‏އެޕަލް އިން އެ ކުންފުނީގެ ސަފާރީ ބްރައުޒަރުގައި އާޓިފިޝަލް އިންޓެލިޖެންސް ‏‏(އޭއައި) ބޭނުންކޮށްގެން ހިންގޭ ސާޗު އޮޕްޝަންތަކެއް ތައާރަފުކުރުމަށް ‏‏ރާވަމުންދާކަމަށް ޓެކް ރިޕޯޓްތައް ބުނެފި އެވެ.
މިއީ ގޫގުލްގެ ބާރުވެރިކަމަށް ‏‏ކުރިމަތިވާނެ ބޮޑު ގޮންޖެހުމެއް ކަމަށް ރިޕޯޓްތައް ބުނެއެވެ. ‏މި ހަބަރާ ގުޅިގެން ގޫގުލްގެ މައި ކުންފުނި ކަމުގައިވާ އަލްފަބެޓްގެ ހިއްސާގެ އަގަށް ‏‏ބޮޑު އަސަރެއް ކޮށް، ކުންފުނީގެ މާކެޓް ވެލިއުއިން ގާތްގަނޑަކަށް 150 ބިލިއަން ‏‏ޑޮލަރު ގެއްލިގެން ގޮސްފައިވެ އެވެ‏‎.‎
‏އެޕަލްގެ އެގްޒެކެޓިވް އެޑީ ކިއު އާއި ހަވާލާދީ، ‏‏ރޮއިޓާސްއަށް ބުނެފައި ވަނީ އެޕަލްއިން ސަފާރީ އަލުން ފަރުމާކުރުމަށް ބަލަމުންދާ ‏‏ކަމަށެވެ. މި ވާހަކަތައް އެޑީ ކިއު ދައްކާފައިވަނީ އޮންލައިން ސާޗުގައި ގޫގުލްގެ ‏‏ބާރުވެރިކަމާ ގުޅޭ އެންޓިޓްރަސްޓް މައްސަލައެއްގެ ހެކިބަސް ދެމުންނެވެ‏‎.‎
‏ކިއު ބުނެފައިވާ ގޮތުގައި، ފާއިތުވި މަހު ސަފާރީގައި ކުރެވުނު ސާޗްތައް ‏‏މަދުވެފައި ވަނީ ބޭނުންކުރާ ފަރާތްތަކުން އިތުރަށް އޭއައިއަށް ބަރޯސާވަމުން ‏‏ދިއުމުގެ ސަބަބުންނެވެ. މި ހަބަރާ ގުޅިގެން އެޕަލްގެ ހިއްސާގެ އަގު ވެސް 1.1 ‏‏އިންސައްތަ ދަށަށް ގޮސްފައިވެ އެވެ‏‎.‎
‏ނަމަވެސް، ގޫގުލްއިން ބުނެފައިވަނީ ޖުމުލަ ގޮތެއްގައި ސާޗް ކުއެރީތަކުގެ އަދަދު ‏‏އިތުރުވަމުންދާ ކަމަށާއި، މީގެ ތެރޭގައި "އެޕަލްގެ ޑިވައިސްތަކާއި ޕްލެޓްފޯމްތަކުން ‏‏އަންނަ ޖުމުލަ ކުއެރީތައް ވެސް" ހިމެނޭ ކަމަށެވެ. އަދި އެ ކުންފުނީގެ ބްލޮގެއްގައި ‏‏ޝާއިއުކޮށްފައިވާ ބަޔާނެއްގައި ބުނެފައި ވަނީ މީހުންނަށް ގޫގުލް ސާޗު އިތުރަށް ‏‏ބޭނުންތެރިވަމުންދާކަން ފެންނަމުންދާ ކަމަށާއި، އައު ކަންކަމަށް އައު ގޮތްތަކުގައި ‏‏ގޫގުލް ސާޗު ބޭނުންކުރަމުންދާ ކަމަށެވެ‏‎.‎
‏ގޫގުލްއިން އިތުރަށް ބުނެފައިވަނީ އަޑުން އަދި ފެނުމުން ކުރެވޭ ސާޗުތަކަކީ ޖުމުލަ ‏‏ސާޗު ވޮލިއުމް އިތުރުވުމަށް މަގުފަހިކޮށްދޭ ކަންކަން ކަމަށެވެ. ނަމަވެސް، އެޑީ ކިއު ‏‏އޭނާގެ ހެކިބަހުގައި ސާޗުތަކުގެ ބާވަތްތައް ދެނެގަތުމުގައި ބޭނުންކޮށްފައި ވަނީ މި ‏‏އަޅާކިޔުމުގެ އަސާސްތޯ ސާފެއް ނުވެ އެވެ‏‎.‎
‏މި ކަންކަމުން ދައްކުވައިދެނީ އޮންލައިން ސާޗު މާކެޓުގައި ގޫގުލްގެ ބާރުވެރިކަމަށް ‏‏އެޕަލްއިން ގޮންޖަހަމުންދާކަމެވެ. އެޕަލްގެ މި ފިޔަވަޅަކީ އައިފޯން ބޭނުންކުރާ ‏‏ފަރާތްތަކުގެ ސާޗް ޑޭޓާއަށް ބަރޯސާވެފައިވާ ގޫގުލްގެ ފައިދާ ބޮޑު އިޝްތިހާރު ‏‏ވިޔަފާރިއަށް ބޮޑު ނުރައްކަލެއް ކަމުގައި ފާހަގަކުރެވެ އެވެ‏‎.‎
‏މި ކަމުގެ ސަބަބުން ޓެކްނޮލޮޖީ ދާއިރާގެ ބޮޑު ދެ ކުންފުނީގެ ދެމެދުގައި ‏‏ވާދަވެރިކަން އިތުރުވެ، ސާޗު އިންޖިން މާކެޓުގައި އައު ބަދަލުތަކެއް އަންނާނެކަމަށް ‏‏ލަފާކުރެވެ އެވެ. އަދި މީގެ ސަބަބުން އިންޓަނެޓް ބޭނުންކުރާ ފަރާތްތަކަށް އިތުރު ‏‏އޮޕްޝަންތަކެއް ލިބި، އޭއައި ޓެކްނޮލޮޖީގެ ބޭނުން އިތުރަށް ފުޅާވެގެންދާނެ ‏‏ކަމަށް ވެސް ބެލެވެ އެވެ‏‎.‎
‏ޓެކްނޮލޮޖީ ދާއިރާގެ މާހިރުން ދެކޭ ގޮތުގައި، އެޕަލްގެ މި ފިޔަވަޅަކީ އޭއައި ‏‏ޓެކްނޮލޮޖީގެ ދާއިރާގައި ކުރިއަރަމުންދާ ވާދަވެރިކަމުގެ އިތުރު ހެއްކެކެވެ. އަދި މީގެ ‏‏ސަބަބުން ކުރިއަށް އޮތްތަނުގައި ޔޫޒަރުންނަށް އިތުރު ފައިދާތަކެއް ކުރާނެ ‏‏ކަމަށްވެސް އެ ފަރާތްތަކުން ލަފާކުރެ އެވެ.‏