު އުޅެއެވެ.
ބުނަން ހެއްޔެވެ؟ ފުރަތަމަ ކަމަކަށް ދުނިޔެއަށް ފޮނުވެވި ޒަމާން ކުށްވެރިނުކުރާށެވެ! އެކަން މިންވަރުކުރައްވަވަނީ ﷲ ތަޢާލާއެވެ. ހަމަ އެއާއިއެކު ކޮންމެ ޒަމާނެއްގައި އުފަންވި ނަމަވެސް ޞަޙާބީން ހޯއްދެވި މަތީ ދަރަޖަ ހޯދުމުގެ ފުރުޞަތު ﷲ ތަޢާލާވަނީ ފަހިކޮށްދެއްވަވައިފައެވެ. އަދި ކީއްހެއްޔެވެ؟ 50 ޞަޙާބީންގެ ދަރަޖަ ހޯދުމުގެ ފުރުޞަތުވެސް ވަނީ ފަހިކޮށް ދެއްވަވައިފައެވެ.
ވީމާ ދުނިޔެއަށް އުފަންވި ޒަމާނާއިމެދު ހެޔޮގޮތުގައި ވިސްނާށެވެ! ހެޔޮ ޢަމަލުތައް ކުރުން ގިނަކޮށް އިސްލާމް ދީނުގައި ޘާބިތުވެލާށެވެ! އެއިރުން އެމީހަކަށް ﷲ ތަޢާލާގެ ޙަޟްރަތުން ދެއްވަވާނެ ދަރަޖަ މާމަތިވެރިކަން ތިރީގައިވާ ލިޔުމުން އެނގިލައްވާނެއެވެ. އިން ޝާ ﷲ
ބައެއް މީހުން ވަރަށް ފަސޭހައިން ބުނެއެވެ. "ޞަހާބީންނަށް އެންމެ މަތީ ދަރަޖަ ލިބިވަޑައިގަންނަވަނީ ރަސޫލް (ﷺ) ގެ ޒަމާނުގައި އިތުރުއެކަލޭގެފާނުގެ އަރިއަހުގައި އުޅުއްވެވުނީތީ"އެވެ. މިއީ ވަރަށް ބޮޑުކުށްހީއެކެވެ.
ޙަދީޘްފުޅުގައިވަނީ ރަސޫލް (ﷺ)ގެ ޒަމާނުގައި އުޅުއްވެވި 50 ޞަޙާބީންނަށްވުރެ ފަހުން އުޅޭ އެންމެ މުސްލިމެއްގެ ހެޔޮކަން ބޮޑުވާނެ ކަމަށެވެ.
ރަސޫލް (ﷺ) ބަޔާން ކުރެއްވެވި ދުވަސް މިއަދު މިވަނީ އަހަރެމެންނާއި ބައްދަލުކޮށްފައެވެ.
ރަސޫލް (ﷺ) ގެ ޒަމާނުގައި ފާފަތައް ކުރުން އެހައި ފަސޭހައެއް ނޫނެވެ. މީސްކޮޅު މަދުކަމުންނާއި ވަސީލަތް މަދުކަމުންނެވެ. ފާފައެއް ކޮށްފިނަމަ އެކަން ބޭޒާރުވުން ކައިރިކަމުންނެވެ.
ނަމަވެސް ކަންކަން މިއަދު މިވަނީ މުޅިން ބަދަލުވެފައެވެ. ކިތަންމެ ސިއްރުން ފޮރުވިގެން ތިބެމެ ފާފަތައް ކުރެވޭނެ ފަސޭހަމަގުތައް މިވަނީ ފަހިވެފައެވެ. މިސާލަކަށް ޒިނޭކުރަން އަންހެނަކު ހޯދަން ނުވަތަ ފިރިހެނަކު ހޯދަންވެސް އެއްވެސް ތަނަކަށް ދާކަށް ނުޖެހެއެވެ. ފޯނުކޮށްލައިގެން ހުރިތަނަކަށް ގެނުވައިގެން ބޭނުންކަމެއް ކުރަންވީއެވެ. ބޭނުން ކޮންމެ ކަމެއް ކުރެވޭ ގޮތަށް އެކަނި ދިރިއުޅެވޭނެ ގޮތް މިވަނީ ހަމަޖެހިފައެވެ. އޮފީސްތަކުގައިވެސް ކުރަންވީއެވެ. މިފަދަ ބޮޑެތި ލުއިފަސޭހަތަކެއް އެ ޒަމާނަކު ނެތެވެ. އެޒަމާނުގައި ޒިނޭކުރާ އަންހެނުން ތިބެނީ ވަކިފޭލިގެތަކެއްގައެވެ. ވަދެއްޖެ ނަމަ ހމަނުވެއެއް ނުދާނެއެވެ.
އީމާންތެރިކަން އެހައި ވަރުގަދަ 50 ޞަޙާބީންނާއި މިހާރު ފާފައެއް ނުކުރާ އެންމެ މީހަކާއި އެއްވަރުވެގެން އެދަނީ އެ ސަބަބަށްޓަކައެވެ. މިހައި ފަސޭހައިން ފާފަތައް ކުރެވެން ހުރިއިރު ވެސް ﷲ ތަޢާލާއަށް ބިރުވެތިވެ ފާފައަކަށް އަރައި ނުގަންނާތީއެވެ!
ވީމާ 50 ޞަޙާބީންގެ ދަރަޖަ ލިބެން އޮތް މިފުރުޞަތު އެއްގޮތަކަށްވެސް ދޫކޮށްނުލާށެވެ! ﷲ ތަޢާލާ އެކަމަށް ދެއްވަވާނެ މަތިވެރި ސަވާބަށް އެދޭށެވެ! ސުވަރުގޭގެ އެންމެ މަތިވެރި ދަރަޖައިގައި ރަސޫލް (ﷺ) އާއި އެންމެ އަރިއަހުގައިވުމަށް އުންމީދުކުރާށެވެ!
--އިސްލާމީ ތިލަފަތުގެ ދަރުސަކުން