އިންޑިޔާ އާއި މެދު ނަފްރަތު އުފެއްދުމަށް، ދިޔަރެސް ނޫހުގައި ކެމްޕެއިނެއް ފަށައިފިއެވެ. ވެރިކަން ހޯދުމާއި، ވެރިކަން ހިފެހެއްޓުމުގެ މައިގަނޑު އަސާސް އަކީ އިންޑިޔާ އާއި ދެކޮޅަށް ރައްޔިތުންގެ ހިތުގައި ނަފްރަތު އުފައްދައިގެން، ދޭދޭ ގައުމުތައް ޖައްސައިގެން ހައްދުފަހަނަ އެޅި ޤައުމިއްޔަތުގެ ފިކުރު ދަމަހައްޓައިގެން ކުރެވެން އޮތް ކަމަށް ދެކި އިންޑިޔާއާއި، މެދު ރައްޔިތުންގެ ހިތުގައި ނަފްރަތު އުފެދޭ ލިޔުންތައް އަނެއްކާވެސް ދިޔަރެސް ނޫހުން ގެންނަން ފަށައިފިއެވެ.
ދިޔަރެސް ނޫހުން މިގޮތަށް ޚަބަރުތައް ގެންނަން ފެށީ، އިންޑިޔާގެ އެކްސްޓަރނަލް އެފެއަރޒް މިނިސްޓަރ ރާއްޖެއަށް ކުރެއްވި ދަތުރަށް ފަހު، މި ސަރުކާރާއި އިންޑިޔާއާއި ގުޅުން ރަނގަޅު ވަމުން ދާތީ އެކަމާއި، މުއިއްޒުގެ ސަޕޯޓަރުންގެ ތެރޭގައި ހިމެނޭ ނަސްލީ ތަފާތު ކުރުން އިންތިހާއަށް އޮންނަ ފަރާތްތަކުގެ ތާޢީދު އަނބުރާ ހޯދުމަށް ކަމަށް ބެލެވެއެވެ.
ދިޔަރެސް ނޫސް ހިންގާ އަޒާން އަށް މިހާރު، ނޫސް ވެރިއެއްގެ ތޮފި އަޅައިގެން ދޭދޭ ޤައުމުތަކުގެ ގުޅުން ހީނަރު ކުރުމަށް އޭނާ ފައިސާ ނަގައިގެން ހިންގަމުންދިޔަ ފިތުނަވެރި ނަފްރަތުގެ ކެމްޕެއިންތައް ހިންގުމުގެ ފުރުޞަތެއް ނެތެވެ. މިހާރު އެއީ މުއިއްޒުގެ ކެންޑިޑޭޓެއްގެ ގޮތުގައި މަޖިލީހުގައި އިން މުއިއްޒުގެ ސީދާ މެމްބަރެކެވެ. ސިޔާސީ ގޮތުން ދިޔަރެސްގައި ޖަހާ ނަފްރަތުގެ ލިޔުންތަކަކީ، މުއިއްޒަށް ނޭނގި، މުއިއްޒުގެ އަތް ދަށުން ގޮސްގެން ހިނގާ ކަންކަން ކަމަށް ނުބެލެވެއެވެ. އެހެންކަމުން އިންޑިޔާ އާއި ދެކޮޅަށް އަޒާން ދިޔަރެސް ނޫހުގައި ހިންގަމުންދާ ނަފްރަތުގެ ކެމްޕެއިން އަކީ، މުއިއްޒުގެ ފުރިހަމަ އެއްބާރުލުން ލިބިގެން ހިނގަމުންދާ ކެމްޕެއިނެއް ކަމަށް ދުނިޔޭގެ ހުރިހާ ޤައުމުތަކުން ގަބޫލު ކުރާނެއެވެ.
މީގެ ކުރިންވެސް، އިންޑިޔާއާއި މެދު މުއިއްޒު ގެންގުޅެމުން އަންނަނީ ހެނދުނު ފިރުމާފައި، ހަވީރު ނުވަނީސް މޫނު މައްޗަށް ވީއްލާލާ ފޮރިންގ ޕޮލިސީއެވެ. އިންޑިޔާގެ ދައުވަތަކަށް މޯދީ ހުވާ ކުރުމުގެ ރަސްމިއްޔާތަށް އިންޑިޔާއަށް ގޮސް އިންނަވައިގެން އިންޑިޔާއާއި ނުހަނު ގުޅުން ރަނގަޅު ކުރަން އެދޭކަން ހެނދުނުން ފެށިގެން މެންދުރުވެސް ދެއްކުމަށް ފަހު، ހަވީރު ރަނގަޅަށް ވެލި ތަނާ، ރައްޔިތުން މަޖިލީޖުގެ 241 ކޮމިޓީއިން ނިންމީ އިންޑިޔާގެ އެއްބަސްވުންތައް އިންވެސްޓިގޭޓް ކުރުމަށެވެ. މިކަން ހުއްޓުވަން ޖެހުނީ އިންޑިޔާގެ މީޑިޔާ ތަކުން މުއިއްޒުގެ ސަރުކާރުގެ އަސްލު ސިފަ ވަގުތުން ގެންނަން ފެށުމުން އިތުރު ގޮތެއް ނެތިގެންނެވެ.