ތަފާތު ވިޔަފާރިތަކަށް އަމާޒުކޮށް "ހަވީރު ހެޑްލައިންސް" ގެ ނަމުގައި އާ ހިދުމަތެއް ބުރާސްފަތި ދުވަހު ހަވީރުން ތައާރަފުކޮށްފި އެވެ.
"ހަވީރު ހެޑްލައިންސް" އަކީ ކެފޭ ރެސްޓޯރެންޓާއި ފިހާރަތަކާއި ހޮޓާތަކާއި އަދި މިނޫން ވެސް ވިޔަފާރީގެ ތަފާތު މުއާމަލާތްތައް ހިންގާ ތަންތަނުގައި ޓީވީ ސްކްރީނެއް މެދުވެރިކޮށް، އެތަނެއްގެ ޕްރޮޑަކްޓްތައް ދައްކަމުން ދާއިރު ހަވީރު ނޫހުގެ ސުރުހީތައް ވެސް ފެންނަ ގޮތަށް ދޭ ހިދުމަތެކެވެ. ހަވީރުގައި ޝާއިއުކުރާ ހަބަރުތަކުގެ ސުރުހީތަކުގެ އިތުރުން ހަވީރުގެ ބްރޭކިން ނިއުސްތަކުގެ ސުރުހީތައް ވެސް ވަގުތުން އެއަށް އަރަމުންދާނެ އެވެ.
ހަވީރުގެ މި އާ ހިދުމަތް ފުރަތަމަ ދޭން ފެށީ މާލޭގެ މަޝްހޫރު ރެސްޓޯރެންޓެއް ކަމަށްވާ "ސީ ހައުސް" ގަ އެވެ. އެ ރެސްޓޯރެންޓްގައި ހުރި ޓީވީ ސްކްރީނުން އެތަނުން ލިބެން ހުރި ކާނާގެ ބާވަތްތައް ފެންނަ އިރު ސްކްރީންގެ ތިރިން ހަވީރުގެ މުހިންމު ސުރުހީތައް ފެންނަމުން ދާނެ އެވެ.
ފުރަތަމަ ސީ ހައުސްގައި ދޭން ފެށި މި ހިދުމަތް ބޭނުންވާ އެހެން ފަރާތްތަކަށް ވެސް ހަވީރުން ވަނީ ފުރުސަތު ހުޅުވާލައިފަ އެވެ.
ހަވީރުގެ އޮފިޝަލަކު ވިދާޅުވި ގޮތުގައި ހަވީރުގެ މި ހިދުމަތް ހޯދާ ފަރާތްތަކުން އެ ބައެއްގެ ކޮންމެ ޕްރޮޑަކްޓެއް ވެސް ސްކްރީންގައި އިޝްތިހާރުކުރެވިދާނެ އެވެ. އޭގެ ކޮންޓްރޯލް އޮންނާނީ ސްކްރީން ބަހައްޓާ ފަރާތަކަށް ކަމަށް އޮފިޝަލް ވިދާޅުވި އެވެ.
ހަވީރުގެ އޮފިޝަލް ވިދާޅުވީ މިއީ ހަވީރުން ވިޔަފާރިއެއްގެ ގޮތުގައި ދޭ ހިދުމަތެއް ނޫން ކަމަށާއި މިއީ ވިޔަފާރިވެރިން އެ މީހުންގެ ޕްރޮޑަކްޓްތައް އިޝްތިހާރުކުރުމަށް ހަވީރުން ފޯރުކޮށްދޭ އެހީތެރިކަމެއް ކަމަށެވެ. އަދި ލުއި ހަބަރުތަކަށް އިސްކަން ދީގެން ދޭ މި ހިދުމަތަކީ އާންމުންނަށް ހަވީރުގެ ހަބަރުތައް މިހާރަށް ވުރެ ވެސް ފަސޭހަކަމާ އެކު ލިބޭނެ ގޮތެއް ހަމަޖައްސައި ދިނުމުގެ ހިދުމަތެއް ވެސް ކަމަށް އޮފިޝަލް ވިދާޅުވި އެވެ.