ސިފައިން ހައްޔަރުކޮށްގެން 22 ދުވަހު ގިރިފުށީގައި ގެންގުޅެފައި ރައީސުލްޖުމްހޫރިއްޔާ މުހައްމަދު ނަޝީދު އިސްތިއުފާ ދެއްވި ދުވަހު ދޫކޮށްލި ކްރިމިނަލް ކޯޓުގެ އިސް ގާޒީ އަބްދުﷲ މުހައްމަދު ޗުއްޓީއެއް ނަންގަވާ ކަހަލަ ވިސްނުމެއް ގެންގުޅުއްވާ ކަމަށް އޭނާ މިއަދު ވިދާޅުވެއްޖެ އެވެ. "ހަވީރާ" ވާހަކަ ދައްކަވަމުން އަބްދުﷲ ގާޒީ ވިދާޅުވީ ހައްޔަރު ކުރުމުގެ ކުރިން ވެސް ޗުއްޓީއެއް ނަންގަވަން ހިޔާލުކުރައްވާފައިވާ ކަމަށެވެ. އަދި މިހާރު އަނެއްކާ ވެސް އެކަހަލަ ވިސްނުމެއް ގެންގުޅުއްވާ ކަމަށް ވެސް އޭނާ ވިދާޅުވި އެވެ. "ކުރިން ވެސް ޗުއްޓީއެއް ނަގަން ހިޔާލުކޮށްފައި އޮތީ. ދެން އަނެއްކާ މިހާރު އެކަހަލަ ވިސްނުމެއް އެބަ ގެންގުޅެން،" އަބްދުﷲ ގާޒީ ވިދާޅުވި އެވެ. އަބްދުﷲ ގާޒީ ބަންދުން ދޫކޮށްލި ފަހުން ވެސް އޭނާއާ މެދު އެކި ކަހަލަ ވާހަކަތައް ފެތުރިފައިވެ އެވެ. އެގޮތުން އޭނާ ގޭގައި މަޑުކުރުމަށް ޖުޑީޝަލް ސާވިސް ކޮމިޝަން (ޖޭއެސްސީ) އިން އަންގާފައިވާ ކަމަށް ވެސް އަޑު ފެތުރިފައިވެ އެވެ. ނަމަވެސް އަބްދުﷲ ގާޒީ މިއަދު ވިދާޅުވީ އެފަދަ އެއްވެސް އެންގުމެއް އެ ކޮމިޝަނުން އަންގާފައިނުވާ ކަމަށެވެ. "ޖޭއެސްސީން އެއްވެސް އެއްޗެއް އަންގާފައެއް ނެތް،" އަބްދުﷲ ގާޒީ ވިދާޅުވި އެވެ. އަބްދުﷲ ގާޒީ ހައްޔަރު ކުރުމާއެކު އޭނާ ދޫކޮށްލުމަށް ގޮވާލައި އިދިކޮޅު ފަރާތްތަކުން ސިލްސިލާ މުޒާހަރާތަކެއް ވަނީ ކޮށްފަ އެވެ. ނަމަވެސް އޭރުގެ ރައީސް ނަޝީދު ވިދާޅުވެފައި ވަނީ އަބްދުﷲ ގާޒީ ދޫކޮށްނުލައްވާނެ ކަމަށެވެ. އަދި އަބްދުﷲ ގާޒީ އަށް ކޯޓާ 100 މީޓަރަށް ވެސް ކައިރިނުވެވޭނެ ކަމަށް ނަޝީދު ވިދާޅުވާ އޯޑިއޯއެއް ވެސް ވަނީ ލީކުވެފަ އެވެ. ރައީސްކަމުން ވަކިވެވަޑައިގަތުމަށް ފަހު ވެސް ނަޝީދު ވަނީ އަބްދުﷲ ގާޒީއާ މެދު ސަރުކާރުން އެޅި ފިޔަވަޅު ދިފާއު ކުރައްވައިފަ އެވެ.