މީހަކު މަރުވުމުން އަހަރެމެން އެމީހަކު ހިނަވައި ކަފުން ކުރަމުއެވެ. އެއަށްފަހު ހަށިގަނޑު ގެންގޮސް ވަޅުލަމުއެވެ. ވަޅުލާއިރު ޖަނާޒާގައި ބައިވެރިވާ މީހުން 3 މުށް ވެލި އެކަމުއެވެ. އެއީ ކީއްކުރަން ކުރާ ކަމެއް ހެއްޔެވެ؟
3 މުށްވެލި އުކުމަކީ މުޞްތަޙައްބު ސުންނަތެއްކަމަށް ބުނެލުމަކުން ނުފުދެއެވެ. އެކަމުން ލިބެންޖެހޭ ފިލާވަޅުތައްވެސް ލިބިގަންނަން ޖެހެއެވެ.
އަހަރެމެން އަމަލުން މިބުނަނީ އަހަރެމެން އެފެދުނީ ވެލިންނެވެ. އެނބުރިދާނީ ވެސް ވެއްޔަށެވެ. އެއަށްފަހު ދިރިގެން ތެދުވާނީވެސް ވެލީގެތެރެއިންނެވެ.
ހިތާމައަކީ މިމޭރުމުން ބުނެފައި އެނބުރިލުމަށްފަހުވެސް މި 3 ކަންތައް ހަނދާން ނުހުންނަ ކަމެވެ. އަހަރެމެން އުފައްދަވާފައިވާ ނިކަމެތިކަމެވެ. އެނބުރިދާން ޖެހޭނީ އެހައިމެ ނިކަމެތިކަމާއިއެކުގައި ކަމެވެ. އަދި ޤިޔާމަތުގެ ތާޅަފިލި ފުމެލެއްވުމާއިއެކު ކައްވަޅުން ތެދުވަންޖެހޭނީ ކިހައި ބޮޑު ނިކަމެތިކަމާއިއެކުގައި ކަމެވެ.
މީސްތަކުންނޭވެ ބަރުޒަޚުގެ ޢާލަމަކީ ބިރުވެރިކަމުން ފުރިގެންވާ ތަނެކެވެ. ނިކަން ވިސްނައިބަލާށެވެ. ތިބާ މަރުވުމުން ލޮލުގެ ފެނުން ގެއްލިގެންދެއެވެ. ވަޅުލައި ނިމޭއިރު ހަށިގަނޑޫ އޮންނަނީ ވެލިތަކުގެ ތެރޭގައި ފިތިބާރުވެފައެވެ. ލޮލާއި ވެއްޔާއި ދެމެދު އެއްވެސް ހުރަހެއް ނެތެވެ. ނަމަވެސް ވަޅުލެވުމާއިއެކު 3 ސުވާލުކުރައްވަން އެވަޑައިގަންނަވާ 2 މަލާއިކަތުންގެ ސައިޒު ބުނެދޭނެ އެނގޭނެ އެއްވެސް ގޮތެއް ނެތެވެ. އެހައިމެ ބޮޑެވެ.
ޙަޤީޤަތަށް ބުރަވެ ބުނާނަމަ ބުނަންޖެހޭނީ ޖަނާޒާތަކުގައި ބައިވެރިވުމަކީ މުސްލިމް އަޚާއަށްޓަކައި އަދާކުރަންޖެހޭ ޙައްޤެއް ނަމަވެސް އެ ޙައްޤު އަދާކުރަނީ ނިސްބަތުން މަދުމީހެއްކަމެވެ. ސުވާލަކީ އެ ޙައްޤު އަދާކުރާ މީހުންގެ ތެރެއިން ކިތައް މީހުންނަށް ޖަނާޒާއިން ޢިބްރަތެއް ޙާޞިލުކުރެވޭ ހެއްޔެވެ؟
އަހަރެމެން ޤަބުރުސްތާނުން ނުކުންނަނީ މަރުވި މީހާއަށް ހެޔޮ ދުޢާކުރުމަށްފަހުގައެވެ. އެމީހާގެ ﷲާފަތައް ފުއްސަވައިދެއްވެވުން އެދިގެންނާއި ކައްވަޅުގައި މަލާއިކަތުން ކުރައްވަވާ 3 ސުވާލަށް ޖަވާބު ދިނުމުގެ ބާރު އެމީހާއަށް ދެއްވެވުން އެދިއެވެ. އެކަމަށް ކުޅަދާނަކަން ދެއްވެވުން އެދިއެވެ. ޝަހާދަތުގެ މަތީގައި އޭނާއަށް ސާބިތުކަން ދެއްވެވުން އެދިއެވެ.
ސުވާލަކީ ޤަބުރުސްތާނުން ނުކުތުމަށްފަހު ކޮންމެ ވަގުތަކުވެސް ތިމާ ވަޅުލެވިދާނެ ކަމާއިމެދު ވިސްނަމު ހެއްޔެވެ؟ ތިމާ އަމަލުތައް ކުރަމުން މިގެންދަނީ 3 ސުވާލަށް ޖަވާބު ދެވޭނެ ގޮތަށް ކަމާއިމެދު ވިސްނަމުހެއްޔެވެ؟ ޝަހާދަތުގެ މަތީގައި ތިމާއަށް ސާބިތުވެވޭނެ ގޮތަށް ކަމާއިމެދު ވިސްނަމުހެއްޔެވެ؟
ވަރަށް މަދު މީހަކަށް ނޫނީ މިއިން އެއްވެސް ކަމަކާއިމެދު ވިސްނައިލެވޭ ކަމަކަށް ޤަބޫލެއް ނުކުރެވެއެވެ. ހެނދުނު ޖަނާޒާގައި ބައިވެރިވާ ބައެއް މީހުންގެ ކިބައިން އެދުވަހުގެ ހަވީރު ނުވަތަ އެރޭ ފެންނަ މަންޒަރުތަކުން އެމީހުން އެދުވަހު ޖަނާޒާއެއްގައި ބައިވެރިވިކަމުގެ އެއްވެސް އަސަރެއް ނުފެންނާތީއެވެ.
ބައެއް މީހުންނަށް ކައްވަޅަކީ ފިތިބާރުވެފައިވާ ނުހަނު ބިރުވެރި ތަނަކަށްވެގެންދާނެއެވެ. އަނެއްބައި މީހުންނަށް އެއީ ނުހަނު ތަނަވަސް އަދި ރަޙްމަތުން ފުރިގެންވާ ތަނަކަށް ވެގެންދާނެއެވެ. މިހެން ބުނުމުން ވެލިގަނޑެއްގައި ވަޅުލެވުނީމާ ދެން ޖާގަ ބޮޑުވެގެން ދާނީ ކިހިނަކުން ކަމާއިމެދު ބައެއް މީހުން ސުވާލުކޮށްފާނެއެވެ. ޖަވާބަކީ ތިބާއަށްޓަކައި މައިމީހާގެ ބަނޑުން ޖާގަ ބޮޑުވެ ޖާގަ ލިބެނީ ކިހިނަކުންހެއްޔެވެ؟ ވިހެއުމަށްފަހު މައިމީހާގެ ބަނޑަށް އަލުން އެ ކުއްޖާ ލައި އެ ޖާގަލިބޭތޯ ނިކަން ބަލައިބަލާށެވެ. ވީމާ ޖަވާބަކީ ކައްވަޅުވެސް ފުޅައުކުރައްވަވައި ތަނަވަސްކޮށްދެއްވަވަނީ ހަމަ މައިމީހާގެ ބަނޑުން ވެސް ޖާގަ ތަނަވަސްކޮށްދެއްވެވި ހުރިހާ ކަމަކަށް ކުޅދުންވަންތަ ﷲ ތަޢާލާއެވެ.
ވީމާ ޖަނާޒާއަށް ގޮސްފައި ހުސްއަތާ ނުކުމެގެންދާ މީހަކަށް ނުވާށެވެ! ޢިބްރަތް ޙާޞިލުކުރާށެވެ! އާޚިރަތަށްޓަކައި އަމަލުތައް ސީދާ ކުރާށެވެ! ޖަނާޒާތަކުގައި ބައިވެރިވުމަށް ނުވަދެވޭ މީހުން، އަންހެނުންވެސް މިކަންކަމަށް ވިސްނައި ބިރުވެތިވާށެވެ! ޖަނާޒާގައި ބައިވެރިވާން ޤަބުރުސްތާނަށް ނުވަދެވުނު ނަމަވެސް ކައްވަޅަށް ދާން ނުޖެހޭނެ އެއްވެސް މީހަކު ނުހުންނާނެއެވެ! ޝަހީދުން ފިޔަވައެވެ! ޝަހީދުންގެ ފުރާނަތައް ﷲ ތަޢަލާ ރޫޙާނީ ޢާލަމަށް އުފުއްލަވާނެތެވެ!
ކޮންމެއަކަސް އަހަރެންގެ އިލްތިމާސަކީ ކޮންމެ ޖަނާޒާއަކުންވެސް ޢިބްރަތް ޙާޞިލުކުރުމެވެ. އެއީ ހަމައެކަނި ރައްޓެއްސަކަށް ނުވަތަ ޢާއިލާގެ މީހަކަށްވުމުން ހަމައެކަނި ޖަނާޒާގައިބައިވެރިވެލުންކަމަށް ހަދާފައި ނިންމައިނުލާށެވެ! ޢިބްރަތް ޙާޞިލުކުރުމަކީ ތިމާގެ ޖަނާޒާ ބޭއްވޭނެ ވަގުތަށް ތައްޔރުވާން މަސައްކަތްކުރުމެވެ.
--އިސްލާމީ ތިލަފަތުގެ ދަރުސަކުން