މެލްބާން، އޮސްޓްރޭލިއާ (ޖެނުއަރީ 24) - އޮސްޓްރޭލިއަން އޯޕަން ސެމީ ފައިނަލުގެ ފުރަތަމަ ސެޓަށް ފަހު، މުބާރާތުގެ އެންމެ ކާމިޔާބު ކުޅުންތެރިޔާ، ނޮވަކް ޖޮކޮވިޗް، މެޗު ދޫކޮށްލުމާ އެކު، ޖަރުމަނުގެ އަލެކްސަންޑަ ޒްވެރެވް އަށް ފައިނަލުގެ ޖާގައެއް ލިބިއްޖެ އެވެ.
އޮސްޓްރޭލިއަން އޯޕަންގެ ސެމީ ފައިނަލުގައި، ޖޮކޮވިޗް، 37، ވަނީ އެއް ގަޑިއިރާއި 20 މިނިޓް ވަންދެން ކުޅެފަ އެވެ.
އެކަމަކު، ފުރަތަމަ ސެޓުން ބަލިވެފައި އޮތް ޖޮކޮވިޗް ފަހުން ނިންމީ ވާތު ފަޔަށް ލިބިފައިވާ އަނިޔާ އިތުރަށް ގޯސްވެދާނެތީ މެދު ދޫކޮށްލުމަށެވެ.
"ފުރަތަމަ ސެޓުގެ ފަހުކޮޅަށް ދިޔައިރު އަހަންނަށް ބޮޑަށް ތަދު އިހުސާސްވާން ފެށީ. އެ ހިސާބުން އަހަންނަށް ގަބޫލުކުރެވިއްޖެ، މި މެޗުގެ ފުރަތަމަ ސެޓުން އަހަރެން މޮޅުވެފައި އޮތް ކަމުގައި ވިޔަސް. ތިނެއް، ހަތަރެއް ނޫނީ ފަސް ގަޑިއިރު ރެލީތަކެއްގައި ފައިޓްކުރާނެ ހިތްވަރު އަހަރެންގެ ކިބައިގައި މިއަދު ނެތްކަން،" ޖޮކޮވިޗް ބުންޏެވެ.
ޖޮކޮވިޗް، މި ފަހަރުގެ އޮސްޓްރޭލިއަން އޯޕަން ކުއާޓާ ފައިނަލުގައި ކާލޮސް އަލްކަރާޒް އަތުން މޮޅުވި މެޗުގައި ވެސް އަނިޔާ އަށް ފަރުވާ ހޯދި އެވެ. ސެމީ ފައިނަލް މެޗަށް ނުކުތީ، އަނިޔާވެފައިވާ ވާތު ފައި ވަރަށް ބޮޑަށް ޓޭޕްކޮށްގެންނެވެ. އެކަމަކު، ވެސް މެޗު ފުރިހަމަ ކުރެވޭ ގޮތެއްނުވި އެވެ.
މެޗަށް ފަހު ޖޮކޮވިޗަށް އޮސްޓްރޭލިއާގެ ބައެއް ސަޕޯޓަރުންގެ ނުރުހުން ވެސް އަމާޒުވި އެވެ. މި ފަހަރުގެ އޮސްޓްރޭލިއަން އޯޕަން ދިޔައީ ޖޮކޮވިޗަށް ދަނޑު ބޭރުގެ ޕްރެޝަރު ވެސް ކުރިމަތިވި އަހަރަކަށެވެ. ޖޮކޮވިޗް އާއި، އެ ގައުމުގެ ސަޕޯޓަރުންނަށް އޮސްޓްރޭލިއަން އޯޕަންގެ އޮފިޝަލް ބްރޯޑްކާސްޓަރު، ޗެނަލް ނައިންގެ، ސްޕޯޓްސް ޕްރެޒެންޓަރު، ޓޯނީ ޖޯންސް ވަނީ މަލާމަތްކޮށްފަ އެވެ. އެކަމާ އޮންއެއޭގައި ޖޯންސް މައާފަށް އެދުނު ނަމަވެސް، ޖޮކޮވިޗް ވަނީ ޗެނަލް ނައިން އަށް މި ފަހަރުގެ އޮސްޓްރޭލިއަން އޯޕަންގައި އެއްވެސް އިންޓަވިއުއެއް ނުދޭން ނިންމައިފަ އެވެ.
އާދިއްތަ ދުވަހު ކުޅޭ ފައިނަލުގައި ޒްވެރެވް ބައްދަލުކުރާނީ ޖަނިކް ސިނާ ނޫނީ ބެން ޝެލްޓަން އެވެ. ޒްވެރެވް އަށް މިހާތަނަށް ގްރޭންޑް ސްލޭމް ޓެނިސް މުބާރާތެއް ކާމިޔާބުކުރެވިފައިނުވެ އެވެ. އޭނާ މީގެ ކުރިން ކުޅުނު ދެ ފައިނަލުން ވީ ބައްޔެވެ.